ރަޝިޔާގެ އިދިކޮޅު ލީޑަރު އެލެކްސީ ނަވަލްނީގެ ކޮއްކޮ އޮލެގް ނަވަލްނީ ފުލުހުންގެ ބެލުމުގެ ދަށަށް ގެންގޮސްފިއެވެ.

ނަވަލްނީގެ ކޮއްކޮ އޮލެގް ފުލުހުންގެ ބެލުމުގެ ދަށަށް ގެންގޮސްފައިވާއިރު އޮލެގް ގެންގޮސްފައިވަނީ ކޮންކަމަކާއި ގުޅިގެން ކަމެއް ފުލުހުން ހާމަކޮށްފައެއް ނުވެއެވެ. މީގެ އިތުރުން ފުލުހުން ވަނީ ނަވަލްނީގެ ގޭގެ އިތުރުން އޭނާގެ އޮފީސްވެސް ބަލާފާސް ކޮށްފައެވެ.

ސިއްޙީ ފަރުވާއަށް ޖަރުމަނަށް ވަޑައިގަތުމަށްފަހު މި މަހުގެ 18 ވަނަ ދުވަހު އެނބުރި ރަޝިއާއަށް ވަޑައިގަތުމާއެކު ނަވަލްނީ ހައްޔަރުކޮށްފައިވާއިރު، އެދުވަހުގެ ވަގުތެއްގައި ވަނީ އޭނާގެ ބަންދަށް 30 ދުވަސް ޖަހާފައެވެ.

މިއާއިއެކު ނަވަލްނީގެ ސަޕޯޓަރުންވަނީ ނަވަލްނީ ދޫކޮށްލަން ގޮވާލައި ރަޝިއާގެ އެކި ސަރަހައްދުތަކުގައި މުޒާހަރާ ކޮށްފައެވެ. މި މުޒާހަރާތަކުން 4،000ށް ވުރެ ގިނަ މީހުން ހައްޔަރު ކޮށްފައިވާއިރު ނަވަލްނީގެ އަނބިކަނބަލުން ޔޫލިއާ ނަވަލްނަޔާ ވެސް ވަނީ ހައްޔަރު ކޮށްފައެވެ.

ޖަރުމަނުގެ ހޮސްޕިޓަލުގައި 32 ދުވަސް ވަންދެން ފަރުވާ ހޯއްދެވުމަށްފަހު ނަވަލްނީ ހޮސްޕިޓަލުން ދޫކޮށްލާފައިވަނީ މިދިޔަ އަހަރުގެ ސެޕްޓެމްބަރު މަހުގެ 20 ވަނަ ދުވަހުއެވެ. ރަޝިއާގެ ޕްރޮސެކިއުޓަރުންނާ ހަވާލާދީ ބީބީސީން ރިޕޯޓުކޮށްފައިވާ ގޮތުގައި ނަވަލްނީ ވަނީ ނަހަމުގޮތުގައި ފައިސާ ހޯދުމުގެ ކުށާ ގުޅިގެން ސަސްޕެންޑްކޮށް ފިޔަވަޅު އަޅާފައިވާ މުއްދަތުގެ ތެރޭގައި ޕެރޯލް ގަވާއިދާ ޚިލާފުވެފައެވެ. ނަމަވެސް އެއީ ސިޔާސީ ތުހުމަތެއް ކަމަށް ނަވަލްނީ ތުހުމަތު ކޮށްފައިވެއެވެ.

އޭނާ ޕެރޯލް ގަވާއިދާ ހިލާފުވި މައްސަލައިގައި ފެބްރުއަރީ 15 ގެ ނިޔަލަށް ބަންދުގެ މުއްދަތު ޖަހާފައިވާއިރު، އެ މައްސަލައިގެ އިތުރު އަޑުއެހުމެއް މި މަހުގެ 29 އަށް ވަނީ ތާވަލްކޮށްފައެވެ.

ރިޕޯޓުތައް ބުނާގޮތުން ނަހަމަގޮތުގައި ފައިސާ ހޯދުމުގެ ކުށުގައި އޭނާއަށް އިއްވާފައިވާ ތިން އަހަރުގެ ސަސްޕެންޝަން ޖަލު ހުކުމަކަށް ބަދަލުކުރުމާ މެދު އެ އަޑުއެހުމުގައި ގޮތެއް ނިންމާނެއެވެ.

ޖަރުމަނުގައި ގިނަ ދުވަސްތަކެއް ވަންދެން ބޭސްފަރުވާ ހޯއްދަވާފައި އެނބުރި ގައުމަށް ވަޑައިގެންނެވި ނަވަލްނީގެ ހާލުކޮޅު ސީރިއަސްވީ މިދިޔަ އޮގަސްޓް 20 ވަނަ ދުވަހު ސައިބީރިއާއިން ފުރައިގެން ރަޝިއާގެ ވެރިރަށް މޮސްކޯއަށް ދަތުރުކުރި ފްލައިޓްގައި އޭނާ ސައި ހިއްޕެވި ފަހުންނެވެ. ނަމަވެސް ފަހުން އެނގުނު ގޮތުގައި އެކަން ދިމާވީ އާޕޯޓްގައި ބޭނުންކުރެއްވި ފެން ފުޅިއަށް އަޅާފައި ހުރި ވިހައެއްގެ ސަބަބުންނެވެ.

އުމުރުން 44 އަހަރުގެ އެލެކްސީ ނަވަލްނީއަށް މަޝްހޫރުކަން ލިބިގެން ދިޔައ،ީ 2012 ވަނަ އަހަރު ރައީސް ވްލަޑީމިއާ ޕުޓިން ތިން ވަނަ ދައުރަކަށް ހޮވިވަޑައިގަތުމުން ބޭއްވި މުޒާހަރާތަކުގައި އޭނާ ދެއްވި ފޯރިގަދަ ތަގުރީރުތަކުގެ ސަބަބުންނެވެ