ފައިޒަރ އިން އެމެރިކާގެ 4 ސްޓޭޓެއްގައި ވެކްސިން ޑިސްޓްރިބިއުޝަން ޓްރަޔަލްތަކެއް ފަށައިފި

ކޮވިޑް-19 އަށް އެމެރިކާގެ ފަރމަސޫޓިކަލް ކުންފުނި، ފައިޒަރ އިން ކޮވިޑް-19 އަށް ތައްޔާރުކޮށްފައިވާ ވެކްސިން ޑިސްޓްރިބިއުޓް ކުރުމުގެ ޓްރަޔަލްތަކެއް ފަށައިފިއެވެ.

ފައިޒަރ އިން މައުލޫމާތުދޭ ގޮތުގައި އެކުންފުނިން ވެކްސިން ޑިސްޓްރިބިއުޓް ކުރުމުުގެ ޓްރަޔަލްތައް ކުރިއަށް ގެންދިއުމަށް ނިންމާފައި ވަނީ ރޯޑް އައިލެންޑް، ޓެކްސަސް، ނިއު މެކްސިކޯ އަދި ޓެނެސީގައެވެ. އެގޮތުން، މި ހަތަރު ސްޓޭޓްގައި ވެކްސިން ޑިސްޓްރިބިއުޝަންގެ ޓްރަޔަލް ކުރިއަށް ގެންދަން ނިންމާފައި ވަނީ ހަތަރު ސްޓޭޓްގެ ވެސް އާބާދީގައި ހުރި ތަފާތުގެ ސަބަބުން ކަމަށް ފައިޒަރ އިން ބުނެއެވެ.

ފައިޒަރ އިން ކޮވިޑް-19 އަށް ތައްޔާރު ކުރި ވެކްސިންގެ ޑިސްޓްރިބިއުޝަން ޓްރަޔަލްތައް ކުރިއަށް ގެންދަން ނިންމާފައި ވަނީ ވެކްސިން ސްޓޯރ ކުރުމަށް ބޭނުންވާ އަލްޓަރ ކޯލްޑް ސްޓޯރޭޖް ގައި ހުރި ދަތިތަކުގެ ސަބަބުން ވެކްސިން ސްޓޯރ ކުރުމުގައި ދިމާވެދާނެ ގޮންޖެހުންތަށް ދެނެގަނެ އެކަންކަމަށް ހައްލު ހޯދުމުގެ ގޮތުންނެވެ.

މި ހަތަރު ސްޓޭޓްގައި ވެކްސިން ޑިސްޓްރިބިއުޓް ކުރުމުގެ ޓްރަޔަލްތައް ކުރިއަށް ގެންދިޔަ ނަމަވެސް އެހެން ސްޓޭޓްތަކަށް ވުރެ އަވަހަށް މި ސްޓޭޓްތަކަށް ވެކްސިންގެ ޑޯޒްތައް ނުލިބޭނެ ކަމަށާއި އެހެން ސްޓޭޓްތަކާއި ތަފާތުކުރުމެއްވެސް ނޯންނާނެކަމަށް ފައިޒަރ އިން ބުނެއެވެ.

ފައިޒަރ އިން ބުނީ އެކުންފުނީގެ އުންމީދަކީ ޑިސްޓްރިބިއުޝަންގެ މި ޓްރަޔަލްތަކުގެ ސަބަބުން ވެކްސިން ހުރިހާ ސްޓޭޓަކަށް ފޯރުކޮށްދިނުމަށް މަގުފަހިވެގެން ދިއުން ކަމަށެވެ.

ފައިޒަރ އިން ކޮވިޑް-19 އަށް ތައްޔާރުކުރަމުންދާ ވެކްސިންގެ 90 އިންސައްތަ ރައްކާތެރިަކަމަށް ވެކްސިންގެ ކްލިނިކަލް ޓްރަޔަލް އިން މިހާތަނަށް ހެދި ޓެސްޓުތަކުން ދައްކާ އިރު، މި ވެކްސިންގެ ޓްރަޔަލްތައް ކުރިއަށް ގެންގޮސްފައި ވަނީ 45،000 ވޮލެންޓިއަރުންނާއި އެކުއެވެ.