ޔޫ.އެން.ޑަބްލިއު.ޓީ.އޯ ގެ އޭޝިއާ އެންޑް ޕެސިފިކްގެ ރީޖަނަލް ޑިރެކްޓަރ އާއި ޓޫރިޒަމް މިނިސްޓަރ ބައްދަލު ކުރައްވައިފި
ފަތުރުވެރިކަމުގެ ތެރެއިން އަންހެނުން ބާރުވެރި ކުރުވުމަށް ވެސް މަޝްވަރާ ކޮށްފައިވޭ
ޑރ. ޢަބުދުﷲ މައުޞޫމްއާއި ޔޫ.އެން.ޑަބުލިއު.ޓީ.އޯ ގެ އޭޝިއާ އެންޑް ޕެސިފިކްގެ ރީޖަނަލް ޑިރެކްޓަރ ހެރީ ހޮންގް
ދިވެހިރާއްޖޭގެ ފަތުރުވެރިކަން ތަރައްޤީކޮށް ކުރިއެރުވުމުގައި ޔޫ.އެން.ޑަބްލިއު.ޓީ.އޯ އާއި ގުޅިގެން ކުރެވިދާނެ ކަންތަކާއި ބެހޭގޮތުން ދިވެހިރާއްޖެއިން މަޝްވަރާ ކޮށްފިއެވެ.
މި މަޝްވަރާތައް ކުރިއަށް ގެންގޮސްފައިވަނީ ޑރ. ޢަބުދުﷲ މައުޞޫމްއާއި ޔޫ.އެން.ޑަބްލިއު.ޓީ.އޯ ގެ އޭޝިއާ އެންޑް ޕެސިފިކްގެ ރީޖަނަލް ޑިރެކްޓަރ ހެރީ ހޮންގް އާއި ދެމެދު ބޭއްވި ބައްދަލުވުމެއްގައެވެ.
ޔޫ.އެން.ޑަބުލިއު.ޓީ.އޯގެ އެގްޒެކެޓިވް ކައުންސިލްގެ 113 ވަނަ ބައްދަލުވުމުގައި ބައިވެރިވުމަށް މިނިސްޓަރ ޑރ. މަޢުޞޫމް ސްޕެއިންގެ މެޑްރިޑަށް ކުރައްވާ ދަތުރާއި ގުޅުވައިގެން ބޭއްވި މި ބައްދަލުވުމުގައި ޔޫ.އެން.ޑަބްލިއު.ޓީ.އޯގެ ރީޖަނަލް ޑިޕާރޓްމަންޓް ފޯރ އޭޝިއާ އެންޑް ޕެސިފިކްގެ ސީނިއަރ ޕްރޮޖެކްޓް ސްޕެޝަލިސްޓް މިސްޓަރ ލީ ޔަންގް އާއި ޓޫރިޒަމް މިނިސްޓްރީގެ އެގްޒެކެޓިވް ޑިރެކްޓަރ ފަޟީލާ ޢަލީ ބައިވެރިވެވަޑައިގެންނެވިއެވެ.
މި ބައްދަލުވުމުގައި މަޝްވަރާ ކުރެވުނު ކަންތައްތަކުގެ ތެރޭގައި މިއަހަރު ޝްރީލަންކާގައި ބޭއްވުމަށް ހަމަޖެހިފައިވާ، ދިވެހިރާއްޖެއިން ޗެއަރކުރާ ޔޫ.އެން.ޑަބުލިއު.ޓީ.އޯގެ ރީޖަނަލް ކޮމިޝަން ފޯރ ސައުތު އޭޝިއާގެ ބައްދަލުވުމާއި ގުޅުވައިގެން ރާއްޖޭގައި އިވެންޓެއް ބޭއްވުމާއި، ފަތުރުވެރިކަމުގެ ތެރެއިން އަންހެނުން ބާރުވެރި ކުރުވުމާއި، ފަތުރުވެރިކަމުގެ ލާބައާއި މަންފާ ސީދާ ރައްޔިތުންނަށް އިތުރަށް ލިބޭނެ ގޮތްތައް ދެނެގަނެ ޙައްލު ހޯދުމުގައި އެ ޖަމްޢިއްޔާއިން ވެވިދާނެ އެހީ ހިމެނެއެވެ.
ބައްދަލުވުމުގައި ރާއްޖޭގެ ފަތުރުވެރިކަމުގެ ރަންޔޫބީލް ފާހަގަ ކުރުމުގެ ގޮތުން 2022 ވަނަ އަހަރު ހިންގުމަށް ރާވަމުންގެންދާ ޙަރަކާތްތަކުގައި ޔޫ.އެން.ޑަބްލިއު.ޓީ.އޯގެ ބައިވެރިވުމާއި އެއްބާރުލުން ހޯދުމުގެ މަޝްވަރާތައްވެސް ކުރެވުނެވެ.
