ކ. މާލެ
|
31 ޖެނުއަރީ 2021 | އާދީއްތަ 16:43
ބޭންކް އޮފް މޯލްޑިވްސް
ބޭންކް އޮފް މޯލްޑިވްސް
ބެންކް އޮފް މޯލްޑިވްސް
ބީއެމްއެލްގެ އާމްދަނީގެ ފައިދާ ދަށްވުން
ފާއިތުވި އަހަރު ބީއެމްއެލްއަށް ލިބުނު ފައިދާ 60 އިންސައްތަ ދަށަށް!
 
ކޮވިޑް-19 ގެ ސަބަބުން ބޭންކުގެ އާމްދަނީއަށް ވަނީ އަސަރުކޮށްފައި
 
ޖުމްލަ އާމްދަނީގެ ގޮތުގައި ލިބިފައި ވަނީ 2.6 ބިލިއަން ރުފިޔާ

ފާއިތުވި އަހަރު ބޭންކް އޮފް މޯލްޑިވްސް އަށް ލިބުނު ފައިދާ 2019 ވަނަ އަހަރާއި އަޅާބަލާއިރު 60 އިންސައްތަ ދަށަށް ހިނގައްޖެއެވެ.

ބޭންކް އޮފް މޯލްޑިވްސްއިން އާންމުކޮށްފައިވާ 2020 ވަނަ އަހަރުގެ ފަހު ކުއާޓާގެ ރިޕޯޓް ދައްކާގޮތުން އެކުންފުންޏަށް ހަތަރު ވަނަ ކުއާޓާގައި އާމްދަނީގެ ގޮތުގައި ލިބިފައި ވަނީ 728 މިލިއަން ރުފިޔާއެވެ. އަދި މުޅި އަހަރު ޖުމްލަ އާމްދަނީގެ ގޮތުގައި ލިބިފައި ވަނީ 2.6 ބިލިއަން ރުފިޔާއެވެ. 2019ވަނަ އަހަރު އެކުންފުންޏަށް އާމްދަނީގެ ގޮތުގައި ލިބިފައި ވަނީ 2.8 ބިލިއަން ރުފިޔާއެވެ.

ބީއެމްއެލްއިން އާންމުކޮށްފައިވާ ރިޕޯޓް ދައްކާގޮތުން ފާއިތުވި އަހަރު އެކުންފުންޏަށް ނެޓް އިންޓްރެސްޓް އިންކަމްގެ ގޮތުގައި 1.7 ބިލިއަން ރުފިޔާ ލިބިފައިވާއިރު، ނެޓް ފީ އެންޑް ކޮމިޝަން އިންކަމްގެ ގޮތުގައި ލިބިފައި ވަނީ 426 މިލިއަން ރުފިޔާއެވެ. އަދި އޮޕަރޭޓިން ޕްރޮފިޓްގެ ގޮތުގައި 2.2 ބިލިއަން ރުފިޔާ ވަނީ ލިބިފައެވެ.

ޓެކުހަށް ކެނޑުމަށްފަހު ޖުމްލަ ފައިދާގެ ގޮތުގައި 329 މިލިއަން ރުފިޔާ ބީއެމްއެލްއަށް ލިބިފައިވާއިރު، 2019 ވަނަ އަހަރު ޖުމްލަ ފައިދާގެ ގޮތުގައި އެކުންފުންޏަށް ލިބިފައި ވަނީ 1.04 ބިލިއަން ރުފިޔާއެވެ.

ބީއެމްއެލްއިން ބުނީ ކޮވިޑް-19 ގެ ސަބަބުން ބޭންކުގެ އާމްދަނީއަށް އަސަރުކޮށްފައިވާކަމަށާއި ކްރެޓިޑް ފެސިލިޓީތަކަށް އަނބުރާ ފައިސާ ދެއްކުމަށް ގެނެވިފައިވާ ބަދަލުގެ ސަބަބުން ފާއިތުވި އަހަރުގެ ފަހު ކުއާޓާގައި އެކުންފުންޏަށް ގެއްލުންވެފައިވާ ކަމަށެވެ.

މިއަހަރު ތެރޭގައިވެސް ލޯނު ދޫކޮށް އިގްތިސާދަށް އެހީތެރިވުމަށް ލޯނާއި ފައިނޭންސިންގގެ ގޮތުގައި ތިން ބިލިއަން ރުފިޔާއަށްވުރެ އިތުރު އަދަދަކަށް ބޭންކުން ފައިސާ ދޫކޮށްފައިވާކަމަށާއި ބޭންކުގެ އެސެޓަށް ގާތްގަނޑަކަށް ފަސް ބިލިއަން ރުފިޔާ އިތުރުވެފައިވާއިރު ކަސްޓަމަރުން ޑިޕޮސިޓްކޮށްފައިވާ އަދަދަށް ބަލާއިރު 6.4 ބިލިއަން އިތުރުވެފައިވާކަމަށް ބީއެމްއެލް އިން ބުނެއެވެ. އަދި ބޭންކުގެ ރައުސްމާލާއި ލިކުއިޑިޓީ ރޭޝިއޯވަނީ ގާނޫނުން ލާޒިމްކުރާ މިންވަރަށްވުރެ މަތީގައި ހިފެހެއްޓިފައިކަމަށް ބޭންކުން ފާހަގަކުރެއެވެ.

މި ނަތީޖާއާ ގުޅޭ ގޮތުން ވާހަކަ ދައްކަވަމުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ ޓިމް ސޯޔަރ ވަނީ ކޮވިޑް-19 އާ ގުޅިގެން ކުރިން ލަފާކުރެވުނު ފަދައިން 2020 ވަނަ އަހަރުގެ އެންމެ ފަހު ކުއާޓަރގެ ނަތީޖާއަށް އަސަރުކޮށްފައިވާކަން ފާހަގަކުރައްވާ ފާއިތުވި އަހަރު ނުތަނަވަސް އަހަރެއް ކަމަށް ވީނަމަވެސް ބޭންކުން ފާއިތުވެދިޔަ އަހަރުތަކުގައި ހޯދިފައިވާ ކާމިޔާބު ނަތީޖާތަކުގެ ސަބަބުން ބޭންކަށް ފުރިހަމަ ގޮތެއްގައި ތައްޔާރުވެވުނުކަމަށް ވިދާޅުވެފައެވެ. އަދި 2020 ގައި ބޭންކުންވަނީ ރާއްޖޭގެ އިގްތިޞާދު ހީނަރުނުވެ ހިފެހެއްޓުމުގައި މުހިންމު ދައުރެއް އަދާކޮށްފައިކަމަށާއި ފުރަބަންދުގެ މުއްދަތުގައި މެދުކެނޑުމެއްނެތި ބޭންކިންގ ހިދުމަތް ފޯރުކޮށްދިނުމާއި، ލޯނުތައް އަނބުރާ ދެއްކުން ފަސްކޮށްދިނުމާއި، ވިޔަފާރިތަކަށް އެހީވުމަށް ވާކިންގ ކެޕިޓަލް ފައިނޭންސިންގ ތައާރަފް ކުރުމުގެ އިތުރުން ސަރުކާރާ ގުޅިގެން ކޮވިޑް-19 ރިކަވަރީ ސްކީމުގެ ދަށުން ބޭންކުން ލޯނު ދޫކޮށްފައިވާކަމަށް ޓިމް ވިދާޅުވިއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ޒަމްޢަތު އަޙްމަދު ވަހީދު
0%
0%
0%
0%
0%
0%
ކޮމެންޓް