އަވައްޓެރި އިންޑިއާއިންވެސް ކޮވިޑް-19 ގެ ވެކްސިނަކަށް ރަސްމީކޮށް ހުއްދަ ދިނުމަށް ތައްޔާރު ވެއްޖެއެވެ.

"ހިންދުސްތާން ޓައިމްސް' ގައި ރިޕޯޓް ކޮށްފައިވާ ގޮތުން އިންޑިއާގައި ދެ ދުވަސް ވަންދެން ވެކްސިން ޖެހުމުގެ ތައްޔާރީތައް ވެފައިވާއިރު، ހޮނިހިރު ދުވަހު ވެކްސިން ޖެހުމަށް މުޅި ޤައުމުގައި ޙަރަކާތެއް ހިންގުމަށް ވަނީ ނިންމާފައެވެ. އެގޮތުން އަންދްރަޕްރަދޭޝް، އައްސާމް ސްޓޭޓް، ގުޖުރާތު އަދި ޕަންޖާބުގައި ވަނީ ވެކްސިން ޖެހުމަށް "ޓެސްޓް ރަން" ތަކެއް ހިންގާފައެވެ.

އިންޑިއާގައި މިހާރުވެސް 3 ވެކްސިނެއް ރަސްމީކޮށް ބޭނުން ކުރުމުގެ ހުއްދަ ދިނުމަށް ހުށައެޅުންތަކެއް ލިބިފައިވާކަމަށް ހިންދުސްތާން ޓައިމްސްގައި ރިޕޯޓް ކޮށްފައިވެއެވެ. އޭގެ ތެރޭގައި ފައިޒަރ އަދި ބައޯއެންޓެކް ގެ ވެކްސިނާއި، އޮކްސްފޯރޑުގެ އެސްޓްރަޒެނެކާ ވެކްސިންގެ އިތުރުން، ބާރަތް ބައޯޓެކްގެ ކޮވެކްސް ވެކްސިން ހިމެނޭ ކަމަށް ރިޕޯޓުތައް ބުނެއެވެ. އޭގެ ތެރެއިންވެސް އިންޑިއާއިން ފުރަތަމަ ހުއްދަ ދޭނެ ވެކްސިނަކަށް ބެލެވެނީ އެސްޓްރަޒެނެކާ ނުވަތަ ބާރަތުގެ ވެކްސިނަށް ކަމަށްވެސް އެ ޤައުމުގެ މީޑިއާތަކުން ލަފާ ކުރެއެވެ.

ދުނިޔޭގެ އެކި ކަންކޮޅުތަކުން ވެކްސިންތަކަށް ހުއްދަ ދެމުންދާއިރު، ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ) އިން ވެސް ވަނީ ފައިޒަރ ގެ ވެކްސިން އިމަރޖެންސީކޮށް ބޭނުން ކުރުމުގެ ހުއްދަ ދީފައެވެ. އެއާއެކު ޔުނިސެފާއި، ޕޭން އެމެރިކަން ހެލްތް އޮގަނައިޒޭޝަން (ޕީއޭއެޗްއޯ) އިން އެ ވެކްސިންގެ ޑޯޒްތައް ޤައުމުތަކަށް ފޯރުކޮށްދިނުމަށް ފުރުސަތު ފަހިވެގެންދާނެ ކަމަށް ރިޕޯޓުތައް ބުނެއެވެ.

މުޅި ދުނިޔެއިން މިހާތަނަށް 83 މިލިއަނަށްވުރެ ގިނަ މީހުން ކޮވިޑަށް ޕޮޒިޓިވްވެފައިވާއިރު، 1 މިލިއަން 8 ލައްކައަށްވުރެ ގިނަ މީހުން މި ވައިރަސް ޖެހިގެން މަރުވެފައިވެއެވެ.