ރާއްޖޭގައި ކޮވިޑް-19 ވެކްސިނޭޝަން ޕްރޮގްރާމް ފަށައިފި
1 ފެބުރުއަރީ 2021 | ހޯމަ 06:42ރާއްޖޭގެ ތިން ސިޓީއެއްގައި ވެކްސިންދިނުމުގެ މަސައްކަތް ވަނީ ފަށާފައި
ސޯޝަލް ސެންޓަރުގައި ވެކްސިންދިނުމުގެ މަސައްކަތް ކުރިއަށް ގެންދަނީ
ރާއްޖޭގައި ކޮވިޑް-19 ވެކްސިނޭޝަން ޕްރޮގްރާމް ފަށައިފިއެވެ.
ފެބްރުއަރީ މަހުގެ އެއްވަނަ ދުވަހު ރާއްޖޭގައި ވެކްސިނޭޝަން ޕްރޮގްރާމް ފައްޓަވައިދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙްއެވެ.
ރާއްޖޭގެ ތިން ސިޓީއެއްގައި ވެކްސިން ދިނުމުގެ މަސައްކަތް ފަށާފައިވާއިރު، އެއީ މާލެ ސިޓީގެ އިތުރުން އައްޑޫ ސިޓީ އަދި ކުޅުދުއްފުށި ސިޓީއެވެ.
މާލެ ސިޓީގެ ސޯޝަލް ސެންޓަރުގައި ވެކްސިން ދިނުމުގެ މަސައްކަތް ކުރިއަށްދާއިރު، އެންމެ ފުރަތަމަ ވެކްސިންޖަހާފައި ވަނީ އިންދިރާ ގާންދީ މެމޯރިއަލް ހޮސްޕިޓަލްގެ މެޑިކަލް އޮފިސަރެއް ކަމަށްވާ ޑރ. ޝިރާނީ އަބްދުއްރަޙްމާނެވެ. އަދި ދެވަނައަށް އައި.ޖީ.އެމް.އެޗް.ގެ ނަރުހަކަށް ވެކްސިން ދީފައިވާއިރު، ތިން ވަނައަށް ވެކްސިންޖަހާފައި ވަނީ ހަކުރު ބައްޔަށް ފަރުވާ ހޯދަމުންދާ ފަރާތެކެވެ.
ރާއްޖޭގެ ރައީސުލްޖުމްހޫރިއްޔާ ހަތަރު ވަނަ އަށް ވެކްސިން ޖެއްސެވިއިރު، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުުރުން އުއްތަމަ ފަނޑިޔާރު، މުޢުތަސިމް އަދްނާން ވަނީ ކޮވިޑް-19 ގެ ވެކްސިން ޖައްސަވާފައެވެ.
މީގެ އިތުރުން ހެލްތު މިނިސްޓަރ އަހްމަދު ނަސީމް އާއި ޑިފެންސް މިނިސްޓަރ މާރިއާ އަހްމަދުދީދީގެ އިތުރުން ފޮރިން މިނިސްޓަރ އަބްދުﷲ ޝާހިދު އަދި ޖެންޑަރ މިނިސްޓަރ އައިޝަތު މުހައްމަދު ދީދީ ވަނީ ވެކްސިން ޖައްސަވާފައެވެ. އަދި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ސަންޖޭ ސުދީރު ވެސް ވަނީ ވެކްސިން ޖައްސަވާފައިއެވެ.
މާލޭގައި ފެށިގެން ދިޔަ ވެކްސިނޭޝަން ޕްރޮގްރާމްގައި ހައިރިސްކު ކެޓަގަރީގެ ފަރާތްތަކުގެ އިތުރުން ތެލެސީމިއާއަށް ފަރުވާ ހޯދާ ފަރާތްތަކުގެ އިތުރުން ފްރަންޓްލައިންގައި މަސައްކަތްކުރާ ފަރާތްތަކުން ވަނީ ވެކްސިންޖަހާފައެވެ. އޭގެތެރޭގައި ދިވެހި ސިފައިންނާއި ފުލުހުންގެ އިތުރުން ވެމްކޯގެ މުވައްޒަފުންނާއި އެއަރޕޯޓް އަދި ޓްރާންސްޕޯޓްގައި މަސައްކަތްކުރާ ފަރާތްތައް ވަނީ ވެކްސިންޖަހާފައެވެ.
އައްޑޫ ސިޓީގައި ވެކްސިންދިނުމުގެ ކަންތައްތައް ފެށުމުގެ ގޮތުން، އެސިޓީއިން އެންމެ ފުރަތަމަ ވެކްސިން ޖަހާފައި ވަނީ އައްޑޫ ސިޓީ ހޮސްޕިޓަލްގެ އެކްޓިން މެޑިކަލް ޑިރެކްޓަރ ޑރ. އަބްދުﷲ އަދްސަރުއެވެ. އަދި ކުޅުދުއްފުށި ސިޓީގައި އެންމެ ފުރަތަމަ ވެކްސިން ޖަހާފައި ވަނީ އެސިޓީގެ ހެލްތު ސަރވިސަސް މެނޭޖަރ، އަހްމަދު ދާވޫދުއެވެ.
މި ދެސިޓީގައި ވެސް މިއަދު 30 މީހުންނަށް ވެކްސިންދޭނެއެވެ. ކުޅުދުއްފުށީގައި ވެކްސިން ދޭނީ 15 ދިވެހިނަށާއި 15 ބިދޭސީންނަށެވެ.
އިންޑިއާގެ ސެރަމް އިންސްޓިޓިއުޓުން އުފައްދާ ކޮވިޝީލްޑް ވެކްސިން ރާއްޖޭގައި އެމަޖެންސީކޮށް ބޭނުންކުރުމުގެ ހުއްދަ ދީފައިވާއިރު އިންޑިއާއިން ވަނީ މި ވެކްސިންގެ އެއް ލައްކަ ޑޯޒް ރާއްޖެއަށް ފޯރުކޮށްދީފައެވެ.
