ސިޓީގައި ޑި ބްރޭނާ މަޑުކުރާނެކަމުގެ ޔަގީންކަން އެބައޮތް: ގާޑިއޯލާ

މެންޗެސްޓާ ސިޓީއާއެކު ހަދާފައިވާ އެއްބަސްވުން ބެލްޖިއަމުގެ މިޑްފީލްޑަރު ކެވިން ޑި ބްރޭނާ އާކުރާނެކަމުގެ ޔަގީންކަން އެބައޮތް ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފިއެވެ.

ސިޓީއާއެކު އުމުރުން 29 އަހަރުގެ މިޑްފީލްޑަރު މިހާރު ހަދާފައިވާ އެއްބަސްވުން ހަމަވާނީ 2023 ވަނަ އަހަރުގެ ހޫނު މޫސުމުގެ ނިޔަލަށެވެ. އެކަމަކު ރިޕޯޓުތައް ބުނާ ގޮތުން ސިޓީން މިހާރު ވަނީ އިތުރު ފަސް އަހަރުގެ އެއްބަސްވުމެއް ޑި ބްރޭނާއަށް ހުށަހަޅާފައެވެ.

އެކަމަކު އެ އެއްބަސްވުން އާކުރުމަށް ޑި ބްރޭނާ ދެކޮޅު ހަދާފައިވާއިރު، އެކަމަށް އޭނާ ދެކޮޅު ހަދަނީ އައު އެއްބަސްވުމުގައިވާ ގޮތުން މިހާރު ލިބޭ މުސާރައަށްވުރެ ކުޑަ މުސާރައެއް ހުށަހަޅާފައިވާތީ ކަމަށް ރިޕޯޓުތައް ބުނެއެވެ. އެގޮތުން މިހާރު އޮތް އެއްބަސްވުމުގެ ދަށުން ޑި ބްރޭނާއަށް ހަފުތާއެކު 280،000 (ދެ ލައްކަ އަށްޑިހަ ހާސް) ޕައުންޑުގެ މުސާރައެއް ލިބެއެވެ.

ސިޓީގެ އެއްބަސްވުން އާކުރަން ޑި ބްރޭނާ ދެކޮޅު ހެދި ނަމަވެސް، ދާދި ފަހުން ގާޑިއޯލާ ބުނީ ސިޓީގައި ޑި ބްރޭނާ މަޑުކުރާނެކަމުގެ ޔަގީންކަން އެބައޮތް ކަމަށެވެ. އެކަމަކު ޑި ބްރޭނާގެ އެއްބަސްވުމުގައި ޖެހިގެން އުޅޭ މައްސަލައެއް އަދި ސާފުނުވާ ކަމަށާއި، އެހެންނަމަވެސް އެއްބަސްވުމުގެ ކަންކަން ކުރިއަށްދާ ގޮތާ ދޭތެރޭ ފާޑުކިޔުމުގެ ބަދަލުގައި އެކަމަށް އިޙުތިރާމުކުރާނެ ކަމަށްވެސް ގާޑިއޯލާ ވަނީ ބުނެފައެވެ.

ސިޓީން ޑި ބްރޭނާގެ އެއްބަސްވުން އާކުރުމަށް މަސައްކަތް ކުރަމުން އަންނައިރު، މީގެ ކުރިން ޑި ބްރޭނާ ވަނީ ސިޓީގެ އެއްބަސްވުމާ ގުޅޭ ގޮތުން އަދި މިހާތަނަށް ރަސްމީކޮށް އެއްވެސް ވާހަކައެއް ދެކެވިފައިނުވާ ކަމަށް ބުނެފައެވެ. އެކަމަކު ސިޓީގައި އޭނާ ހުރީ އުފަލުން ކަމަށާއި، ސިޓީން ބޭނުންވާނަމަ ކުލަބުގައި މަޑުކުރާނެ ކަމަށްވެސް ޑި ބްރޭނާ ވަނީ ބުނެފައެވެ.

ސިޓީގައި ތަފާތު މޮޅު ކުޅުމެއް ދައްކަމުން އަންނަ ޑި ބްރޭނާ ވަނީ ޕްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން ހޮވި މިދިޔަ ސީޒަނުގެ އިނގިރޭސި ޕްރިމިއާ ލީގުގެ އެންމެ މޮޅު ކުޅުންތެރިޔާގެ މަގާމާއި، މިދިޔަ ސީޒަނުގެ ޕްރިމިއާ ލީގުގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައެވެ.

މީގެ ކުރިން ޗެލްސީއަށްވެސް ކުޅުނު ޑި ބްރޭނާ ސިޓީއާ ގުޅުނީ 2015 ވަނަ އަހަރު ވުލްފްސްބާގް ދޫކޮށް 55 މިލިޔަން ޕައުންޑަށެވެ. އޭނާ ވަނީ މިހާތަނަށް ސިޓީއަށް ކުޅެދިން 240 މެޗުގައި 60 ލަނޑު ޖަހާފައެވެ. އަދި ވަނީ ސިޓީއާއެކު ޕްރިމިއާ ލީގު ދެ ފަހަރު ކާމިޔާބުކުރުމުގެ އިތުރަށް އެފްއޭ ކަޕް އެއް ފަހަރު ކާމިޔާބުކޮށްފައެވެ.