އަމިއްލައަށް ނަން ހުށަހެޅުމުން ދޭ އޭޝިއާ އެޗްއާރްޑީ އެވޯޑް މިއަހަރު ރައީސް ޔާމީނަށް

އަމިއްލައަށް ނަން ހުށަހަޅާ ފަރާތްތަކަށް 2003 ވަނަ އަހަރުން ފެށިގެން ދެމުންއަންނަ އޭޝިއާ އެޗް.އާރު.ޑީ އެވޯޑްގެ ލައިފްޓައިމް އެޗީވްމަންޓް އެވޯޑް މިއަހަރު ރައްޖޭގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމަށް ލިބިވަޑައިގެންފިއެވެ.

ރައީސް ޔާމީންގެ ފަރާތްޕުޅުން މި އެވޯޑާއި ހަވާލުވެވަޑައިގެންނެވީ، ރާއްޖެއިން މެލޭޝިއާއަށް ކަނޑައަޅުއްވާފައިވާ ހުންނަވާ ސަފީރު މުޙައްމަދު ފަހުމީ ޙަސަންއެވެ.

އެވޯޑް ލިބިލެއްވުމާއި ގުޅިގެން، ވީޑިއޯ މެސެޖެއް މެދުވެރިކުރައްވާ ރައީސް ޔާމީން ވިދާޅުވީ، އެމަނިކުފާނަށް މިފަދަ އެވޯޑެއް ލިބިވަޑައިގަތުމުން، ބައިނަލްއަޤުވާމީ މައިދާނުގައި ރާއްޖެ ފަދަ ކުޑަ ޤައުމުތަކުން ކުރާ މަސައްކަތްވެސް ބަލައިގަންނަކަން ފާހަގަވެގެން ގޮސްފި ކަމަށެވެ.

މި އަހަރުގެ ޖޫން މަހުގެ 30 ވަނަ ދުވަހާއި ހަމައަށް ހުޅުވާލި ފުރުޞަތުގައި އެވޯޑަށް ކުރިމަތިލި ފަރާތްތަކުގެ ތެރެއިން، ރައީސް ޔާމީނަށް މި އެވޯޑް ލިބިލައްވާފައިވާއިރު، އެމަނިކުފާނު ވިދާޅުވީ، މިއީ ދިވެހި ހުރިހާ ރައްޔިތުންނަށް ލިބުނު އެވޯޑެއްކަމަށް ދެކިލައްވާ ކަމަށެވެ.

އޭޝިއާ އެޗްއާރްޑީ އެވޯޑްސްގެ ވެބްސައިޓްގައި ބުނެފައިވާ ގޮތުން މި އެވޯޑަކީ އެވޯޑަށް ކުރިމަތިލާ ފަރާތްތަކުގެ ތެރެއިން ޝަރުތު ހަމަވާ، ވީހާވެސް ގިނަ ފަރާތްތަކަކަށް ދޭ އެވޯޑެކެވެ. އަދި އެވޯޑަށް އެދި ހުށަހެޅުމުން، އެފަރާތެއްގެ ކިބައިގައި އޭޝިއާ އެޗްއާރްޑީ އެވޯޑްސްގެ ޝަރުތުތައް ހަމަވޭތޯ ބަލަނީ އެކަމަށް ޚާއްސަކޮށްފައިވާ ކޮމިޓީއަކުންނެވެ. މި ކޮމިޓީގެ ޗެއަރމަނަކީ ބަހްރެއިންގެ ކުރީގެ ވަޒީރެއް ކަމަށްވާ ފަހުމީ ބިން އަލީ އަލް ޖޯދާއެވެ.

އޭޝިއާ އެޗްއާރްޑީ އެވޯޑްސް އަކީ ހިއުމަން ރިސޯސް ޑިވެލޮޕްމަންޓްގެ ދާއިރާއިން ފާހަގަކުރެވޭ މަސައްކަތްތައް ކުރާ ފަރާތްތަކަށް ދެމުންދާ އެވޯޑެކެވެ.