އެމް.އެމް.ޕީ.އާރު.ސީ. މެދުވެރިކޮށް ހިންގި ޚިޔާނާތާއި، ކޮރަޕްޝަނާއި މަނީ ލޯންޑަރިންގ ކުށާ ގުޅިފައިވާ ފައިސާގެ ތެރެއިން 100،000 (އެއްލައްކަ) ޑޮލަރު ލިބުނުކަމަށް ތުހުމަތު ކުރެވޭ، އެންޓި ކޮރަޕްޝަން ކޮމިޝަން (އޭސީސީ)ގެ އިންވެސްޓިގޭޝަން އޮފިސަރެއްގެ ގޮތުގައި މަސައްކަތްކުރި ޏ. ފުވައްމުލައް، ހޯދަޑު، މައުނާ، އަބްދުﷲ އާޒިމްގެ މައްޗަށް އުފުލާފައިވާ ހަތަރު ދައުވާގެ އަޑުއެހުންތައް އާދިއްތަ ދުވަހަށް ކްރިމިނަލް ކޯޓުގައި ތާވަލްކުރުމަށްފަހު ކެންސަލްކޮށްފިއެވެ.

އާޒިމްގެ މައްޗަށް އުފުލާފައިވާ، މަނީ ލޯންޑަރިންގ ކުށުގެ ދެ ދައުވާއާއި ރިޝްވަތު ހިފުމުގެ ކުށުގެ ދެ ދައުވާގެ އަޑުއެހުން ކްރިމިނަލް ކޯޓުގައި ތާވަލްކޮށްފައި ވަނީ އާދިއްތަ ދުވަހުގެ 09:00 އަށެެވެ. ނަމަވެސް ކްރިމިނަލް ކޯޓުން ބުނީ، އެ އަޑުއެހުންތައް ކެންސަލްކޮށްފައިވާ ކަމަށާއި އާދިއްތަ ދުވަހުގެ އަޑުއެހުންތައް ކެންސަލް ކުރަންޖެހުނީ، އާޒިމްގެ ގާނޫނީ ވަކީލު، އެހެން މައްސަލަތަކެއްގެ އަޑުއެހުންތަކަކަށް ކޯޓަށް ވަޑައިގެން އުޅުއްވަންޖެހިވަޑައިގަންނެވުމުގެ ސަބަބުން، އަޑުއެހުމަށް ވަޑައިގެންނެވުމަށް ދަތިތަކެއް ދިމާވެފައިވާތީ، އެހެންދުވަހަކަށް މި އަޑުއެހުންތައް ތާވަލްކޮށްދިނުމަށް އެދިވަޑައިގެން ކޯޓަށް ހުށަހަޅުއްވާފައިވާތީކަމަށެވެ.

އާޒިމްގެ މައްޗަށް ދަޢުވާކުރަން ކްރިމިނަލް ކޯޓަށް އެ މައްސަލަތައް ފޮނުވުމަށްފަހު، ޕްރޮސެކިއުޓަރ ޖެނެރަލް (ޕީޖީ)ގެ އޮފީހުން މިދިޔަ ޑިސެމްބަރު މަހުގެ 28 ވަނަ ދުވަހު ނެރެފައިވާ ނޫސްބަޔާނެއްގައި ބުނެފައިވަނީ، އޭ.ސީ.ސީ.ގެ އިންވެސްޓިގޭޝަން އޮފިސަރެއްގެ ގޮތުގައި މަސައްކަތްކުރި އާޒިމްއަށް އެމް.އެމް.ޕީ.އާރު.ސީ.ގެ ޚިޔާނާތުގެ ފައިސާގެ ތެރެއިން 100،000 ޑޮލަރު ލިބުނު މައްސަލަ ފުލުހުންގެ އިދާރާއިންނާއި އެސެޓް ރިކަވަރީ ކޮމިޝަން ގުޅިގެން ތަހުގީގު ކުރުމަށްފަހު، ޕީޖީގެ އޮފީހަށް ހުށަހެޅުމުން، އާޒިމްގެ މައްޗަށް ހަތަރު ދަޢުވާއެއް ކުރުމަށް މިދިޔަ ޑިސެމްބަރު މަހުގެ ހަވަނަ ދުވަހު ކްރިމިނަލް ކޯޓަށް ހުށަހަޅާފައިވާކަމަށެވެ.

އާޒިމްގެ މައްޗަށް އުފުލާފައިވާ ފުރަތަމަ ދަޢުވާއަކީ ރިޝްވަތު ހިފުމުގެ ކުށުގެ ދަޢުވާއެވެ. މި ދަޢުވާ އުފުލާފައި ވަނީ، 12 އޮކްޓޯބަރު 2011އިން 14 އޭޕްރީލް 2016އަށް އޭ.ސީ.ސީ.ގެ އިންވެސްޓިގޭޝަން އޮފިސަރެއްގެ މަގާމުގައި ހުރިއިރު، އެކޮމިޝަނުގައި އާޒިމް އިސްކޮށްހުރެ، ތަހުގީގުކުރަމުންދިޔަ އެމް.ޕީ.އެލް. އާއި އެމް.އެމް.ޕީ.އާރު.ސީ.އާ ދެމެދު ހިންގި ޑޮލަރުގެ މުޢާމަލާތާ ގުޅޭ ކޮރަޕްޝަން މައްސަލައާއި، ކުރީގެ ނާއިބު ރައީސް އަހުމަދު އަދީބާއި އެމް.އެމް.ޕީ.އާރު.ސީ.ގެ ކުރީގެ މެނޭޖިންގ ޑިރެކްޓަރ އަބްދުﷲ ޒިޔާތާއި އަދި އޭރުގެ ސަރުކާރުގެ އިސްފަރާތްތަކުގެ މަސްލަހަތު ހިމެނޭ މައްސަލަތަކުގެ ތަހުގީގު ކުރިއަށްދާގޮތް ހިއްސާކުރުމަށާއި، ކޮމިޝަނުގެ ސިއްރު މަޢުލޫމާތު ދިނުމަށާއި، ތަހުގީގު ވަކި ގޮތަކަށް އަނބުރާލުމުގެ މުޤާބިލުގައި އަދީބާއި ޒިޔާތު މެދުވެރިވެގެން، 50،000 ޑޮލަރުގެ ރިޝްވަތު ދިނުމަށްޓަކައި އެސް.އޯ.އެފް. ކުންފުނީގެ އެކައުންޓުން ދޫކުރި ޗެކް، ބޭންކް އޮފް މޯލްޑިވްސް (ބީ،އެމް،އެލް)ގައި ހުޅުވާފައިވާ އެކައުންޓަށް 2 ޖޫން 2015 ވަނަ ދުވަހު ޖަމާކޮށް ރިޝްވަތު ހިފާފައިވާތީއެވެ.

އާޒިމްގެ މައްޗަށް އުފުލާފައިވާ ދެވަނަ ދަޢުވާއަކީ، މަނީ ލޯންޑަރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ ދަށުން އުފުލާފައިވާ މަނީ ލޯންޑަރިންގގެ ކުށުގެ ދައުވާއެވެ. މި ދަޢުވާ އުފުލާފައިވަނީ ވެސް، 2 ޖޫން 2015 ވަނަ ދުވަހު އާޒިމްގެ އެކައުންޓަށް ޖަމާކޮށްފައިވާ 50،000 ޑޮލަރުގެ މުޢާމަލާތާ ގުޅިގެންނެވެ.

އާޒިމްގެ މައްޗަށް އުފުލާފައިވާ ތިންވަނަ އަދި ހަތަރުވަނަ ދަޢުވާއަކީ ވެސް ރިޝްވަތުހިފުމުގެ ކުށުގެ ދައުވާއަކާއި މަނީ ލޯންޑަރިންގގެ ކުށުގެ ދަޢުވާއެކެވެ. އެ ދެ ދަޢުވާ އޭނާގެ މައްޗަށް އުފުލާފައިވަނީ ވެސް، އޭރުގެ ސަރުކާރުގެ އިސްފަރާތްތަކުގެ މަސްލަހަތު ހިމެނޭ މައްސަލަތަކުގެ ތަހުގީގު ކުރިއަށްދާގޮތް ހިއްސާކުރުމަށާއި، ކޮމިޝަނުގެ ސިއްރު މަޢުލޫމާތު ދިނުމަށާއި، ތަހުގީގު ވަކި ގޮތަކަށް އަނބުރާލުމުގެ މުޤާބިލުގައި އަދީބާއި ޒިޔާތު މެދުވެރިވެގެން، އިތުރު 50،000 ޑޮލަރުގެ ރިޝްވަތު ދިނުމަށްޓަކައި އެސްއޯއެފް ކުންފުނީގެ އެކައުންޓުން ދޫކުރި ޗެކް ބީއެމްއެލްގައި ހުޅުވާފައިވާ އާޒިމްގެ އެކައުންޓަށް 15 ޖޫން 2015 ވަނަ ދުވަހު ޖަމާކޮށް ރިޝްވަތު ހިފާފައިވާތީއާއި އަދި އެފައިސާއިން އިތުރު މުޢާމަލާތްތަކެއް ހިންގާފައިވާތީއެވެ.

އާޒިމްގެ މައްޗަށް އުފުލާފައިވާ ރިޝްވަތުގެ ދެ ދަޢުވާއާ ގުޅިގެން އޭނާގެ އެކައުންޓަށް އެސް.އޯ.އެފް. ކުންފުނިން ދެ ފަހަރެއްގެ މަތިން ޖަމާކުރި 100،000 ޑޮލަރު، ދައުލަތަށް ނަގައިދިނުމަށް ވެސް އެ ދެ ދަޢުވާގައި އެދިފައިވެއެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި އެމް.އެމް.ޕީ.އާރު.ސީ.ގެ ބޮޑު ޚިޔާނާތުގެ ތަހުގީގު ވަކި ގޮތަކަށް އަނބުރައިލަން، އޭސީސީގެ އިންވެސްޓިގޭޓަރެއްގެ ގޮތުގައި ހުންނަވައިގެން 100،000 ޑޮލަރުގެ ރިޝްވަތު ނެގިކަމުގެ ދަޢުވާ އުފުލާފައިވަނިކޮށް އާޒިމް ވަނީ އައިލެންޑް އޭވިއޭޝަން ސަރވިސް (އައި.އޭ.އެސް)ގެ ބޯޑު މެމްބަރު ކަމުން އިސްތިއުފާ ދެއްވާފައެވެ.