އެވަޓަންގެ ބޯޑުގެ ފުރިހަމަ ތާއީދު އެބައޮތް: ކޮއެމަން

މިސީޒަނުގައި ދަށް ފެށުމެއް ލިބުނު ނަމަވެސް، ކްލަބުގެ ބޯޑުގެ ފުރިހަމަ ތާއީދު އެބައޮތް ކަމަށް އެވަޓަންގެ ކޯޗު ރޮނަލްޑް ކޮއެމަން ބުނެފި އެވެ.

މިސީޒަނަށް ސްކޮޑު ވަރުގަދަ ކުރުމަށް ކުޅުންތެރިން ގަތުމަށް 100 މިލިއަން ޕައުންޑު ޚަރަދުކުރި އެވަޓަން އޮތީ، ރެލިގޭޝަން ޒޯނާއި ގާތުގައެވެ. އިނގިރޭސި ޕްރިމިއަރ ލީގުގައި ކޮންމެ ޓީމެއްވެސް އަށް މެޗު ކުޅެފައިވާއިރު، އެވަޓަން އޮތީ އަށް ޕޮއިންޓާއެކު ލީގު ތާވަލްގެ 16 ވަނާގައެވެ. ލީގުގައި ކުޅުނު އަށް މެޗުގެ ތެރެއިން ދެ މެޗުން މޮޅުވެ، ދެ މެޗު އެއްވަރުވިއިރު، ހަތަރު މެޗުން އެވަޓަން ވަނީ ބަލިވެފައެވެ.

މިދިޔަ ހަފްތާގެ ތެރޭގައި އެކްލަބުގެ މެޖޯރިޓީ ހިއްސާދާރު ފަރްހާދު މޮޝީރީ އަދި ޗެއަރމަން ބިލް ކެންރައިޓް ވަނީ އެވަޓަންގެ ޓްރެއިނިންގ ދަނޑު، ފިންޗް ފާރމް އަށް ޒިޔާރަތްކޮށް، ކޮއެމަން އާއި ވާހަކަ ދައްކާފައެވެ.

މޮޝީރީ އަދި ކެންރައިޓްގެ އެ ޒިޔާރަތާއި ގުޅޭ ގޮތުން ކޮއެމަން ބުނީ، އެ ބައްދަލުވުމުގައި ދެކެވުނީ ފުޓްބޯޅައިގެ ވާހަކަ ކަމަށެވެ.

އަދި އެއީ ކްލަބުގެ މެނޭޖްމަންޓުން ދިން މެސެޖެއް ކަމަށް ނުބެލެވޭ ކަމަށާއި، އޭގެ ބަދަލުގައި އެޒިޔާރަތުން އިހުސާސް ކުރެވުނީ ޓީމުގެ ފަހަތުގައި، އަދި ކޯޗުގެ ފަހަތުގައި މެނޭޖްމަންޓް އޮތް ކަން ކަމަށް ކޮއެމަން ބުންޏެވެ.

ތިން އަހަރުގެ ކޮންޓްރެކްޓެއްގެ ދަށުން އެވަޓަންގެ ކޯޗުގެ މަގާމާއި ކޮއެމަން ހަވާލުވީ 2016 ވަނަ އަހަރުގެ ޖޫން މަހުގެ ތެރޭގައެވެ. ކޮއެމަން ވަނީ އޭނާގެ ފުރަތަމަ ސީޒަނުގައި ޕްރިމިއަރ ލީގުގެ ހަތްވަނަ އަށް އެވަޓަން ގެންގޮސްދީފައެވެ.

ކޮއެމަން ބުނީ ފުޓްބޯޅާގައި އަބަދުވެސް އެންމެ ފަހު ވަގުތު މުހިންމު ވާނީ ނަތީޖާ ކަމަށާއި، މިވަގުތާއި ހަމަޔަށް އޭނާ އަށް ކްލަބުގެ ބޯޑުގެ ފުރިހަމަ ތާއީދު އެބައޮތް ކަމަށެވެ.

އެވަޓަން އަށް ވުރެ ދެ ޕޮއިންޓް މަދުން ލިބިގެން ރެލިގޭޝަން ޒޯނުގައި އޮތް ލެސްޓާ ސިޓީގެ ކޯޗު ކްރެއިގް ޝޭކްސްޕިއަރ ވަނީ އަންގާރަ ދުވަހު މަގާމުން ވަކިކޮށްފައެވެ.

އެކަމާއި ގުޅޭ ގޮތުން ވާހަކަ ދައްކަމުން ކޮއެމަން ބުނީ، ފުޓްބޯޅައިގައި ކޯޗެއްގެ ވަޒީފާ އަކީ އެންމެ އުނދަގޫ ވަޒީފާކަން އެންމެންނަށްވެސް އެނގޭ ކަމަށާއި، ސަބަބަކީ ހާލަތު އަވަސް އަވަހަށް ބަދަލުވުން ކަމަށެވެ.

އަދި ގިނަ ފަހަރު ކޯޗަކަށް ޓީމް ރަނގަޅު ކުރަން ވަގުތު ނުލިބޭ ކަމަށާއި، އެއީ ފުޓްބޯޅަ ކަމަށާއި، ކޯޗުންނަށް އެކަން އުނދަގޫވި ނަމަވެސް، އެއީ ވަޒީފާގެ ބައެއްގެ ގޮތުގައި ގަބޫލު ކުރާ ކަމަށް އޭނާ ބުންޏެވެ.

އެވަޓަން އެންމެ ފަހުން ކުޅެފައިވަނީ އާދީއްތަ ދުވަހުގެރޭ އިނގިރޭސި ޕްރިމިއަރ ލީގުގައި ބްރައިޓަން އާއި ދެކޮޅަށް ކުޅުނު މެޗެވެ. އެމެޗު ނިމިފައިވަނީ އެއް ލަނޑު އެއް ލަނޑުން އެއްވަރު ވެގެންނެވެ.

އެވަޓަން އަށް ކުރިއަށް އޮތީ ޔުއޭފާ ޔޫރޮޕާ ލީގުގައި ބުރާސްފަތި ދުވަހުގެރޭ ފްރާންސްގެ ލިޔޯން އާއި ދެކޮޅަށް ރަށުން ބޭރުގައި ކުޅެން ޖެހޭ މެޗެވެ. ޔޫރޮޕާ ލީގު ގްރޫޕް އީގައި ކުޅުނު ދެމެޗުގެ ތެރެއިން އެއްވެސް މެޗަކުން މޮޅުނުވެ، އެވަޓަން އޮތީ ގްރޫޕްގެ ފުލުގައެވެ.

ލިޔޯން އާދެކޮޅަށް ކުޅޭ މެޗަށްފަހު ދެން އޮތީ ޕްރިމިއަރ ލީގުގައި އާސެނަލް އާއި ދެކޮޅަށް ކުޅެން ޖެހެ މެޗާއި، ލެސްޓާ އާއި ދެކޮޅަށް ކުޅެންޖެހޭ މެޗެވެ. މީގެ އިތުރުން މިދެމެޗުގެ ދޭތެރޭގައި ކަރާބޯ ކަޕް ނުވަތަ އިނގިރޭސި ފުޓްބޯޅަ ލީގް ކަޕްގައި ޗެލްސީ އާއި ދެކޮޅަށް އެވަޓަން ނުކުންނަން ޖެހޭނެ އެވެ.