ތިލަފުއްޓާއި ގުޅީފަޅުން ބިން ދޫކުރުން ވަގުތީގޮތުން މެދުކަނޑާލައިފިއެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ނެރުނު ބަޔާނެއްގައި ބުނީ ތިލަފުއްޓާއި ގުޅީފަޅުން ބިން ދޫކުރުން ހުއްޓާލީ އެ ދެތަނުން ބިން ދޫކުރުމާއި ބޭނުންކުރުމުގެ އުސޫލުތައް މުރާޖާ ކުރުމުގެ މަސައްކަތްކުރަމުންދާތީ ކަމަށެވެ.
މީގެ އިތުރަށް ވަގުތީ ގޮތުން އަދި ދާއިމީކޮށް އިތުރަށް ދޫކުރެވެންހުރި ބިންތައް ދޫކުރުމަށް ކުރަންޖެހޭ މަސައްކަތްތައް ކޮށްނިމުމުން، އެބިންތަކަށް އެދުމުގެ ފުރުސަތު ހުޅުވާލެވޭނެ ކަމަށް ވެސް އެ ކުންފުނިން ބުނެފައިވެއެވެ.
އެޗްޑީސީން ބުނީ އެ ކުންފުންޏާއި ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑް(ޖީއެމްއައިޒެޑްއެލް) އެއްކޮށްލުމާގުޅިގެން ހުޅުމާލެ، ތިލަފުށި އަދި ގުޅިފަޅު ހިމެނޭ ގޮތަށް ގްރޭޓަރ މާލޭ އޭރިޔާ ތަރައްގީކުރަން ކުރަން ޖެހޭ ހުރިހާ މަސައްކަތެއް ސަރުކާރުގެ ލަފާގެ މަތިން ކުރަމުން އަންނަ ކަމަށެވެ.
ރައީސް ނަޝީދުގެ ސަރުކާރުގައި ހިއްކަން ފެށި ގުޅީފަޅުން އެ ސަރުކާރުގައި ފްލެޓާއި ބިން ވެސް ދޫކޮށްފައި ވެއެވެ. ނަމަވެސް ރައީސް ޔާމީންގެ ސަރުކާރުގައި އެތަންތަން ދޫނުކުރާ ގޮތަށް ނިންމައި އޭގެ ބަދަލު އާންމުންނަށް ދޭން ނިންމި އެވެ. ނަމަވެސް ބަދަލު ދީފައިނުވާ މައްސަލައިގެ ޝަކުވާތަކަށް އަދިވެސް ހައްލެއް ލިބިފައެއް ނުވެއެވެ.
މިސަރުކާރުން މިހާރު މަސައްކަތްކުރަމުން އަންނަނީ ގުޅީފަޅު އަދި ތިލަފުށި އިންޑަސްޓްރިއަލް ޒޯންތަކުގެ ގޮތުގައި ބޭނުންކުރާށެވެ.
