ސީއެމްބިއުލާންސް އެކްސިޑެންޓުގައި އަނިޔާވި އެކަކު އައިސީޔޫގައި
އައިސީޔޫގައި އޮތީ 43 އަހަރުގެ ފިރިހެނެއް
އަންގާރަ ދުވަހުގެ ރޭ އެކްސިޑެންޓުވި ސީ އެމްބިއުލާންސް
ހޯމަދުވަހުގެ ރޭ ސީއެމްބިއުލާންސް އަކާއި ލޯންޗެއް ޖެހި ހިނގި އެކްސިޑެންޓުގައި އަނިޔާވި އެކަކަށް އައިސީޔޫގައި ފަރުވާދޭން ފަށައިފި އެވެ.
ހޯމަ ދުވަހުގެ ރޭ އެކްސިޑެންޓުވީ މ. މުލިން ފުރައިގެން މާލެ ދަތުރުކުރި ސީއެމްބިއުލަންސް ލޯންޗަކާއި މާލެއިން ފުރައިގެން ދަތުރުކުރި "ޑްރީމް" ނަމަކަށް ކިޔާ ލޯންޗެކެވެ. އެއީ މާލެއާ ފ. ފީއައްޔާ ދެމެދު ދަތުރު ކުރާ ލޯންޗެކެވެ. އެމްއެންޑީއެފް އިން ބުނިގޮތުގައި އިތާފުށި ކައިރީގައި ހިނގި އެ އެކްސިޑެންޓުގެ ރިޕޯޓު ލިބުނީ ދަންވަރު 1:00 އެހާކަންހާއިރެވެ.
ބަލި މީހަކު ގޮވައިގެން ދަތުރުކުރި ސީ އެމްބިއުލާންސްގައި އަށް މީހުން ތިއްބެވެ. އޭގެ ތެރެއިން ދެމީހަކަށް އަނިޔާވި އިރު ބަލި މީހާއަށް އިތުރު އަނިޔާއެއް ވެފައެއް ނުވެ އެވެ. އެކްސިޑެންޓުވި ޑްރީމް ލޯންޗުގެ ކައްޕިއަށް ވެސް އެކިވަރުގެ އަނިޔާވެފައިވާ ކަމަށް އެމްއެންޑީއެފް އިން ބުނެފައި ވެއެވެ.
އަނިޔާވި ތިން މީހުންނަށް މިހާރު އައިޖީއެމްއެޗުގައި ފަރުވާދެމުން އަންނަ އިރު އޭގެ ތެރެއިން 43 އަހަރުގެ ފިރިހެނަކަށް އައިސީޔޫގައި ފަރުވާދެމުން އަންނަ ކަން އެ ހޮސްޕިޓަލުން ވަނީ ރާއްޖެ އެމްވީ އަށް ކަށަވަރުކޮށްދީފަ އެވެ. އައިޖީއެމްއެޗުން ބުނިގޮތިގައި ދެން ތިބި ދެމީހުންނަށް އެހާ ބޮޑު އަނިޔާއެއް ވެފައެއް ނުވެ އެވެ. އެ ދެމީހުންނަށް ފަރުވާދެމުން އަންނަނީ އެމަޖެންސީ ރޫމްގަ އެވެ.
