ހޯމަ 18 ޖެނުއަރީ 2021
13 އުތުރަހަޅަ
1442 ޖުމާދުލް އާހިރަތު 04
ފަތިސް 05:02
އިރުއަރާ 06:17
މެންދުރު 12:20
އަސްރު 15:40
އިރުއޮއްސޭ 18:15
އިޝާ 19:31
ނޭމާ އަނިޔާއިން ރަނގަޅުވުން

އަނިޔާއިން ރަނގަޅުވެ ނޭމާ ޕީއެސްޖީގެ ފަރިތަކުރުންތަކަށް

  • ނޭމާއަށް އަނިޔާވީ މިދިޔަ ޑިސެމްބަރު މަހު ލިޔޯން އަތުން ޕީއެސްޖީ ބަލިވި މެޗުގައި
  • އަނިޔާއާ ގުޅިގެން ނޭމާއަށް ވަނީ މިހާތަނަށް ޕީއެސްޖީން ކުޅުނު ފަސް މެޗެއް ގެއްލިފައި
  • ހޯމަ ދުވަހު ޕީއެސްޖީން ކުރިއަށް ގެންދިޔަ ފަރިތަކުރުންތަކުގައި ނޭމާ ވަނީ ބައިވެރިވެފައި

ކ. މާލެ | 12 ޖެނުއަރީ 2021 | އަންގާރަ 18:21 | 1,479

ޕީއެސްޖީގެ ފަރިތަކުރުންތަކުގައި ބްރެޒިލުގެ ތަރި ނޭމާ ބައިވެރިވަނިކޮށް - ގެޓީ އިމޭޖާސް

ފައިގެ ކުޑަހުޅަށް ލިބުނު އަނިޔާއިން ރަނގަޅުވެ ޕީއެސްޖީގެ ފަރިތަކުރުންތަކުގައި ބްރެޒިލުގެ ތަރި ނޭމާ ބައިވެރިވާން ފަށައިފިއެވެ.

ނޭމާއަށް އަނިޔާވީ މިދިޔަ ޑިސެމްބަރު މަހުގެ 13 ވަނަ ދުވަހު ފްރެންޗް ލީގުގައި ލިޔޯން އަތުން 1-0 ގެ ނަތީޖާއަކުން ޕީއެސްޖީ ބަލިވި މެޗުގައެވެ. އެ މެޗުގައި ނޭމާއަށް އަނިޔާވީ އިތުރު ވަގުތުގައި ލިޔޯނުގެ ތިއާާގޯ މެންޑޭސް ކުރި ފައުލަކާ ގުޅިގެންނެވެ. މެންޑޭސް ކުރި ފައުލާ ގުޅިގެން ނޭމާގެ ފައިގެ ކުޑަހުޅަށް އަނިޔާވިއިރު، އޭނާ ދަނޑުން ބާލާފައިވަނީ އަށިގަނޑުގައެވެ.

އެ އަނިޔާއާ ގުޅިގެން ނޭމާއަށް ވަނީ މިހާތަނަށް ޕީއެސްޖީން ކުޅުނު ފަސް މެޗެއް ގެއްލިފައެވެ. އެކަމަކު އެ އަނިޔާއިން ރަނގަޅުވެ ހޯމަ ދުވަހު ޕީއެސްޖީން ކުރިއަށްގެންދިޔަ ފަރިތަކުރުންތަކުގައި ނޭމާ ވަނީ ބައިވެރިވެފައެވެ.

މިދިޔަ ޑިސެމްބަރު މަހު ނޭމާއަށް އަނިޔާވިއިރު، އޭނާ ވަނީ މިހާތަނަށް މި ސީޒަނުގެ ފްރެންޗް ލީގުގައި ޕީއެސްޖީއަށް ހަތް މެޗު ކުޅެދީފައެވެ. އަދި މި ހަތް މެޗުގައި ނޭމާ ވަނީ ތިން ލަނޑު ޖަހާފައެވެ.

ލިޔޯން އަތުން ޕީއެސްޖީ ބަލިވި މެޗުގައި ނޭމާއަށް އަނިޔާވިއިރު، އޭރު އެ ޓީމުގެ ކޯޗަކަށް ހުރީ ތޯމަސް ޓުޗެލްއެވެ. އެކަމަކު ޓުޗެލް ވަކިކޮށް މި މަހުގެ ތިންވަނަ ދުވަހު ޕީއެސްޖީގެ ކޯޗުގެ މަގާމަށް ޓޮޓެންހަމް ހޮޓްސްޕާގެ ކުރީގެ ކޯޗު މައުރީސިއޯ ޕޮޗެޓީނޯ ވަނީ ހަމަޖައްސާފައެވެ. ޕޮޗެޓީނޯގެ އިރުޝާދުގެ ދަށުން ޕީއެސްޖީން މިހާތަނަށް ދެ މެޗެއް ކުޅެފައިވާއިރު، ފުރަތަމަ މެޗުގައި ޕީއެސްޖީ ވަނީ ސެއިންޓް އެޓިއެންއާ 1-1 ން އެއްވަރުވެފައެވެ. އަދި ދެވަނަ މެޗުން ޕީއެސްޖީ ވަނީ ބްރެސްޓޮއިސް އަތުން ފަސޭހަކަމާއެކު 3-0 ގެ ނަތީޖާއަކުން މޮޅުވެފައެވެ.

ފްރެންޗް ލީގުގެ އެންމެ ފަހުގެ ޗެމްޕިއަން ޓީމު ކަމަށްވާ ޕީއެސްޖީ އޮތީ ތާވަލުގެ ދެވަނައިގައި ކުޅުނު 19 މެޗުން ލިބުނު 39 ޕޮއިންޓާއެކުއެވެ. ތިންވަނައިގައި އޮތް ލިލްއަށްވެސް 19 މެޗުން 39 ޕޮއިންޓް ލިބިފައިވާއިރު، ޕީއެސްޖީއަށް ކުރި ލިބެނީ ފައިދާ ލަނޑުންނެވެ. އަދި ތާވަލުގެ އެއްވަނައިގައި 19 މެޗުން 40 ޕޮއިންޓާއެކު އޮތީ ލިޔޯނެވެ.

އެންމެ ފަހުން އަޕްޑޭޓް ކުރީ: 6 ދުވަަސް ކުރިން | ރިވިއު ކުރީ: ހުސައިން ފަރިޔާޒް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.