އިންޑިއާއިން ދިން އެހީއަކީ ދެ ޤައުމުގެ ދެމެދުގައިވާ ގުޅުމުގެ ވަރުގަދަ ރަމްޒެއް: މިނިސްޓަރ ޝާހިދު

އިންޑިއާއިން ރާއްޖެއަށް ވަމުންގެންދާ އެހީތެރިކަމަކީ ދެ ޤައުމުގެ ދެމެދުގައިވާ ގުޅުމުގެ ވަރުގަދަ ރަމްޒެއް ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

އިންޑިއާއިން ރާއްޖެއަށް ފޯރުކޮށްދޭ ވެކްސިން ހަވާލު ކުރުމަށް ބުދަ ދުވަހު ވެލާނާ އިންޓަރނޭޝަނަލް އެއަރޕޯޓުގައި ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ، ކޮވިޑުގެ ބަލިމަޑުކަމުގެ ތެރޭގައި ވޭތުވެދިޔަ 10 ވަރަކަށް މަސް ދިވެހިން ހޭދަކޮށްފައިވަނީ ނުހަނު ހިތްދަތިކަމާއެކު ކަމަށެވެ. މިނިސްޓަރ ވަނީ ރާއްޖޭގައި ކޮވިޑާ ގުޅިގެން އަޅާފައިވާ ފިޔަވަޅުތައް ފާހަގަ ކުރައްވައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ މޭސްތިރިކަމުގެ ދަށުން ކުރައްވާފައިވާ މަސައްކަތްތަކަށް އަލިއަޅުވާލައްވާފައެވެ.

މިނިސްޓަރ ވިދާޅުވީ، އިންޑިއާއިން ވެކްސިން ދޭން ފެށިތާ ހަތަރު ދުވަސް ތެރޭގައި އިންޑިއާއިން އަވައްޓެރި ޤައުމުތަކަށް ވެކްސިން ފޯރުކޮށްދޭން ފެށުމުން ކަމަށެވެ.

އިނގިރޭސި ބަހުންނާއި، ހިންދޫ ބަހުން އިންޑިއާއަށް ޝުކުރުދަންނަވައި މިނިސްޓަރ ވަނީ އެކި މުނާސަބާތަކުގައި އިންޑިއާއިން ދިވެހިންނަށް ވެދީފައިވާ އެހީތެރިކަން ފާހަގަކުރައްވައި ޝުކުރުއަދާކުރައްވާފައެވެ. އަދި މިއީ ދެ ޤައުމުގެ ދެމެދުގައި އޮތް ވަރުގަދަ ގުޅުމުގެ ރަމްޒެއް ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، މިއީ ތިން ލެވެލްގެ ޓްރަޔަލްތައްވެސް ނިންމާފައިވާ ރައްކާތެރި ވެކްސިނެއް ކަމަށެވެ. އެގޮތުން މި ވެކްސިން އުފައްދާފައިވާ ސިރަމް އިންސްޓިޓިއުޓަކީ ވެކްސިން އުފެއްދުމުގައި ނަން މަޝްހޫރު ކުންފުންޏެއްކަން ފާހަގަކުރައްވައި މިނިސްޓަރ ވިދާޅުވީ، ކޮންމެ އަހަރަކުވެސް 1.5 ބިލިޔަނަށްވުރެ ގިނަ ވެކްސިން ޑޯޒުތައް ސިރަމް އިންސްޓިޓިއުޓުން އުފައްދާ ކަމަށެވެ.