ފުޓްބޯޅަ ކުޅުން ހުއްޓާލައި ރޫނީ ޑާބީގެ ކޯޗަކަށް

ފުޓްބޯޅަ ކުޅުން ހުއްޓާލުމަށްފަހު އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގައި ވާދަކުރަމުން އަންނަ ޑާބީ ކައުންޓީގެ ކޯޗުގެ މަގާމާ ރަސްމީކޮށް އިނގިރޭސި ތަރި ވޭން ރޫނީ ހަވާލުވެއްޖެއެވެ.

ޑާބީގެ ކޯޗުކަމުން މިދިޔަ ނޮވެމްބަރު މަހު ނެދަލެންޑްސްގެ ފިލިޕް ކޮކޫ ވަކިކުރުމާ ގުޅިގެން، ޕްލޭޔާ-ކޯޗުގެ އެއްބަސްވުމުގައި ހުރި ރޫނީ އެ ޓީމުގެ ކޯޗުުގެ ޒިންމާއާ ވަގުތީ ގޮތުން އެ މަހުގެ މެދުތެރޭގައި ހަވާލުވެފައެވެ. ރޫނީގެ އިރުޝާދުގެ ދަށުން އެ ޓީމުން ނުވަ މެޗެއް ކުޅެފައިވާއިރު، ތިން މެޗުން ވަނީ މޮޅުވެފައެވެ. އަދި ހަތަރު މެޗުން އެއްވަރުވިއިރު، ދެ މެޗުން ވަނީ ބަލިވެފައެވެ.

އެއާއެކު ހޮނިހިރު ދުވަހު ރޫނީ ވަނީ ފުޓްބޯޅަ ކުޅުން ރަސްމީކޮށް ހުއްޓާލިކަން ނިންމިކަން އިއުލާންކޮށް، ޑާބީގެ ކޯޗުގެ މަގާމާ ރަސްމީކޮށް ހަވާލުވެފައެވެ. ޑާބީން ނެރުނު ބަޔާނެއްގައި ބުނީ ރޫނީ އެ ކުލަބުގެ ކޯޗުގެ ވަޒީފާ ރަސްމީކޮށް އަދާކުރަން ނިންމުމަކީ އެ ކުލަބު ކުރިއަށްދާން، ކުރިއަށް އެޅުނު ފިޔަވަޅެއްގެ ގޮތުގައި ދެކޭ ކަމަށެވެ.

މެންޗެސްޓާ ޔުނައިޓެޑުގެ ކުރީގެ ކުޅުންތެރިޔާ ރޫނީ ޕްލޭޔާ-ކޯޗެއްގެ ގޮތުގައި ޑާބީއާ ގުޅުނީ މިދިޔަ އަހަރުގެ ޖެނުއަރީ މަހުއެވެ. އެވަޓަނުން 2002 ވަނަ އަހަރު ފުޓްބޯޅަ ކެރިއަރު ފެށި ރޫނީ ވިދާލީ 2004 ވަނަ އަހަރުން 2017 ވަނަ އަހަރަށް މެންޗެސްޓާ ޔުނައިޓެޑަށް ކުޅުނު ދުވަސްވަރެވެ. ޔުނައިޓެޑުގެ ތާރީޚުގައި އެ ޓީމަށް އެންމެ ގިނަ ލަނޑު ޖެހި ކުޅުންތެރިޔާގެ ރިކޯޑުވެސް އޮންނަ ރޫނީ ވަނީ ޔުނައިޓެޑާއެކު 16 މުބާރާތް ކާމިޔާބުކޮށްފައެވެ. އޭގެ ތެރޭގައި އިނގިރޭސި ޕްރިމިއާ ލީގު ފަސް ފަހަރު އަދި ޔުއެފާ ޗެމްޕިއަންސް ލީގު އެއް ފަހަރު ހިމެނެއެވެ.

ޔުނައިޓެޑް ދޫކޮށްލުމަށްފަހު ރޫނީ އަލުން އަނބުރާ ގުޅުނީ އޭނާ ފުޓްބޯޅަ ކެރިއަރު ފެށި އެވަޓަންއަށެވެ. އަދި އެވަޓަނުގައި ސީޒަނެއް ހޭދަކުރުމަށްފަހު ރޫނީ ވަނީ އެމެރިކާގެ މޭޖާ ލީގުގައި ވާދަކުރަމުން އަންނަ ޑީސީ ޔުނައިޓެޑަށްވެސް ކުޅެފައެވެ.

އަދި އިންގްލެންޑުގެ ގައުމީ ފުޓްބޯޅަ ޓީމަށް 120 މެޗު ކުޅެދީ 53 ލަނޑު ކާމިޔާބުކޮށްފައިވާ ރޫނީ އަކީ އިންގްލެންޑުގެ ތާރީޚުގައިވެސް އެ ގައުމަށް އެންމެ ގިނަ ލަނޑު ޖަހައިދިން ކުޅުންތެރިޔާއެވެ.