ދުބާއީއަށް ކުރެއްވި ދަތުރުފުޅަށްފަހު ރައީސް ޞާލިހު ރާއްޖެ ވަޑައިގެންފި
6 ޖެނުއަރީ 2021 | ބުދަ 07:50ކޮވިޑް-19 ގެ މިހާރުގެ ހާލަތާ ގުޅޭ ގޮތުން މަޝްވަރާކުރެއްވި
ރައީސް ޞާލިޙް އަބޫ ދާބީގެ ވަލީއަޙުދު ބޭއްވި ބައްދަލުކުރެއްވުމުގެ ތެރެއިން
އަމިއްލަ ދަތުރުފުޅެއްގައި ދުބާއީއަށް ވަޑައިގެންނެވުމަށްފަހު ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިހު ބުދަ ދުވަހު ރާއްޖެ ވަޑައިގަންނަވައިފިއެވެ.
ރައީސް ޞާލިހު ދުބާއީއަށް ވަޑައިގެންފައި ވަނީ މި ހަފްތާގެ އާދިއްތަ ދުވަހުއެވެ. ރައީސްގެ މި ދަތުރުފުޅުގައި ވަނީ، އަބޫ ދާބީގެ ވަލީއަޙުދު ޝައިޚް މުޙައްމަދު ބިން ޒައިދު އަލް ނަޙްޔާނާ ބައްދަލުކުރައްވާ ކޮވިޑް-19 ގެ މިހާރުގެ ހާލަތާ ގުޅޭ ގޮތުން މަޝްވަރާކުރައްވާފައެވެ.
މި ބައްދަލުކުރެއްވުމުގައި ރައީސް ޞާލިހު ވަނީ ޔުނައިޓެޑް އަރަބި އެމިރޭޓްސް (ޔޫއޭއީ) އިން ކޮވިޑް-19 އާ ގުޅިގެން ދައްކާފައިވާ ލީޑަޝިޕުގެ އިތުރުން، ފަހުގެ ޓެކްނޮލޮޖީގެ އެހީގައި ކުރަމުންދާ މަސައްކަތްތައް ފާހަގަކުރައްވައި ވަރަށް ބޮޑަށް ތާއުރީފުކުރައްވާފައިވާ ކަމަށެވެ.
މީގެ އިތުރުން ރާއްޖޭގައި އަބޫ ދާބީގެ ފަންޑުގެ އެހީތެރިކަމާއެކު ކުރިއަށްދާ މަޝްރޫއުތަކާ ބެހޭ ގޮތުން ދެ ބޭފުޅުން މަޝްވަރާ ކުރެއްވި ކަމަށާއި، ރާއްޖެއަށް ޔޫއޭއީން ވަމުންދާ އެހީތެރިކަން ފާހަގަކުރައްވައި ރައީސް ޞާލިޙު ޝުކުރުއަދާކުރައްވާފައިވާ ކަމަށްވެސް ރައީސް އޮފީހުން މައުލޫމާތުދެއެވެ.
މި ބައްދަލުކުރެއްވުމުގައި ދެ ގައުމުގެ ގުޅުން އިތުރަށް ބަދަހިކޮށް ކުރިއަށް އޮތްތަނުގައިވެސް މިގުޅުން އިތުރަށް ކުރިއަށް ގެންދިއުމަށް ދެ ފަރާތަށް ވެވެން އޮތް އެހީތެރިކަމާ ބެހޭ ގޮތުންވެސް މަޝްވަރާކުރައްވާފައިވާ ކަމަށް މައުލޫމާތުދެއެވެ. އަދި މި ބައްދަލުކުރެއްވުމުގައި އަބޫ ދާބީގެ ވަލީއަޙުދު ވަނީ ހުރިހާ ގޮތަކުން އަދި އެކި ދާއިރާތަކަށް ކުރިއެރުވުމަށް އަބަދުވެސް ރާއްޖެއަށް އެހީތެރިވާނެކަމުގެ ޔަގީންކަން ދެއްވާފައެވެ.
1970 ވަނަ އަހަރުން ފެށިގެން އަބޫ ދާބީން ވަނީ ރާއްޖެއަށް ވަރަށް ގިނަ ގޮތް ގޮތުން އެހީވެދީފައެވެ. އެގޮތުން ނިމިދިޔަ އަަހަރުގެ މާޗު މަހުގެ ނުވަވަނަ ދުވަހު އަބޫ ދާބީ ޑިވެލޮޕްމެންޓް ފަންޑުން ބަޖެޓް ސަޕޯޓުގެ ގޮތުގައި 50 މިލިޔަން ޑޮލަރު ވަނީ ދީފައެވެ.
ރައީސް ޞާލިހުގެ މި ދަތުރުފުޅަކީ ކޮވިޑް-19 ގެ ސަބަބުން ރާއްޖޭގެ ބޯޑަރު ބަންދުކުރުމަށްފަހު ހުޅުވާލި ފަހުން ގައުމުން ބޭރަށް ކުރެއްވި ފުރަތަމަ ދަތުރުފުޅެވެ.
