ފިޝަރީޒް އެންޑް އެގްރިކަލްޗަރަލް ޑައިވަރސިފިކޭޝަން ޕްރޮގްރާމްގެ މުއްދަތު އިތުރުކޮށްފި

ފިޝަރީޒް އެންޑް އެގްރިކަލްޗަރަލް ޑައިވަރސިފިކޭޝަން ޕްރޮގްރާމްގެ މުއްދަތު އިތުރުކޮށްފިއެވެ.

މިނިސްޓްރީ އޮފް ޕިޝަރީޒް އެންޑް އެގްރިކަލްޗަރގެ ފަރާތުން ބުރާސްފަތި ދުވަހު ނެރުނު ނޫސްބަޔާނެއްގައި ބުނެފައި ވަނީ މަސްވެރިކަމައީ ދަނޑުވެރިކަމަކީ ޒުވާނުން ޝައުޤުވެރިވާ ސިނާއަތަކަށް ހެދުމަށްޓަކައި ސަރުކާރުން ކަނޑައަޅާފައިވާ އަމާޒު ހާސިލްކުރުމަށްޓަކައި މަސްވެރިކަމައީ ދަނޑުވެރިކަމުގެ ބާވަތްތައް މާކެޓްކޮށް އާ ވިޔަފާރީގެ ފުރުސަތުތައް ކޯޕަރޭޓިވް ސޮސައިޓީތައް މެދުވެރިކޮށް ރައްޔިތުންނަށް ފޯރުކޮށްދީ، މިކަމަށް ޒުވާނުން އަހުލުވެރިކުރުމުގެ ގޮތުން ޕިޝަރީޒް މިނިސްޓްރީން ކުރިއަށްގެންދާ ފިޝަރީޒް އެންޑް އެގްރިކަލްޗަރަލް ޑައިވަރސިފިކޭޝަން ޕްރޮގްރާމްގެ މުއްދަތު މާރޗް 2018 އާ ހަމައަށް އިންޓަނޭޝަންލް ފަންޑް ފޯރ އެގްރިކަލްޗަރަލް ޑިވެލޮޕްމަންޓްގެ ފަރާތުން އިތުރުކޮށްފައިވާ ކަމަށެވެ.

މި ޕްރޮގްރާމްއާ ގުޅިގެން މަސައްކަތްކުރަމުންދާ ކޯޕަރޭޓިވް ސޮސައިޓީތަކަށް މިހާތަނަށް 25,709,519.00 (ފަންސަވީސް މިލިއަން ހަތްލައްކަ ނުވަހާސް ފައްސަތޭކަ ނަވާރަ) ރުފިޔާ އެހީއެއްގެ ގޮތުގައި ޙަރަދުކޮށްފައިވާ ކަމަށާއި ކޯޕަރޭޓިވް ސޮސައިޓީތަކުގެ ވިޔަފާރިތައް ތަންފީޒުކުރުމަށް ބޭނުންވާ އިމާރާތާއި މެޝިނަރީ، ޕެކިން މެޓީރިއަލްސް، ގްރީން ހައުސް އަދި ރިކަރަންޓްގެ ޚަރަދުތަކަށް ވެސް އެހީތެރިކަން ފޯރުކޮށްދީފައިވާ ކަމަށް ނޫސްބަޔާނުގައިވެއެވެ.

މަސްވެރިކަމާއި ދަނޑުވެރިކަމުގައި ހަރަކާތްތެރިވަމުންދާ ކޯޕަރޭޓިވް ސޮސައިޓީތަކުގެ އުފެއްދުންތައް އިތުރުކޮށް، މަސްވެރިކަމާއި ދަނޑުވެރިކަމުގެ ބާވަތްތަކުން ތަކެތި އުފައްދައި (ވެލިއު އެޑިޝަން) އިތުރުކުރުމުގެ މަޤްސަދުގައި 2016 ވަނަ އަހަރު ފަޑިޕް ޕްރޮގްރާމުން 48 ފަރާތަކަށް ޖުމްލަ 6،900،000 ރުފިޔާ ލޯނުގެ ގޮތުގައި ވެސް ވަނީ ދީފައެވެ.

މި ޕްރޮގްރާމްގެދަށުން މަސައްކަތްކުރަމުންދާ އަށް ކޯޕަރޭޓިވް ސޮސައިޓީން މިހާތަނަށް 30 އަށްވުރެ ގިނަ އުފެއްދުންތައް މާކެޓްއަށް ނެރިފައިވާ ކަމަށާއި އަދި މި އުފެއްދުންތައް މާލެ، ހުޅުމާލެ، އެއަރޕޯޓް، ޑިއުޓީފްރީ އަދި އެކި ރިސޯޓުތަކުން ލިބެން ހުންނާނެ ކަމަށް ޕިޝަރީޒް މިނިސްޓްރީގެ ނޫސްބަޔާނުގައި ވެއެވެ.