އީގަލްސް މިހާރު އޮތް ހާލުގައިވެސް މާޒިޔާއަށް ދުލެއް ނުދޭނެ: ނިމާ

ކުލަބު އީގަލްސް މިހާރު އޮތް ހާލުގައިވެސް އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ދޫ ނުދޭނެ ކަމަށް އެ ޓީމުގެ އެސިސްޓަންޓް ކޯޗު އަޙްމަދު ނިމާދު (ނިމާ) ބުނެފިއެވެ.

ދާދި ފަހުން އީގަލްސްގެ ކޯޗުގެ މަގާމުން މުޙައްމަދު ޝިޔާޒް (މޯހަން) ވަނީ އިސްތިއުފާދީފައެވެ. އީގަލްސްގެ އެއްބަސްވުން މޯހަން އުވާލިއިރު، މި ސީޒަނުގައި އެ ޓީމުގެ ކުޅުން ވަނީ ވަރަށް ބޮޑަށް ދަށްވެފައެވެ. އެގޮތުން ދިރާގު ދިވެހި ޕްރިމިއާ ލީގުގައި މިހާތަނަށް އީގަލްސް ކުޅުނު ހަ މެޗުގެ ތެރެއިން އެ ޓީމަށް މޮޅުވެވުނީ އެންމެ މެޗަކުންނެވެ. އަދި ހަތަރު މެޗުން ބަލިވިއިރު، އަނެއް މެޗު ނިމުނީ އެއްވަރުވެގެންނެވެ. އެއާއެކު އީގަލްސް އޮތީ ތާވަލުގެ ފުލުން ދެވަނައިގައި ހަތަރު ޕޮއިންޓާއެކުއެވެ.

ލީގުގައި ހުކުރު ދުވަހުގެރޭ މާޒިޔާއާ ދެކޮޅަށް ނުކުތުމުގެ ކުރިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ނިމާ ބުނީ އީގަލްސް މި ވަގުތު އޮތީ ހުރިހާ ގޮތަކުންވެސް ވަރަށް ދަތި ހާލުގައި ކަމަށާއި، އެގޮތުން އަނިޔާގެ ގިނަ މައްސަލަތަކެއް ޓީމުގައި ހުރުމުގެ އިތުރުން، ހެޑް ކޯޗެއް ނެތުންވެސް ހިމެނޭ ކަމަށެވެ. އެހެންނަމަވެސް މާޒިޔާ މެޗަށް އީގަލްސް ނުކުންނައިރު، އެޓީމަށް ދޫ ދިނުމުގެ ވިސްނުމެއް ނެތް ކަމަށްވެސް ނިމާ ބުންޏެވެ.

ނިމާ އިތުރަށް ބުނީ މިހާރު އަނިޔާގެ މައްސަލަ ބޮޑުވެފައިވުމުން، ތަޖުރިބާ މަދު ކުޅުންތެރިން ފުރަތަމަ އެގާރައިގައި ހިމަނައިގެން ކުޅެން މަޖުބޫރުވެފައިވާ ކަމަށެވެ. އެކަމަކު މި ސީޒަނުގެ އީގަލްސްގެ އަމާޒަކީ ކުރިއަށް އޮތް ހުރިހާ މެޗަކުން ތިން ޕޮއިންޓް ހޯދުން ކަމަށާއި، އީގަލްސްއިން ދެން ނުކުންނަނީ ތައްޓަށް އަމާޒު ހިފައިގެން ކަމަށްވެސް ނިމާ ބުންޏެވެ.

އީގަލްސްއާ ދެކޮޅަށް މާޒިޔާ ނުކުންނައިރު، އެ ޓީމު އޮތީ ތާވަލުގެ އެއްވަނައިގައި ކުޅުނު ހަ މެޗުން ލިބުނު 14 ޕޮއިންޓާއެކުއެވެ.

އީގަލްސް މެޗުގެ ކުރިން މާޒިޔާގެ ބިދޭސީ ކޯޗު ރިސްޓޯ ވިޑަކޮވިޗް ބުނީ އީގަލްސް އަކީ މާޒިޔާއަށް މޮޅުވާން އުނދަގޫ ޓީމެއް ކަމަށާއި، އީގަލްސްއާ ދެކޮޅަށް ނުކުންނައިރު އިތުރަށް ހިތްވަރުލައި، މެޗުން މޮޅުވާން މަސައްކަތްކުރާނެ ކަމަށެވެ. އަދި އީގަލްސްއާ ދެކޮޅަށް ނުކުންނައިރު އެ ޓީމު އޮތް ހާލަތަށް ވިސްނައިގެން ނުތިބެވޭނެ ކަމަށާއި، މި މެޗަކީ މާޒިޔާއިން ލީގުގައި ކުރިން ކުޅުނު މެޗުތަކަށްވުރެ އުނދަގޫ މެޗެއް ކަމަށްވެސް ވިޑަކޮވިޗް ބުންޏެވެ. އަދި އީގަލްސްއަކީ ޓީމެއްގެ ގޮތުގައި މޮޅަށް ކުޅޭ ޓީމެއް ކަމަށް އޭނާ ވަނީ ބުނެފައެވެ.

ދިރާގު ދިވެހި ޕްރިމިއާ ލީގުގައި މާޒިޔާ އާއި އީގަލްސް ބައްދަލުކުރާ މެޗު ފަށާނީ ހުކުރު ދުވަހުގެރޭ 21:00 ގައެވެ.