ރާއްޖޭގެ އެންމެ އުތުރަށް އޮންނަ 3 އަތޮޅުގައި ދަނޑުވެރިކަމުގެ ޚާއްޞަ ޕްރޮގްރާމެއް ހިންގަން ނިންމާފައިވާކަމަށް އެގްރޯނެޓުން ހާމަކޮށްފިއެވެ.

އެގްރޯ ނޭޝަނަލް ކޯޕަރޭޝަންގެ މެނޭޖިންގް ޑިރެކްޓަރ ހާރޫން ރަޝީދު ވަނީ އެކުންފުނިން ހއ. ހދ އަދި ށ އަތޮޅުގެ ރަށްރަށުގައި ދަނޑުވެރިކަމުގެ ޕްރޮގްރާމެއް ފެށުމަށް ހަމަޖެހިފައިވާކަމަށެވެ.

މި ޕްރޮގްރާމްގެ ދަށުން އެ އަތޮޅުތަކުގެ ރަށްރަށުގައި ކޮންޓްރެކްޓް ފާމިންގެ މަސައްކަތްތަކުގެ އިތުރުން ރިސަރޗުގެ މަސައްކަތްތައް ވެސް ހިމެނޭނެއެވެ. މި ޕްރޮގްރާމް އަވަސް މުސްތަޤުބަލެއްގައި ފެށުމަށް ތައްޔާރުވަމުންދާކަމަށް އެގްރޯނެޓުން ހާމަކުރެއެވެ. މި މަސައްކަތް ކުރިއަށްގެންދާނީ މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ގުޅިގެންނެވެ.

އެގްރޯނެޓަކީ، ދަނޑުވެރިކަން ތަރައްޤީކުރުމަށާއި ދަނޑުވެރިން އުފައްދާ ތަކެތި މާކެޓްކުރުމަށް ސަރުކާރުން އުފައްދަވާފައިވާ ކުންފުންޏެކެވެ.

ކޮވިޑް-19ގެ ތެރޭގައި އެގްރޯއިން މައިގަނޑު ގޮތެއްގައި މަސައްކަތް ކޮށްފައިވަނީ މާލެ ސަރަހައްދުގައި، ދަނޑުވެރިން އުފައްދާ ތަކެތި މާކެޓްކުރުމުގެ މަސައްކަތްތަކުގައެވެ. ނަމަވެސް މަޑުމަޑުން ކޮވިޑް-19 ގެ ހާލަތު ރަނގަޅުވަމުން ގޮސްފައިވާތީ، މިހާރު އެގްރޯ ކުންފުނީގެ މަސައްކަތްތައް ދަނީ ފުޅާކުރަމުންނެވެ.

އެގޮތުން ރަށްރަށުގައި ދަނޑުވެރިންނާއެކު މަޝްވަރާ ކުރެވި، ހޮވާލެވިފައިވާ 80 ރަށުގައި ކޮންޓްރެކްޓް ފާރމިންގގެ އުސޫލްތައް ކަނޑައަޅާފައިވާ ގޮތާއި، އޭގެ މަޢުލޫމާތުތައް އެ ކުންފުނިން ދެމުންގެންދާ ކަމަށް މިނިސްޓްރީއިން ވިދާޅުވިއެވެ.

ކޮންޓްރެކްޓް ފަރމިންގެ ފުރުޞަތު، އިތުރު 11 ރަށަކަށް މިހާރު ވަނީ ހުޅުވައިލާފައެވެ. މީގެ ކުރިން ކޮންޓްރެކްޓް ފަރމިންގެ ފުރަތަމަ ފިޔަވަހީގެ ދަށުން މި ފުރުސަތު ހުޅުވައިލާފައިވަނީ ލ އަތޮޅަށް އެކަންޏެވެ. އެގޮތުން އެ ފަހަރު އެގްރޯނެޓްއިން އެއްބަސްވުންތަކުގައި ސޮއިކޮށްފައިވަނީ ލ. ގަން، އިސްދޫ، ކަލައިދޫ، އަދި ފޮނަދޫގެ ދަނޑުވެރިންނާއެކުގައެވެ. .

އަލަށް ކޮންޓްރެކްޓް ފާރމިންގެ ފުރުޞަތު ހުޅުވާލިކަން ހާމަކޮށް އެގްރޯނެޓް ކުންފުނިން ކުރި ޓްވީޓެއްގައި ވަނީ މިފަހަރު ފުރުސަތު ހުޅުވާލާފައިވަނީ ފ.މަގޫދޫ، ށ. ގޮއިދޫ، ށ. ނަރުދޫ، ބ. މާޅޮސް، ރ. ވާދޫ، ރ. ފައިނު، ނ. މަނަދޫ، ގއ. ނިލަންދޫ. ގއ. ގެމަނަފުށި، ޏ.ފުވައްމުލަށް އަދި ސ. މީދޫގައެވެ.

މި މަޝްރޫޢު ފަށާފައިވަނީ ޔޫއެންޑީޕީގެ އެހީތެރިކަމާ އެކުގައެވެ. މިއީ ސަރުކާރުން އިމްޕޯޓަށް ބަރޯސާވުން ކުޑަކުރުމަށް ކުރިއަށްގެންދާ މަޝްރޫޢުއެއް ކަމަށް އެގްރޯ ނޭޝަނަލް ކޯޕަރޭޝަން (އެގްރޯނެޓް) އިން މަޢުލޫމާތުދެއެވެ.

އެގްރޯނެޓްގެ މަޝްރޫޢުގެ ދަށުން ދަނޑުވެރިންނާއެކު ހެދޭ އެއްބަސްވުމުގެ ދަށުން އުފައްދާ ބާވާތްތައް އެކުންފުނިން ގަންނާނެއެވެ. މީގެ ސަބަބުން ދަނޑުވެރިންނަށް އެމީހުންގެ އުފެއްދުންތައް މާކެޓްކުރެވޭނެކަމުގެ ފުރިހަމަ ޔަޤީންކަން ލިބި، އުފެއްދުންތަކަށް ހަމަ އަގު ލިބިގެންދާނެއެވެ.