2020 ވަނަ އަހަރުގެ ފަހު ކުއާޓަރގައި އެސްޓީއޯއަށް 1.9 ބިލިއަން ރުފިޔާގެ އާމްދަނީއެއް

ފާއިތުވި އަހަރުގެ ފަހު ކުއާޓަރގައި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އަށް އާމްދަނީގެ ގޮތުގައި 1.9 ބިލިއަން ރުފިޔާ ލިބިފައިވާކަަމަށް އެކުންފުނިން ބުނެފިއެވެ.

އެސްޓީއޯއިން އާންމުކޮށްފައިވާ ފާއިތުވި އަހަރުގެ ފަހު ކުއާޓަރ ރިޕޯޓްގައިވާ ގޮތުން އެކުންފުންޏަށް ސާފު ފައިދާގެ ގޮތުގައި 91 މިލިއަން ރުފިޔާ ވަނީ ލިބިފައެވެ. އަދި އޮޕަރޭޓިން ޕްރޮފިޓްގެ ގޮތުގައި އެކުންފުންޏަށް 151 މިލިއަން ރުފިޔާ ވަނީ ލިބިފައެވެ.

ފާއިތުވި އަހަރުގެ ފަހު ކުއާޓަރގައި އެސްޓީއޯއަށް އެންމެ ބޮޑު އާމްދަނީއެއް ލިބިފައި ވަނީ ތެލުގެ ވިޔަފާރިންނެވެ. އެގޮތުން ތެލުގެ ވިޔަފާރިން އާމްދަނީގެ ގޮތުގައި 972 މިލިއަން ރުފިޔާ ލިބިފައިވާއިރު ތެލުގެ ވިޔަފާރި ނޫން އެހެނިހެން ވިޔަފާރިތަކުން އެކުންފުންޏަށް އާާމްދަނީގެ ގޮތުގައި ލިބިފައިވަނީ 900 މިިލިއަން ރުފިޔާއެވެ.

ފާއިތުވި އަހަރު ޖުމްލަ އާމްދަނީގެ ގޮތުގައި އެސްޓީއޯއަށް 7.2 ބިލިއަން ރުފިޔާ ލިބިފައިވާއިރު، ތެލުގެ ވިޔަފާރިން ޖުމްލަ އާމްދަނީގެ ގޮތުގައި 4.1 ބިލިއަން ރުފިޔާ ވަނީ ލިބިފައެވެ. އަދި ތެލުގެ ވިޔަފާރި ނޫން އެހެން ވިޔަފާރިތަކުން އެސްޓީއޯއަށް އާމްދަނީގެ ގޮތުގައި ލިބިފައި ވަނީ ތިން ބިލިއަން ރުފިޔާއެވެ.

އެސްޓީއޯގެ ރިޕޯޓް ދައްކާގޮތުން ފާއިތު އަހަރު ނިމުނުއިރު އެކުންފުންޏަށް ޓެކްސް ދެއްކުމުގެ ކުރިން ފައިދާގެ ގޮތުގައި 500 މިލިއަން ރުފިޔާ ޖެހެއެވެ. އަދި ޓެކްސް އަށް ކެނޑުމަށް ފަހު އެކުންފުންޏަށް ސާފު ފައިދާގެ ގޮތުގައި ޖެހެނީ 409.99 މިލިއަން ރުފިޔާއެވެ. މިއީ 2019 ވަނަ އަހަރު އެކުންފުންޏަށް ލިބުނު ސާފު ފައިދާ އާއި އަޅާބަލާއިރު 35 އިންސައްތަ އިތުރު އަދަދެކެވެ.