ސްކޫލަތަކުގެ ރައްކާތެރިކަން ޔަގީން ކުރާނަން، ދަރިވަރުން ސްކޫލަށް ފޮނުވައިދެއްވާ: މިނިސްޓަރ
ސްކޫލްތައް ރައްކާތެރިވާނެ ކަމުގެ ޔަގީންކަން މިނިސްޓަރ ދެއްވި
އެޑިއުކޭޝަން މިނިސްޓަރ ޑރ. އައިޝަތު އަލީ
ކޮވިޑް-19އާ ގުޅިގެން 10 މަސް ދުވަހުގެ ބޮޑު ބަންދަކަށް ފަހު މިދިޔަ އަހަރު ފެށި ދިރަސީ އަހަރުގެ ދެވަނަ ޓާމުގެ ކިޔެވުން މިއަދު ފަށާފައިވަނީ ހުރިހާ ސްކޫލެއްގައި ވެސް އެޗްޕީއޭގެ އުސޫލުތަކާ އެއްގޮތަށް ރައްކާތެރިކަން ކަށަވަރުކޮށްފައި ކަމަށާއި އެކަމާ މަދު ކަންބޮޑުނުވެ ދަރިވަރުން ސްކޫލަށް ފޮނުއްވައިދެއްވަން އެޑިއުކޭޝަން މިނިސްޓަރ ޑރ. އައިޝަތު އަލީ ގޮވާލައްވައިފިއެވެ.
މިއަދު ސްކޫލްތައް ހުޅުވުމާ ގުޅިގެން މިނިސްޓަރ ދެއްވި ވީޑިއޯ މެސެޖުގައި ވިދާޅުވީ މިނިސްޓަރ ވިދާޅުވީ މުޅި މާލޭގައި ކޮވިޑް-19 ފެތުރިފައިވާއިރު ސްކޫލްތަކަށް ދަރިވަރުން އެއްކޮށް ނިކުމެ ކިޔެވުމަކީ ޖެހިލުންވެދާނެ ކަމެއްކަން ގަބޫލުފުޅުކުރައްވާ ކަމަށެވެ. ނަމަވެސް ސްކޫލްތައް ހުޅުވާފައިވާނީ ރައްކާތެރިކަމުގެ ފިޔަވަޅުތައް ވަރުގަދަކޮށް ރަނގަޅަށް އަޅާފައި ކަމަށް މިނިސްޓަރ ވިދާޅުވި އެވެ.
ކޮވިޑް-19އާ ގުޅިގެން ރާއްޖޭގެ ހާލަތު އޮތް ގޮތުން މިދިޔަ އަހަރު ވެގެން ދިޔައީ ވަރަށް ދަތި އަހަރެއް ކަމަށެވެ. އަދި މިދިޔަ ޓާމުގައި ސްކޫލަށް ގޮސް ކިޔެވުމުގެ ފުރުސަތު ހުރިހާ ދަރިވަރުންނަށް ނުލިބުނު ނަމަވެސް ދަރިވަރުންގެ ކިޔެވުން މެދު ނުކެނޑި ކުރިއަށް ގެންދިޔުމަށް ދަރިވަރުންނާއި ބެލެނެވެރިން އަދި ޓީޗަރުން ގުޅިގެން ގިނަ މަސައްކަތްތަކެއްކޮށްފައިވާ ކަން މިނިސްޓަރ ފާހަގަކުރެއްވި އެވެ.
އެކަމާ ވިދާޅުވީ ކޮވިށްގެ ހާލަތުން ލުއި ލިބި ނިއު ނޯމަލްގައި ސްކޫލްތައް ހުޅުވި އިރު މި ޓާމުގައި ހުރިހާ ދަރިވަރުންނަށް ވެސް އެ ފުރުސަތުލިބޭނެ ކަމަށް އުންމީދުކުރައްވާ ކަމަށެވެ.
މިނިސްޓަރު ވިދާޅުވީ ދަރިވަރުން ސްކޫލަށް ނުގޮސް ގިނަ ދުވަހު ގޭގައި ތިބުމަކީ ދަރިވަރުންނަށް އޭގެ ނޭދެވޭ އަސަރު ވަރަށް ބޮޑަށް ކުރާނެ ކަމެއް ކަމަށެވެ. އެހެންވީމާ ހުރިހާ ދަރިވަރުން ވެސް ސްކޫލަށް ފޮނުވުމަށް ބެލެނެވެރިންނަށް ވެސް އިލްތިމާސް ކުރައްވާ ކަމަށާއި ދަރިވަރުންގެ ރައްކާތެރިކަމުގެ ޒިންމާ މިނިސްޓްރީން ނަގާނެ ކަމުގައި ވެސް ވިދާޅުވި އެވެ.
ކޮވިޑް-19އާ ގުޅިގެން ސްކޫލްތައް ބަންދުކުރީ މިދިޔަ އަހަރު މާޗް މަހުގަ އެވެ. 10 މަހުގެ ދިގު ބަންދަކަށް ފަހު މިއަދު ސްކޫލްތައް ހުޅުވި އިރު ސްކޫލްތަކުގައި އަމަލުކުރަން ޖެހޭ އުސޫލުތަކަށް ވެސް ވަނި ބަދަލުތައް ގެނެސްފަ އެވެ. އެގޮތުން ހުރިހާ ސްކޫލެއްގައި ވެސް ދެ ދަންފަޅިއަށް ބަހާލައިގެން ކިޔަވައިދޭ ޕްރީ ސްކޫލްކުދިންނަށް ކިޔަވައިދެނީ ދެ ގަޑި އިރަށެވެ. އަދި ޕްރައިމަރީ އިން ފެށިގެން މަތީގެ ދަރިވަރުންނަށް ދުވާލަކު ހަތަރު ގަޑި އިރެވެ.
ސްކޫލްގައި ކިޔަވާ ކުދިންގެ ނިސްބަތުން ބަލައި ދަންފަޅިތައް ބަހާފައިވާއިރު ގިނަ ދަރިވަރުން ތިބޭ ސްކޫލްތަކުގައި ދެ ދުވަހުން އެއް ދުވަހު ދާން ޖެހޭ ގޮތަށް ވެސް ޝެޑިއުލްތައް އޮވެ އެވެ. ނަމަވެސް އެގޮތަށް ޝެޑިއުލް އޮންނަ ސްކޫލްތަކުގައި ސްކޫލަށް ނުދާ ދުވަސްތަކުގައި އޮންލައިން ކްލާސް ނަގައިދޭން ޖެހެ އެވެ.
