ނުޤަވާއިދުން ފުލުހުންގެ ސައިކަލު ޕާރކް ކުރީ މީހެއްގެ ގައިގައި ރޯވިކަމުގެ ރިޕޯޓަކަށް އެޓެންޑްވާން
20 ޖެނުއަރީ 2021 | ބުދަ 13:13އެދުރު ހިޔާގެ ފްލެޓެއްގައި މީހެއްގެ ގައިގައި އަލިފާން ރޯވިކަމުގެ ރިޕޯޓް ލިބުނު
މީސްމީޑިއާގައި ދައުރުވަމުންދާ ފޮޓޯ - ގިނަ ބަޔަކު ވަނީ ފުލުހުންނަށް ފާޑުކިޔާފައި
ނުޤަވާއިދުން ފުލުހުންގެ ސައިކަލު ޕާރކް ކޮށްފައިވާ މަންޒަރު ދައްކުވައިދޭ ފޮޓޯގެ ޙަޤީޤަތް ފުލުހުން ހާމަ ކޮށްފިއެވެ.
މީސްމީޑިއާގައި ދައުރުވަމުންދާ މި ފޮޓޯގައި ފެންނަނީ ކަފިހި ހުރަހެއްގައި ފުލުހުންގެ ސައިކަލެއް ނުޤަވާއިދުން ޕާރކް ކޮށްފައިވާ މަންޒަރެވެ. އެ ފޮޓޯ މީސްމީޑިއާގައި ވައިރަލްވުމާއެކު، ގިނަ ބަޔަކު ވަނީ ފުުލުހުންނަށް ނުރުހުން ފާޅު ކޮށްފައެވެ. ޚާއްސަ ގޮތެއްގައި ނުޤަވާއިދުން ޕާރކް ކޮށްފައި ހުންނަ ވެހިކަލްތަކުގައި ސްޓިކަރ ޖަހާއިރު، ފުލުހުންގެ ވެހިކަލްއެއް ނުޤަވާއިދުން ޕާރކް ކޮށްފައިވާތީ ގިނަ ބަޔަކު ވަނީ އެކަމުގެ ޝަކުވާ ކޮށްފައެވެ.
މި ފޮޓޯގެ ޙަޤީޤަތް ހިއްސާކޮށް ފުލުހުން ކުރި ޓްވީޓެއްގައި ބުނީ، މި ފޮޓޯއަކީ ޖެނުއަރީ 14 ވަނަ ދުވަހު އެދުރު ހިޔާގެ ފްލެޓެއްގައި މީހެއްގެ ގައިގައި އަލިފާން ރޯވިކަމަށް ފުލުހުންނަށް ލިބުނު މަޢުލޫމާތަކާ ގުޅިގެން ހާދިސާ ހިނގިތަނަށް ފުރަތަމަ ދިޔަ ފުލުހުން އިމަރޖެންސީ ހާލަތެއްގައި ސައިކަލް ޕާރކްކޮށްފައިވާ މަންޒަރު ފެންނަ ފޮޓޯއެއް ކަމަށެވެ.
ފުލުހުން ބުނީ، އެ ހާދިސާގައި މީހާގެ ހެދުމުގައި އަލިފާން ހިފިނަމަވެސް ހަށިގަނޑަށް ގެއްލުމެއް ނުލިބޭކަމަށެވެ. އަދި ރައްޔިތުންނަށް ދިމާވާ ކޮންމެ ބޮޑުކަމެއްގައި އެންމެ ފުރަތަމަ އެންމެ ގާތުން އެހީތެރިކަން ފޯރުކޮށްދިނުމަކީ އެންމެ އިސް ވާޖިބުކަމުގައި އަބަދުވެސް ދެކޭ ކަމަށެވެ.
