އެސްޓްރަޒެނެކާ ވެކްސިންގެ އެއް ޑޯޒުން ތިން މަސް ދުވަހަށް ވެކްސިންގެ އަސަރު ހުރޭ

އެސްޓްރަޒެނެކާ އާއި އޮކްސްފޯޑް ޔުނިވާސިޓީ ގުޅިގެން ކޮވިޑް-19 އަށް އުފައްދާފައިވާ ވެކްސިންގެ އެއް ޑޯޒް ޖެހުމުން ތިން މަސް ދުވަހަށް ވެކްސިންގެ އަސަރު ހުންނަކަމަށް އޮކްސްފޯޑުން އެންމެ ފަހުން ކުރި ދިރާސާއިން ދައްކައިފިއެވެ.

މި ދިރާސާއިން ދައްކާގޮތުން އެސްޓްރަޒެނެކާ ވެކްސިންގެ އެއް ޑޯޒް ޖެހުމުން ތިން މަސް ދުވަހަށް ވެކްސިންގެ އަސަރު ހުންނަ ވަރު 76 އިންސައްތަ ކާމިޔާބުކަމަށެވެ. އަދި ފުރަތަމަ ޑޯޒް ދިނުމަށްފަހު ދެ ވަނަ ޑޯޒް ދިނުމާ ދެމެދު ގިނަ ދުވަސް ހޭދަކޮށްފި ނަމަ ވެކްސިންގެ އަސަރު އިތުރުވާކަމަށް ދިރާސާއިން ދައްކައެވެ.

އަންގާރަ ދުވަހު އޮކްސްފޯޑުން ވަނީ މި ދިރާސާގެ ހޯދުންތަކުން، ވެކްސިންގެ ފުރަތަމަ ޑޯޒް ދޭތާ 12 ހަފްތާފަހުން ދެ ވަނަ ޑޯޒް ދިނުމުން ވެކްސިންގެ އަސަރުކުރާވަރު އިތުރުކަމަށް ދެއްކުމުން، މިގޮތަށް ވެކްސިން ދިނުމަށް އިނގިރޭސިވިލާތުން ނިންމި ނިންމުމަކީ ރަނގަޅު ނިންމުމެއް ކަމަށް ބުނެފައެވެ. އެހެން ނަމަވެސް މިގޮތަށް ވެކްސިން ދިނުމުން އުމުރުން ދޮށީ މީހުންނަށް ވެކްސިންގެ އަސަރު ކުރާނީ ކިހާވަރަކަށް ކަމެއް މި ދިރާސާއިން ހާމަކޮށްފައެއް ނުވެއެވެ. އެހެން ކަމުން އިނގިރޭސިވިލާތުން ޚާއްޞަ އިސްކަމެއް ދީގެން އުމުރުން ދުވަސްވީ މީހުންނަށް ވެކްސިން ދޭއިރު، މިގޮތަށް ވެކްސިން ދިނުމުން އެމީހުންގެ ހަށިގަނޑަށް ވެކްސިންގެ އަސަރު އެންމެ އެކަށޭނަ ގޮތުގައި ކުރާނެ ކަމެއް ނުވަތަ ނޫން ކަމެއް ނޭނގެއެވެ.

އޮކްސްފޯޑް ވެކްސިން ޓްރަޔަލްގެ ޗީފް އިންވެސްޓިގޭޓަރ އެންޑްރިއު ޕޮލާރޑް ވަނީ ވެކްސިންގެ ފުރަތަމަ ޑޯޒް ދިނުމަށް ފަހު 12 ހަފްތާ ފަހުން ދެވަނަ ޑޯޒް ދިނުމަކީ އެންމެ ރަނގަޅު ގޮތް ކަމަށާއި ވެކްސިންގެ ފުރަތަމަ ޑޯޒް ދޭތާ 22 ދުވަސް ފަހުން ބަލިން ރައްކާތެރިވާނެ ކަމަށެވެ.

އެސްޓްރަޒެނެކާ ރިސާރޗްގެ ޗީފް ވަނީ ވެކްސިންގެ ފުރަތަމަ ޑޯޒް ދޭތާ 8 ހަފްތާ ނުވަތަ 12 ހަފްތާ ފަހުން ވެކްސިންގެ ދެވަނަ ޑޯޒް ދިނުމަކީ ވެކްސިންގެ އަސަރު އެންމެ ބޮޑަށް ކުރާނެ ގޮތް ކަމަށް ބުނެފައެވެ.

އިނގިރޭސިވިލާތާއި، ބްރެޒިލް އަދި ސައުތު އެފްރިކާގައި ކުރިއަށް ގެންދިޔަ ވެކްސިންގެ ޓްރަޔަލްތައް ދައްކާގޮތުން ފުރަތަމަ ޑޯޒް އާއި ދެވަނަ ޑޯޒް ދެވޭ މުއްދަތު ދުރުކުރެވިއްޖެ ނަަމަ މީހާގެ ދިފާޢީ ނިޒާމު ވައިރަހާ ދެކޮޅަށް މަސައްކަތްކުރާ ވަރު އިތުރުކަމަށް ބުނެފައެވެ. މި ޓްރަޔަލްތަކުގައި ބައިވެރިވެފައި ވަނީ އުމުރުން 18 އަހަރާއި 55 އަހަރާ ދެމެދުގެ މީހުންނެވެ.

އުމުރުން 56 އަހަރުން މަތީގެ މީހުންނަށް ވެކްސިން ދިނުމުގައި ފުރަތަމަ ޑޯޒަށް ފަހު ދެވަނަ ޑޯޒްއާ ދެމެދު އެންމެ ދިގު މުއްދަތެއްގެ ގޮތުގައި ޓެސްޓުކޮށްފައި ވަނީ 6 ހަފްތާ އާއި 8 ހަފްތާއާ ދެމެދުގެ މުއްދަތެކެވެ.

މި ދިރާސާއިން ދައްކާގޮތުން ވެކްސިންގެ ފުރަތަމަ ޑޯޒް ދޭތާ 12 ހަފްތާ ނުވަތަ އެއަށްވުރެ ދިގު މުއްދަތަަކަށް ފަހު ވެކްސިންގެ ދެވަނަ ޑޯޒް ދިނުމުން ވެކްސިނުން އަސަރުކުރަނީ 82.4 އިންސައްތައެވެ. މީގެއިތުރުން 6 ހަފްތާއަށް ވުރެ ކުޑަ މުއްދަތަކަށްފަހު، ވެކްސިންގެ ދެ ވަނަ ޑޯޒް ދީފިނަމަ ވެކްސިނުން އަސަރުކުރާ ވަރު ދައްކަނީ 54.9 އިންސައްތަ ކަމަށެވެ.

ވެކްސިންގެ ފުރަތަމަ ޑޯޒް ދިނުމަށް ފަހު، އޭގެ 12 ހަފްތާ ފަހުން ދެވަނަ ވެކްސިން ދިން 12،408 މީހުންގެ ތެރެއިން އެއްވެސް މީހަކަށް ކޮވިޑް-19 ގެ އަސަރުކޮށްގެން، 22 ދުވަސް ފަހުން ހޮސްޕިޓަލަށް ދާންޖެހިފައި ނުވާކަމަށް ދިރާސާގައި ވަނީ ފާހަގަކޮށްފައެވެ.

އޮކްސްފޯޑުން ވަނީ ވެކްސިން ޖެހުމުން ވައިރަހުގެ ޓްރާންސްމިޝަން ރޭޓް 67 އިންސައްތަ ދަށަށް ގޮސްފައިވާ ކަމަށް އިނގިރޭސިވިލާތުގައި ބެލި ބެލުންތަކުން ފާހަގަވެފައިވާ ކަމަށެވެ.

އޮކްސްފޯޑް އާއި އެސްޓްރަޒެނެކާގެ މިވެކްސިން އުމުރުން 55 އަހަރުން މަތީގެ މީހުންނަށް އެންމެ އެކަށޭނެ ގޮތުގައި މަސައްކަތްކުރާނެ ކަމާމެދު ޔޫރަޕިއަން މެޑިސިން ރެގިއުލޭޓަރުން ސުވާލު އުފައްދާފައިވާއިރު، އިނގިރޭސިވިލާތުން ވަނީ މިވެކްސިން ހުރިހާ އުމުރުފުރާއަކަށް މަސައްކަތްކުރާ ކަމަށް ބުނެފައެވެ.