މި އަހަރަށް ރައްޔިތުންގެ މަޖިލީސް ހުޅުވާ ދުވަހަކީ ފެބްރުއަރީ މަހުގެ 4 ވަނަ ދުވަސް ކަމަށް ނިންމައި، އެ ދުވަހު ސަރުކާރު ބަންދު ވާނެ ކަމަށް ރައީސް އޮފީހުން ބުނެފިއެވެ.
އެ ދުވަހަކީ ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިހު ރައްޔިތުންގެ މަޖިލީހަށް ރިޔާސީ ބަޔާން އިއްވަވާ ދުވަހެވެ.
ކޮންމެ އަހަރެއްގެވެސް މަޖިލީސް ހުޅުވާ ދުވަހަކީ ސަރުކާރު ބަންދު ދުވަހެއްގެ ގޮތުގައި ކަނޑައަޅުއްވަމުން އަންނަ އިރު، ރައީސް އޮފީހުން ވިދާޅުވީ، ރައްޔިތުންގެ މަޖިލީހަށް މިއަހަރު ރައީސުލްޖުމްހޫރިއްޔާ ރިޔާސީ ބަޔާން އިއްވަވާ ދުވަސް ކަމަށްވާ 2021 ފެބުރުވަރީ ހަތަރެއް ވާ ބުރާސްފަތި ދުވަހަކީ، ސަރުކާރު ބަންދު ދުވަހެއް ކަމަށެވެ.
އެގޮތުން މިއަހަރުގެ ރިޔާސީ ބަޔާން އިއްވާ ޖަލްސާ ބޭއްވުމަށް ހަމަޖެހިފައިވަނީ ވަނީ މަޖިލީހުގެ ޖަލްސާތައް ފަށާ ގަޑި ކަމަށްވާ، އެ ދުވަހުގެ ހެނދުނު 09:00 ގައި، ރައްޔިތުންގެ މަޖިލިސް ކުރާ ގޭގައެވެ. މިއީ ރައީސް ޞާލިހުގެ ތިންވަނަ ރިޔާސީ ބަޔާނެވެ.
ރައީސް ޞާލިހުގެ ފުރަތަމަ ރިޔާސީ ބަޔާން އިއްވުމަށް ބޭއްވި ޖަލްސާ ބާއްވާފައިވަނީ ދަރުބާރު ގޭގައެވެ. ރިޔާސީ ބަޔާން އިއްވާ ޖަލްސާ މަޖިލީހުގެ އިދާރާއިން ބޭރުގައި ބާއްވަން ފެއްޓެވީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ.
ގައުމުގެ ހާލަތު ބަޔާންކޮށްދީ އަދި ގައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަން ޖެހޭ ކަންތައްތައް ހިމެނޭ ރިޔާސީ ބަޔާނެއް ރައްޔިތުންގެ މަޖިލީހަށް އިއްވެވުމަކީ ގާނޫނުއަސާސީގެ 84 ވަނަ މާއްދާގައިވާ ގޮތުގެ މަތިން، ރައީސުލްޖުމްހޫރިއްޔާ އަށް ލާޒިމްކުރާ ކަމެކެވެ. އެގޮތުން ރިޔާސީ ބަޔާނުގައި އާންމު ގޮތެއްގައި ގައުމުގެ ހާލަތު ބަޔާންކޮށްދޭއިރު، ގައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަންޖެހޭކަަމަށް ރައީސުލްޖުމްހޫރިއްޔާއަށް ފެންނަ ކަންތައްތަކުގެ މައްޗަށް އަލިއަޅުއްވާލައްވާނެއެވެ.
ފާއިތުވި އަހަރުގެ ރައްޔިތުންގެ މަޖިލީހުގެ ޖަލްސާތައް ނިންމާލާފައި ވަނީ ޑިސެންބަރު ހަތަރު ވަނަ ދުވަހުއެވެ.
