ފަތުރުވެރިކަމުގެ ރަންޔޫބީލް ރަންޔޫބީލަކަށް ވާނީ މުވައްޒަފުންނަށް ހިނުތުންވުން ލިބިގެން - މިނިސްޓަރ މައުސޫމް
އަމާޒަކީ އިތުރު ތަންތަން ހުޅުވައި މުވައްޒަފުންނަށް އިތުރު ފުރުސަތުތައް ހޯދައިދިނުން
ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންތަކެއް ފަތުރުވެރިންނަށް ހިދުމަތްދިނުމުގައި ހަރަކާތްތެރިވަނީ
ރާއްޖޭގެ ފަތުރުވެރިކަމުގެ ސިނާއަތުގެ ރަންޔޫބީލް ރަންޔޫބީލުގެ ގޮތުގައި ފާހަގަކުރެވޭނީ މުވައްޒަފުންނަށް ހިނިތުންވުން ލިބިގެން ކަމަށް ޓޫރިޒަމް މިނިސްޓަރ ޑރ އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގެ 'ވިޔަފާރި މިއަދު' ޕްރޮގްރާމްގައި ވާހަކަދައްކަވަމުން މިނިސްޓަރ މައުސޫމް ވަނީ ފަތުރުވެރިކަމުގެ ސިނާއަތުގެ އެންމެ މުހިންމު ހިއްސާދާރުންނަކީ އެސިނާއަތުގައި މަސައްކަތްކުރާ މުވައްޒަފުން ކަމަށާއި ސިނާއަތުގެ ރަންޔޫބީލް ފާހަގަކުރާއިރު، މުވައްޒަފުންގެ ހިނުތުންވުމަކީ މުހިންމު ކަމެއް ކަމަށެވެ. އެހެން ކަމުން 2022 ވަނަ އަހަރު ފަތުރުވެރިކަމުގެ ރަން އަހަރުގެ ގޮތުގައި ފާހަގަކުރާއިރު، ރަން އަހަރަކަށް ވެގެންދާނީ ސިނާއަތުގެ މުވައްޒަފުންނަށް ހިނިތުންވުން ލިބިގެން ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިކަމަށްޓަކައި މިނިސްޓްރީން ގިނަ މަސައްކަތްތަކެއް ކުރަމުން ގެންދާނެ ކަމަށާއި މުވައްޒަފުންނަށް އެންމެ ބޮޑު ކުރިއެރުމެއް ލިބެން އޮތީ އިތުރު ތަންތަން ހަދައި އިތުރު ތަންތަން ހުޅުވިގެން ކަމަށާއި އަމާޒަކީ މިގޮތަށް ތަންތަން ހުޅުވައި މުވައްޒަފުންނަށް އިތުރު ފުރުސަތުތައް ހޯދައިދިނުން ކަމަށެވެ. އަދި މިހާރު ތިބި ތަންތަނުން މުވައްޒަފުންނަށް ކުރިއެރުންތައް ހޯދައި ދިނުމަށް މަސައްކަތްކުރާނެ ކަމަށް މިނިސްޓަރ ވަނީ ވިދާޅުވެފައެވެ.
ވަޒީފާއެއް އަދާކުރެވޭނީ އެވަޒީފާއަކުން ލިބޭ އާމްދަނީން ދިރިއުޅެވިގެން ކަމަށް ފާހަގަކުރައްވާ މިނިސްޓަރ ވަނީ ލިބޭ އާމްދަނީން ހަރަދުތައް ކުރުމަށްފަހު މަސް ނިމޭއިރު، އަތުގައި އެއްޗެއް އޮންނަން ވާނެ ކަމަށް ވިދާޅުވެފައެވެ. އަދި ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް އެފަދަ އާމްދަނީއެއް ލިބޭނީ އެވަރު އާމްދަނީ ލިބޭ ވަޒީފާތަކަށް ދިވެހިން މިސްރާބު ޖަހައިގެން ކަމަށާއި މިކަން ހާސިލްކުރުމަށް ދިވެހިން އަދާކުރާހިތްވާ ބޮޑެތި ވަޒީފާތައް ދިވެހިންނަށް ލިބެން ޖެހޭ ކަމަށް މިނިސްޓަރ ވިދާޅުވިއެވެ.
މިފަދަ ވަޒީފާތަކަށް ގާބިލު އަދި ކުޅަދާނަ ދިވެހިން އެބަތިބި ކަމަށާއި އެފަރާތްތަކަށް އެމަގު ފަހި ކޮށްދޭނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރާއްޖޭގެ ހުރިހާ ވަޒީފާތަކަށް ވާވަރަށް ދިވެހިން ނެތް ކަމަށާއި އެހެން ކަމުން މި މައްސަލަ ހައްލުވާނީ ދަށް މުސާރަ ލިބޭ ވަޒީފާތަކުގައި ތިބޭނީ ބިދޭސީން ކަމަށާއި މަތީ ވަޒީފާތަކުގައި ނުވަތަ ބޮޑު މުސާރަ ލިބޭ ވަޒީފާތަކުގައި ތިބޭނީ ދިވެހިންކަމަށް ހެދުމުންކަމަށެވެ.
ރިިސޯޓް މުވައްޒަފެއްގެ މުސާރައަކީ އެމުވައްޒަފުންނަށް ލިބޭ އާމްދަނީގެ އެއް ބައި ކަމަށާއި ޓިޕް އަދި ސާވިސް ޗާޖަކީ ތަނުގެ ވިޔަފާރިއާއި ގުޅިފައި ހުރި އެއްޗެއް ކަމުން ރިސޯޓުތަކުގެ އޮކުއިޕެންސީ އިތުރުވާން ޖެހޭނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވަނީ ޕްރޮގްރާމްގައި ވާހަކަދައްކަވަމުން ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންނަށް އެންމެ ބޭސިކް ތަމްރީނުތަކުން ފެށިގެން އެޑްވާންސް ލެވެލްގެ ތަމްރީނުތައް ދޭނެކަމަށް ވިދާޅުވެފައެވެ.
