2020 ވަނަ އަހަރު ނިމުނުއިރު 250 ށްވުރެ ގިނަ ގެސްޓްހައުސް ވަނީ އޮޕަރޭޓްކުރަން ފަށާފައި

ކޮވިޑް-19 ގެ ސަބަބުން ރާއްޖޭގެ ގެސްޓްހައުސްގެ ވިޔަފާރު ހުއްޓިފައި އޮތުމަށްފަހު އަލުން ފަށައިގެންފައިވާއިރު، 2020 ވަނަ އަހަރު ނިމުނުއިރު 250 ށްވުރެ ގިނަ ގެސްޓްހައުސްތައް ވަނީ އޮޕަރޭޓްކުރަން ފަށާފައެވެ.

ޓޫރިޒަމް މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން ފާއިތުވި އަހަރު ނިމުނުއިރު ރާއްޖޭގެ 12 އަތޮޅެއްގެ 39 ރަށެއްގައި 257 ގެސްޓްހައުސް ވަނީ އޮޕަރޭޓްކުރަން ފަށާފައިއެވެ.

މީގެ އިތުރުން އަހަރު ނިމުނުއިރު 543 ޓޫރިސްޓް ފެސިލިޓީއެއްގައި 41,854 އެނދު އޮޕަރޭޓްކުރަން ފަށާފައިވާ ކަމަށްވެސް ޓޫރިޒަމް މިނިސްޓްރީން ބުނެއެވެ.

ކޮވިޑް-19 ގެ ސަބަބުން ރާއްޖޭގެ ފަތުރުވެރިކަން ހުއްޓުމަކަށް އައިސްފައި އޮތުމަށްފަހު އަލުން ހިނގައިގަތްއިރު އެންމެ ފުރަތަމަ އޮޕަރޭޓްކުރަން ފެށީ ރިސޯޓުތަކާއި ސަފާރީތަކެވެ. އަތޮޅުތެރޭގެ ރަށްތަކުގެ ގެސްޓްހައުސްތައް ހުޅުވުމުގެ ފުރުސަތު އޮކްޓޫބަރު މަހުގެ 15 ވަނަ ދުވަހު ދީފައިވާއިރު، މާލެ ސަރަހައްދުގެ ގެސްޓްހައުސްތައް ހުޅުވާފައިވަނީ ޑިސެމްބަރު މަހުގެ 14 ވަނަ ދުވަހުއެވެ.