މާލޭގައި ކޮވިޑް-19ގެ ކޭސްތައް ކޮންޓްރޯލްކުރުމަށް، ވޮލަންޓްރީ ޓެސްޓްކުރުމުގެ ފުރުސަތު ހުޅުވާލައިފިއެވެ. ރާއްޖޭގައި ކޮވިޑްގެ ކޭސްތައް އިތުރުވަމުންދާއިރު، މާލެ ސަރަހައްދުން މި ބައްޔަށް ޕޮޒިޓިވްވާ މީހުންގެ އަދަދު ވަނީ އިތުރުވެފައެވެ.

ހެލްްތް އިމަޖެންސީ އޮޕަރޭޝަން ސެންޓަރ، އެޗްއީއޯސީގެ ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާނު ޑރ. ފާތިމަތު ނަޒްލާ ރަފީޤްވަނީ ރާއްޖޭގައި ކޮވިޑްގެ ކޭސްތައް 100އިން މަތީގައި ހުރުމަކީ ކަންބޮޑުވާކަމެއްކަމަށް ވިދާޅުވެފައެވެ. މިހާރު ރާއްޖޭގެ ޙާލަތަށް ބަލާއިރު ވެރިކަން ކުރާ މާލެ ސިޓީ ސަރަހައްދުގައި ކޭސް ލޯޑް އިތުރުވެފައިވާއިރު މި ސަރަހައްދުގެ ޙާލަތު ތަފްސީލީގޮތެއްގައި ދެނެގަތުމަށް ޓެސްޓްކުރާ އަދަދު އިތުރުކުރުމަށް ވަނީ ނިންމާފައެވެ. އެގޮތުން މާލޭގައި ކޮވިޑް-19ގެ ކޭސްތައް ކޮންޓްރޯލްކުރުމަށް، ވޮލަންޓްރީ ޓެސްޓްކުރުމުގެ ފުރުސަތު ހުޅުވާލާފައިވާކަން ޑރ. ނަޒްލާ ހާމަކުރެއްވިއެވެ.

މާލެއިން ވޮލަންޓްރީ ޓެސްޓްކުރެވޭނީ، މާލެ ހިޔާ ފުރަގަހުގައި ހުންނަ ކުރީގެ ފްލޫ ކްލިނިކް ހިންގި ސަރަހައްދުގައެވެ. އެގޮތުން މި ތަނުން ޚިދުމަތްދޭނީ ހުކުރު ދުވަސް ނޫން ކޮންމެ ދުވަހެއްގެ ހެނދުނު 09:00 އިން 13:00 އަދި ހަވީރު 17:00 އިން 21:00އަށެވެ. އަދި ހުކުރު ދުވަހު ހަވީރު 17:00 އިން 21:00އަށް މި ޚިދުމަތް ލިބޭނެއެވެ. ހުޅުމާލޭގެ ފްލޫ ކްލިނިކުންވެސް ވޮލަންޓްރީ ޓެސްޓްކުރެވޭނެ އިންތިޒާމު ވަނީ ހަމަޖައްސާފައެވެ. އެގޮތުން މި ތަނުން ޚިދުމަތްދޭނީ ހުކުރު ދުވަސް ނޫން ކޮންމެ ދުވަހެއްގެ މެދުރުފަހު 14:00 އިން 17:00އަށެވެ. އަދި ހުކުރު ދުވަހު މި ޚިދުމަތް ދޭނީ ހަވީރު 17:00 އިން 20:00އަށެވެ. މާލޭގައި ކޮވިޑް-19ގެ ކޭސްތައް ކޮންޓްރޯލްކުރުމަށް، ވޮލަންޓްރީ ޓެސްޓްކުރުމުގެ ފުރުސަތު ހުޅުވާލާފައިވާއިރު، ބަލީގެ އެއްވެސް އަލާމާތެއް ހުރިނަމަ ފްލޫ ކްލިނިކް ނޫން ތަނަކުން ޓެސްޓް ނުހެދުމަށް ޑރ. ނަޒްލާ ވަނީ އިލްތިމާސްކުރައްވާފައެވެ.

ވޮލަންޓްރީ ޓެސްޓްކުރުމުގެ ފުރުސަތު ހުޅުވާލާފައިވާއިރު، ދުވާލެއްގެ މައްޗަށް ދެ ހާސް ފައްސަތޭކައަށްވުރެ ގިނަ ސާމްޕަލް ދަނީ ނަގަމުންނެވެ. އެގޮތުން މިދިޔަ ހޮނިހިރު ދުވަހުގެ ނިޔަލަށް 410،006 (ހަތަރު ލައްކަ ދިހަހާސް ހައެއް)ސާމްޕަލް ވަނީ ނަގާފައެވެ.