ސައުތް އެފްރިކާއިން 3 ހަފްތާގެ ލޮކްޑައުންއަކަށް ގޮސްފި
27 މާރިޗު 2020 | ހުކުރު 06:24ގޭގެއަށް ބޭނުންވާ މުދަލާއި ކާބޯތަކެތި ގިނަ އަދަދަކަށް ގަނެފައިވޭ
މި އެންގުންތަކާ ޚިލާފުވާ ފަރާތްތަކަށް މަދުވެގެން 6 މަސް ދުވަހުގެ ޖަލު ހުކުމެއް އަންނާނެ
ކޮވިޑް-19 ފެތުރުން ހުއްޓުވުމަށް އަޅަމުންދާ ފިޔަވަޅުތަކުގެ ދަށުން ސައުތު އެފްރިކާއިން 3 ހަފްތާގެ ލޮކްޑައުންއަކަށް ގޮސްފިއެވެ.
ސައުތު އެފްރިކާގެ ނޫސްތަކާއި ޙަވާލާދީ ބީބީސީގައި ރިޕޯޓްކޮށްފައިވާ ގޮތުން ސައުތު އެފްރިކާގައި ލޮކްޑައުން އިއުލާނުކޮށް، ސަލާމަތީ ބާރުތަކުން ދަނީ އެކަން ތަންފީޒު ކުރުމަށް އަޅަންޖެހޭ ފިޔަވަޅުތައް އަޅަމުންނެވެ. އެގޮތުން ކޮންމެހެން ޒަރޫރީ ބޭނުމަކަށް ނޫނީ ބޭރަށް ނުކުތުން މަނާކޮށްފައިވާއިރު، ހުކުރު ދުވަހުން ފެށިގެން ލޮކްޑައުން ކުރުމަށް ނިންމުމާއެކު އޭގެ ކުރިން ދުވަހު ގިނަ ބަޔަކު ވަނީ ސުޕަމާރކެޓު ތަކުގައި ކިއޫ ހަދާލައި ގޭގެއަށް ބޭނުންވާ މުދަލާއި ކާބޯތަކެތި ގިނަ އަދަދަކަށް ގަނެފައެވެ.
ސައުތް އެފްރިކާގައި 21 ދުވަހަށް ލޮކްޑައުން އިއުލާނު ކުރުމާއެކު އެ ޤައުމުގެ ރައީސް ސިރިލް ރަމަފޯސާ ވަނީ ސަލާމަތީ ބާރުތަކާ ބައްދަލު ކުރައްވައި، މިއީ އެ ޤައުމުގެ ޑިމޮކްރަސީ ހަޔާތުގައިވެސް އިއުލާނު ކުރި ފުރަތަމަ ލޮކްޑައުންކަމަށް ވިދާޅުވެފައެވެ.
ލޮކްޑައުންގެ މި މުއްދަތުގައިވެސް ކާބޯތަކެތި ވިއްކާ ތަންތަން ހުޅުވިފައި ހުންނާނެއެވެ. ނަމަވެސް މަޤުބޫލު ސަބަބެއް ނެތި ބޭރުގައި އުޅުން މަނާކޮށްފައިވާކަމަށް ރިޕޯޓްތައް ބުނެއެވެ. އަދި މި އެންގުންތަކާ ޚިލާފުވާ ފަރާތްތަކަށް މަދުވެގެން 6 މަސް ދުވަހުގެ ޖަލު ހުކުމެއް އަންނާނެ ކަމަށް އެ ޤައުމުގެ ކަމާބެހޭ އިދާރާތަކުން ހާމަކޮށްފައިވެއެވެ.
ދެކުނު އެފްރިކާއިން މިހާތަނަށް 900 އަށްވުރެ ގިނަ ކޭސް ރިޕޯޓްކޮށްފައިވާއިރު، އެއީ މުޅި އެފްރިކާ ބައްރުންވެސް މިހާތަނަށް އެންމެ ގިނައިން ވައިރަސްއަށް ޕޮޒިޓިވްވި ޤައުމެވެ. ނަމަވެސް މިހާތަނަށް އެ ޤައުމުން ވައިރަސްގައި މީހަކު މަރުވެފައެއް ނުވެއެވެ.
