ސިންގަޕޫރުގެ ބޮޑުވަޒީރު ކޮވިޑް-19 ވެކްސިންގެ ފުރަތަމަ ޑޯޒް ޖައްސަވައިފި
8 ޖެނުއަރީ 2021 | ހުކުރު 06:56ފުރަތަމަ ދުވަހުގެ ތެރޭގައި ފުރަންޓްލައިނުގައި ހަރަކާތްތެރިވާ 90 ފަރާތަކަށް ވެކްސިން ޖަހާނެ
ސިންގަޕޫރުގެ ބޮޑުވަޒީރު ލީ ސެންގ ލޫންގް ކޮވިޑް-19 ވެކްސިންގެ ފުރަތަމަ ޑޯޒް ޖައްސަވަނީ
ސިންގަޕޫރުގެ ބޮޑުވަޒީރު ލީ ސެންގ ލޫންގް ކޮވިޑް-19 ވެކްސިންގެ ފުރަތަމަ ޑޯޒް ޖައްސަވައިފިއެވެ.
ސިންގަޕޫރުގެ ބޮޑުވަޒީރު ލީ ސެންގ ލޫންގް ކޮވިޑް-19 ވެކްސިން ފުރަތަމަ ޑޯޒް ޖަައްސެވީ ހުކުރު ދުވަހުއެވެ. ބޮޑުވަޒީރު ޖެއްސެވީ އެމެރިކާގެ ފާމަސޫޓިކަލް ކުންފުނި ފައިޒަރ އަދި ޖަރުމަނުގެ ކުންފުނި ބައޯއެންޓެކް އިން ކޮވިޑް-19އަށް އުފެއްދި ފައިޒަރ-ބަޔޮންޓެކް ވެކްސިނެވެ.
ބޮޑުވަޒީރު ލީ ސެންގ ކޮވިޑް-19ގެ ވެކްސިން ޖަހާފައިވަނީ ހުކުރު ދުވަހު، ސިންގަޕޫރުގެ ޖެނެރަލް ހޮސްޕިޓަލަށް ވަޑައިގެން އެ ހޮސްޕިޓަލުގައި ވެކްސިން ޖެހުމުގެ މަސައްކަތް ފެށުމުގެ ގޮތުން ބޭއްވި ރަސްމިއްޔާތެއްގައެވެ.
ވެކްސިން ޖެހުމަށްފަހު، ބޮޑުވަޒީރު ލީ ސެންގ ވިދާޅުވެފައިވަނީ، ސިއްހީ ދާއިރާގެ ހިދްމަތްތެރިންނާއި ފުރަންޓްލައިންގައި މަސައްކަތް ކުރައްވާ ފަރާތްތަކާ ބައްދަލުވެ، ވެކްސިން ޖެހުމުގެ މަސައްކަތް ފެށުނީތީ އުފާކުރައްވާ ކަމަށެވެ. އަދި ހުކުރު ދުވަހުގެ ހެނދުނު ވެކްސިން ޖެހުމަށްފަހު، 30 މިނިޓް ވަންދެން އެތަނުގައި މަޑުކުރައްވައި، ބޮޑުވަޒީރު ލީ ސެންގ ވިދާޅުވެފައިވަނީ، ވެކްސިން ޖެހުމުގެ ސަބަބުން ނޭދެވޭ އެއްވެސް ކަމެއް ނުވާކަމަށެވެ. އަދި ވިދާޅުވީ، ވެކްސިން ކާޑު ލިބި، ތިން ހަފްތާފަހުން ދެވަނަ ޑޯޒް ޖެހުމަށް އެޕޮއިންޓްމަންޓްވެސް ލިބިފައިވާ ކަމަށެވެ. ވެކްސިން ޖެހުމަކީ ވޭންއަޅާ ކަމެއް ނޫންކަމަށާއި މިކަމަކީ ކޮވިޑް-19އަށް ރައްކާތެރިވުމަށް ކޮންމެހެން ޖަހަންޖެހޭ އަދި މުހިއްމު ވެކްސިނެއް ކަމަށްވެސް ބޮޑުވަޒީރު ލީ ސެންގ ވިދާޅުވެފައިވެއެވެ.
ސިންގަޕޫރުގައި ކޮވިޑް-19ގެ ވެކްސިން ޖަހަންފެށި، ސިންގަޕޫރުގެ ޖެނެރަލް ހޮސްޕިޓަލުން މައުލޫމާތު ހާމަކޮށްފައިވާގޮތުގައި ހުކުރު ދުވަހު، ހޮސްޕިޓަލުތަކާއި ކްލިނިކްތައް އަދި ސިއްހީ ދާއިރާގައި ހަރަކާތެރިވާ ފަރާތްތަކަށް އަމާޒުކޮށް ހުކުރު ދުވަހު 90 ފަރާތަކަށް ވެކްސިންގެ ފުރަތަމަ ޑޯޒް ޖެހޭނެއެވެ.
ކޮވިޑް-19އަށް ރައްކާތެރިވުމުގެ ގޮތުން، ވެކްސިން ޖެހުމުގެ ކެމްޕެއިނެއް ގައުމުތަކުގެ ލީޑަރުން ގެންދަނީ، އެގައުމުގައި ގައުމީ ފެންވަރުގައިވެސް ހިންގަވަމުންނެވެ. އެގޮތުން ބައެއް ގައުމުތަކުގެ ވެރިން މީޑިއާ ކުރިމަތީގައި ވެކްސިން ޖައްސަވަމުން ގެންދަވާކަން ފާހަގަކުރެވެއެވެ.
އެގޮތުން، އެމެރިކާގެ އިންތިހާބީ ރައީސް ޖޯ ބައިޑަން ވެކްސިންގެ ފުރަތަމަ ޑޯޒް ޖައްސަވާފައިވާއިރު، ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާނާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވެސް ވަނީ ކޮވިޑް-19ގެ ވެކްސިން ޖައްސަވައިފައެވެ.
ކޮވިޑް-19ގެ ވެކްސިނަށް އޮތް ޑިމާންޑް ބޮޑުވެ، ވެކްސިން ހޯދުމުގެ މަސައްކަތް ގައުމުތަކުން ދަނީ ކުރަމުންނެވެ.
