ސިންތެޓިކް ޓްރެކުގައި ބައިނަލްއަގުވާމީ މުބާރާތެއް ބޭއްވޭނެ: މަޙްލޫފް
17 ޖެނުއަރީ 2021 | އާދީއްތަ 05:24ރާއްޖޭގައި ބައިނަލްއަގުވާމީ ކުޅިވަރު މުބާރާތްތައް ބޭއްވުމަކީ ރައީސް ޞާލިޙުގެ ރިޔާސީ ވައުދުފުޅެއް
އެކުވެނި ސިންތެޓިކް ޓްރެކް ހުޅުވުމަށް ބޭއްވި ރަސްމިއްޔާތުގެ ތެރެއިން ކުޅިވަރާ ބެހޭ ވަޒީރު އަޙްމަދު މަޙްލޫފް
ފުރުސަތު ލިބުނުހާ އަވަހަކަށް އެކުވެނި ސިންތެޓިކް ޓްރެކުގައި ބައިނަލްއަގުވާމީ އެތުލެޓިކްސް މުބާރާތެއް ބޭއްވޭނެ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.
މާލޭ ހުޅަނގު ފަރާތު އެކުވެނި ދުވާ ޓްރެކުގައި ސިންތެޓިކް އެޅުމަށްފަހު ރަސްމީކޮށް ހުޅުވާފައިވަނީ ހޮނިހިރު ދުވަހުގެ ހަވީރުއެވެ. އާރްކޭއެލް ކުންފުނީގެ ސީއެސްއާރް މަޝްރޫއުގެ ދަށުން ޓްރެކުގައި ކޮންކްރީޓް އެޅިއިރު، ސިންތެޓިކް އެޅުމަށް އިންޑިއާ ސަރުކާރުން ވަނީ މާލީ ގޮތުން އެހީތެރިވެދީފައެވެ.
ސިންތެޓިކް ޓްރެކް ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވީ މިއީ ދިވެހި ކުޅިވަރު ކުރިއެރުވުމަށް ރައީސް ޞާލިޙް ކުރައްވަމުން ގެންދަވާ މަސައްކަތަށް ވަރަށް މުހިންމު ބޮޅެއް އިތުރުވެގެންދިޔަ ދުވަހެއް ކަމަށެވެ. އެގޮތުން ސިންތެޓިކް ޓްރެކަކީ ކުޅިވަރުގެ އާއިލާއަށާއި، ހާއްސަކޮށް އެތުލެޓިކްސްއަށް ވަރަށް ބޮޑަށް ފައިދާކުރާނެ ޓްރެކެއް ކަމަށްވެސް ވިދާޅުވިއެވެ.
މަޙްލޫފް އިތުރަށް ވިދާޅުވީ ސިންތެޓިކް ޓްރެކް ތަރައްގީކުރެވުމާއެކު އެ ޓްރެކުގައި ބައިނަލްއަގުވާމީ މުބާރާތެއް ބޭއްވޭނެތޯ ރައީސް ތަކުރާރުކޮށް ސުވާލުކުރެއްވި ކަމަށާއި އެކަމަކު ކުރިން ވިސްނިފައި އޮތީ ބައިނަލްއަގުވާމީ ފެންވަރުގެ ޓްރެކެއް އޮތް ނަމަވެސް، އެ ތަނުގައި ބައެއް ވަސީލަތްތައް މަދުވުމުން މުބާރާތްތައް ނުބޭއްވޭނެ ކަމަށެވެ. އެކަމަކު ސިންތެޓިކް ޓްރެކުގައި ބައިނަލްއަގުވާމީ މުބާރާތްތައް ބޭއްވޭނެކަމުގެ ޔަގީންކަން އެތުލެޓިކްސް އެސޯސިއޭޝަނުން މިހާރު ދީފައިވާ ކަމަށާއި، އެހެންކަމުން ފުރުސަތު ލިބުނުހާ އަވަހަކަށް އެ ތަނުގައި ބައިނަލްއަގުވާމީ އެތުލެޓިކްސް މުބާރާތެއް ބާއްވާނެ ކަމަށްވެސް މަޙްލޫފް ވިދާޅުވިއެވެ.
ސިންތެޓިކް ޓްރެކުގައި ބައިނަލްއަގުވާމީ މުބާރާތެއް ބާއްވާނެ ކަމަށް މަޙްލޫފް ވިދާޅުވިއިރު، ރާއްޖޭގައި ބައިނަލްއަގުވާމީ ކުޅިވަރު މުބާރާތްތައް ބޭއްވުމަކީ ރައީސް ޞާލިޙުގެ ރިޔާސީ ވައުދުފުޅެކެވެ. އެގޮތުން މީގެ ކުރިން ރާއްޖެއިން ގިނަ މުބާރާތްތަކެއް ހޯސްޓް ކުރުމުގެ ބިޑް ކާމިޔާބުކުރި ނަމަވެސް، ކޮވިޑް-19 އާއެކު އެ މުބާރާތްތައް ވަނީ މި އަހަރަށް ފަސްކޮށްފައެވެ. އަދި ރާއްޖެއިން 2023 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ބޭއްވުމުގެ ތާރީޚީ ބިޑް ކާމިޔާބުކުރި ނަމަވެސް، ކޮވިޑާއެކު އެ ފުރުސަތު ރާއްޖެއަށް މިހާރު ވަނީ ގެއްލިފައެވެ.
