ހޮނިހިރު ދުވަހު ފުވައްމުލަކުގައި މޫދަށް އެރި އުޅެނިކޮށް ގެނބިގެން މަރުވި ފައުޒާން މަރުވީ އޭނާގެ ގުރުބާނީން މުޅި ގައުމު ރޮއްވާލާފައި ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވުވެއްޖެއެވެ.

އިހުޒަމާނުގައި ނެރެއްގެ ގޮތުގައި ފުވައްމުލަކުގައި ބޭނުންކުރަމުން އައި އެ ރަށުގެ "މާނެރެ" ސަރަހައްދަށް އެކުވެރި ހައެއްކަ ކުދިންނާ އެކު އިއްޔެ މޫދަށް އެރެން ގޮސް އުޅުނު ފައުޒާން ގެނބިގެން މަރުވީ އޭނާ އާ އެކު ދިޔަ އިތުރު ދެ އަންހެން ކުއްޖަކު ގެނބެނިކޮށް ސަލާމާތްކުރުމުގެ ތެރެއިންނެވެ. އޭނާ ގެނބިގެން މަރުވި ނަމަވެސް އެ ދެކުދިން އޭނާ ވަނީ ސަލާމަތްކޮށްދީފައެވެ.

އުމުރުން 17 އަހަރުގެ ފައުޒާން ދެއްކި ހިއްވަރަށް މުޅި ގައުމު ސަނާ ކިޔަމުންދާއިރު ފައުޒާންގެ މަރަ ގުޅިގެން ރައީސް ވިދާޅުވީ އޭނާ ވަކިވެގެން ދިޔައީ ހިތްވަރުގަދަ ކަމުގެ ލާމަސީލް ނަމޫނާއެއް ދައްކުވައިދީ އޭނާގެ ގުރުބާނީ އިން މުޅި ގައުމު ރޮއްވާލާފައި ކަމަށެވެ.

ހޮނިހިރު ދުވަހު ހަވީރު ގާތްގަނޑަކަށް 4:30ން ފެށިގެން ފައުޒާން މޫދުގައި ގެއްލިގެން ޙޯދަމުން ދަނިކޮށް އޭނާ ފެނުނީ އޭގެ ގާތްގަނޑަކަށް ގަޑިއެއްހާއޮރު ފަހުން ނޭރާ ދިމާލު ބޭރުން މޫދު އަޑީގައި އޮއްވަ އެވެ. އޭނާ ފެނުނު އިރު ހޭނެތިފައި އޮތް ނަމަވެސް މަރެއް ނުވެއެވެ. އޭނާ މަރުވީ ހޮސްޕިޓަލަށް ގެންގޮސް ފަރުވާދެމުން ދަނިކޮށެވެ.