ސިނޯފަރމްގެ ވެކްސިން ބޭނުންކުރުމުގެ ހުއްދަ މިސްރުން ދީފި

ޗައިނާގެ ސިނޯފަރމް އިން ކޮވިޑް-19ށް އުފެއްދި ވެކްސިން ބޭނުންކުރުމުގެ ހުއްދަ މިސްރުން ދީފިއެވެ.

މިސްރުގެ ހެލްތު މިނިސްޓަރ ހާލާ ޒައިދު ވިދާޅުވީ ވެކްސިން ޖެހުމުގެ ޕްރޮގްރާމް މިމަހުގެ ފަހުކޮޅު ފަށާނެކަމަށެވެ.

މިވެކްސިން ބޭނުންކުރުމުގެ ހުއްދަ މިސްރުގެ ފަރމަސޫޓިކަލް އޮތޯރިޓީން ދީފައިވަނީ ހޮނިހިރު ދުވަހުއެވެ. މިވެކްސިންގެ ފުރަތަމަ ބެޗް މިސްރަށް ގެނެސްފައިވަނީ މިދިޔަ މަހުއެވެ. މިވެކްސިންގެ ދެވަނަ އަދި ތިން ވަނަ ޝިޕްމަންޓް ޖެނުއަރީ މަހުގެ ދެވަނަ ނުވަތަ ތިން ވަނަ ހަފްތާގައި މިސްރަށް އައުމަށް ހަމަޖެހިފައިވާކަމަށް މިނިސްޓަރ ވިދާޅުވިއެވެ. އަދި އެއާއެކު ވެކްސިންދޭން ފަށާނެ ކަމަށް މިނިސްޓަރ ވިދާޅުވިއެވެ.

މިއިން ކޮންމެ ބެޗެއްގައި 50،000 ޑޯޒް ހިމެނެއެވެ. ސިނޯފަރމް ވެކްސިންގެ 40 މިލިއަން ޑޯޒް މިސްރުން ގަންނާނެކަމަށް އެގައުމުން ވަނީ ބުނެފައެވެ.

މިސްރުގެ ހެލްތު މިނިސްޓްރީން ބުނެފައިވަނި އެންމެ ފުރަތަމަ ވެކްސިން ދޭ މީހުންގެ ތެރޭގައި ސިއްހީ މަސައްކަތްތެރިން ހިމެނޭކަމަށެވެ.

އަރަބި ދުނިޔޭގައި އެންމެ އާބާދީ ބޮޑު ގައުމުކަމަށްވާ މިސްރުގައި މިހާތަނަށް 140،000 މީހުންނަށް ވައިރަސް ޖެހިފައިވައިރު 7،800 މީހުން ވަނީ މަރުވެފައެވެ.

މިދިޔަ އަހަރު ފަހުކޮޅު މިސްރުގައި ކޮވިޑް ޖެހޭ މީހުންގެ އަދަދު ވަނީ އިތުރުވެފައެވެ. ކުރިން ދުވާލެއްގެ މައްޗަށް 100 އެއް ހާ މީހުންނަށް ކޮވިޑް ޖެހެމުން އައިނަމަވެސް އޮކްޓޯބަރ މަހާ ހިސާބުން ދުވާލެއްގެ މައްޗަށް އެގައުމުގައި ވައިރަސް ޖެހޭ މީހުންގެ އަދަދު ވަނީ 1400ށް އަރާފައެވެ.

ސިނޯފަރމްގެ މިވެކްސިން އަކީ 79 އިންސައްތަ ކާމިޔާބު ވެކްސިނެއްކަމަށް ސިނޯފަރމް އިން ވަނީ ބުނެފައެވެ.

މީގެއިތުރުން އެސްޓްރަޒެނިކާގެ ވެކްސިން މިސްރަށް ޖެނުއަރީ މަހުގެ ތިން ވަނަ ނުވަތަ ހަތަރު ވަނަ ހަފްތާގައި ލިބޭނެކަމަށް މިސްރުގެ ހެލްތު މިނިސްޓަރ ވިދާޅުވިއެވެ.

އަނެއްކޮޅުން ފައިޒަރގެ ވެކްސިން މިސްރަށް ހޯދުމަށްޓަކައި އެކުންފުންޏާއެކު ވާހަކަދައްކަމުން އަންނަކަމަށް މިސްރުން ބުނެއެވެ.