އައިޖީއެމްއެޗްގެ މެޑިކަލް އިންޓަރންޝިޕަށް ކުރިމަތިލުމުގެ ފުރުސަތު ހުޅުވާލައިިފި
17 ޖެނުއަރީ 2021 | އާދީއްތަ 06:06މިފަހަރުގެ އިންޓަރންޝިޕް ފަށަނީ 17 މާރޗްގައި
އައިޖީއެމްއެޗްގައި އޮޕަރޭޝަން އެއް ކުރިއަށް ދަނީ
އައިޖީއެމްއެޗްގެ މެޑިކަލް އިންޓަރންޝިޕަށް ކުރިމަތިލުމުގެ ފުރުސަތު ހުޅުވާލައިިފިއެވެ.
17 މާރޗް 2021ގައި ފެށުމަށް ހަމަޖެހިފައިވާ މިއަހަރުގެ އިންޓަރނޝިޕް ޕްރޮގްރާމްއަށް ފެބްރުއަރީ 28 ވަނަ ދުވަހުގެ ދަންވަރު 12:00 ގެ ކުރިން ކުރިމަތިލުމަށް މިހާރު ވަނީ ފުރުސަތު ހުޅުވާލައިފައެވެ. މިފަހަރުގެ ބެޗަށް ނެގުމަށް ހަމަޖެހިފައިވަނީ 20 ދަރިވަރުންކަމަށް އައިޖީއެމްއެޗުން މަޢުލޫމާތުދެއެވެ.
އައިޖީއެމްއެޗްގެ މެޑިކަލް އިންޓަރންޝިޕަށް ކުރިމަތިލުމުގެ ފުރުސަތު މިހާރު ހުޅުވާލައިފައިވާއިރު، މި އިންޓަރންޝިޕަށް ކުރިމަތިލާ ދަރިވަރުން އެ ދަރިވަރެއްގެ އެމްބީބީއެސް ސެޓްފިކެޓާއި، މޯލްޑިވްސް މެޑިކަލް އެންޑް ޑެންޓަލް ކައުންސިލުންދޭ ސެޓިފިކެޓް އޮފް ޕްރޮވިޝަނަލް މެޑިކަލް ރެޖިސްޓްރޭޝަންގެ އެޓެސްޓްކޮށްފައިވާ ކޮޕީއާއި އިޢުލާންގައިވާ އެހެނިހެން ލިޔެކިޔުންތައް ހަމަކުރުމަށް ފަހު މެޑިކަލް އިންޓާންޝިޕްއަށް އެދި ހުށަހަޅާ އެޕްލިކޭޝަން އީމެއިލްކުރުމަށް ވަނީ އެދިފައެވެ.
މި އިންޓާންޝިޕަށް އެދޭ ފޯމް މެޑިކަލް އިންޓާންޝިޕް ވެބްސައިޓުންނާއި، އައިޖީއެމްއެޗްގެ އެޑްމިން ބްލޮކްގައި ހުންނަ މެޑިކަލް އިންޓަރންޝިޕް ސެކްރެޓޭރިއެޓް އޮފީހުން، ސަރުކާރު ބަންދު ނޫން ކޮންމެ ދުވަހެއްގެ ހެނދުނު 9 ން މެންދުރު 12އާ ހަމައަށް ލިބެން ހުންނާނެއެވެ.
މި އިންޓާންޝިޕްއަށް ކުދިން ހޮވާނީ ޝަރުތުހަމަވާނަމަ އެޕްލިކޭޝަން ހުށަހަޅާ ތަރުތީބުންކަމަށް އައިޖީއެމްއެޗުން މަޢުލޫމާތުދެއެވެ.
ޑޮކްޓަރުކަން ކިޔަވާ ދަރިވަރުން އަމަލީ މަސައްކަތުގެ ތަޖުރިބާ ހޯދުމަށް ފުރިހަމަ ކުރަންޖެހޭ މެޑިކަލް އިންޓާންޝިޕް ޕްރޮގްރާމް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ފަށާފައިވަނީ 2018 ވަނަ އަހަރުއެވެ. މިފަހަރު މިހުޅުވައިލީ، އައިޖީއެމްއެޗް މެޑިކަލް އިންޓަރންޝިޕްގެ 5 ވަނަ ބެޗަށް ކުދިން ހޮވުމުގެ ފުރުސަތަށް ކަމަށް އައިޖީއެމް ހޮސްޕިޓަލުން މަޢުލޫމާތުދެއެވެ.
