ޗައިނާގެ ހެބެއި ޕްރޮވިންސްގައި 1،500 ކޮޓަރީގެ އައިސޮލޭޝަން ސެންޓަރެއް ފަސް ދުވަހުން ހަދައި ނިންމާލައިފިއެވެ.

ރިޕޯޓްތައް ބުނާ ގޮތުން މިއީ މި ސެންޓަރުގެ ފުރަތަމަ ބެޗުގެ ކޮޓަރިތަކެވެ. އަދި މުޅި މި ޕްރޮޖެކްޓް ނިމޭއިރު 6،500 ކޮޓަރީގެ އައިސޮލޭޝަން ސެންޓަރުތައް ހެދުމަށް ވަނީ ނިންމާފައެވެ. ނަމަވެސް އެ ހުރިހާ ފެސިލިޓީއެއް ހުންނާނީ ހެބެއި ސިޓީގެ ހަ ސަރަހައްދެއްގައެވެ.

މި ފެސިލިޓީގައި އެނދާއި، އިލެކްޓްރިކް ހީޓަރާއި، ފާހާނާގެ އިތުރުން ކޮންމެ ކޮޓަރިއެއްގައި ވައިފައި ލިބެން ހުންނާނެ ކަމަށް ޗައިނާ ސަރުކާރުން ބުނެއެވެ.

އަދި ހޮނިހިރު ދުވަހު ކްލޯޒް ކޮންޓެކްޓްސް ގޮތުގައި ފާހަގަ ކުރެވުނު ފަރާތްތައް އާދީއްތަ ދުވަހުގެ ވަގުތެއްގައި މި ފެސިލިޓީއަށް ބަދަލު ކުރުމަށް ނިންމާފައިވާ ކަމަށް ޗައިނާ ސަރުކާރުން ބުނެއެވެ.

ޗައިނާގައި ކޮވިޑްގެ ކޭސްތައް އިތުރުވާން ފަށާފައިވާއިރު، މި ފެސިލިޓީގެ ފުރަތަމަ ޕްރޮޖެކްޓް ފަށާފައިވަނީ ޖެނުއަރީ މަހުގެ 10 ވަނަ ދުވަހުއެވެ.

މީގެ ކުރިން ޗައިނާގެ ވެރިރަށް ސިންޖިއާން ސިޓީގައި ވެސް ވަނީ މި ކޮންސެޕްޓަށް އައިސޮލޭޝަން ފެސިލިޓީއެއް ގާއިމުކޮށްފައެވެ.