ގަވާއިދާ ޚިލާފަށް ވެލި ނެގުމުން ރޯޔަލް އައިލެންޑު ޖޫރިމަނާކޮށްފި
އެ ރިސޯޓު ޖޫރިމަނާ ކޮށްފައި ވަނީ 83،750 ރުފިޔާއިން
ރޯޔަލް އައިލެންޑް ރިޒޯޓުން ބ. ދިގުފަރުން ގަވާއިދާއި ހިލާފަށް ވެލި ނަގަނީ
ބ. ދިގުފަރުން ގަވަައިދާ ހިލާފަށް ވެލި ނެގުމުގެ ސަބަބުން ވިލާ ޝިޕިން އެންޑް ޓްރޭޑިން ކޮމްޕެނީ ޕްރައިވެޓް ލިމިޓެޑް ޖޫރިމާނާ ކޮށްފިއެވެ.
ރޯޔަލް އައިލެންޑް ރިސޯޓުގެ ބޭނުމަށް ދިގުފަރުން ވެލި ނެގުމާ ގުޅިގެން އެ ރިސޯޓު ޖޫރިމަނާ ކޮށްފައި ވަނީ 83،750 ރުފިޔާއިންނެވެ.
އެންވަޔަރަމެންޓަލް ޕްރޮޓެކްޝަން އޭޖެންސީ (އީޕީއޭ) އިން ބުނީ، ވިލާ ކުންފުނީގެ ދަށުން ހިންގަމުން އަންނަ ރޯޔަލް އައިލެންޑް ރިޒޯޓުން ބ. ދިގުފަރުން ގަވާއިދާއި ހިލާފަށް ގިނަ އަދަދެއްގެ ވެލި ނަގާފައިވާތީ އެ ކުންފުނި ޖޫރިމަނާ ކޮށްފައިވާ ކަމަށެވެ. އަދި ވެލި ނެގުމުގެ މަސައްކަތް ހުއްޓުމަށް އެންގުމުންވެސް މަސައްކަތް ކުރިއަށް ގެންގޮސްފައިވާ ކަމަށް އީޕީއޭއިން ބުނެފައިވެއެވެ.
ވިލާ ކުންފުނި ޖޫރިމަނާ ކުރީ ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ގާނޫނުގެ ދަށުން ހެދިފައިވާ ތިމާވެއްޓަށްދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދަށް ރިއާޔަތްކޮށް ޖުމްލަ 83,750 ރުފިޔާއިންނެވެ. އަދި މި ފައިސާ 30 ދުވަހުގެ ތެރޭގައި އީޕީއޭއަށް ދެއްކުމަށް އެ ކުންފުންޏަށް ވަނީ އަންގައިފަ އެވެ.
ރަށްތަކާ ބެހޭ މައުލޫމާތު ހިމެނޭ ސަރުކާރުގެ "އައިލްސް" ވެބްސައިޓުން ދައްކާ ގޮތުގައި ދިގުފަރަކީ، ރޯޔަލް އައިލެންޑް ރިސޯޓު ހިންގާ ބ. ހޮރުބަދޫއާއެކު ރިސޯޓު ތަރައްގީ ކުރުމަށް 50 އަހަރަށް އައިލެންޑް ޓްރެވަލް އެންޑް ޓްރޭޑް ޕްރައިވެޓް ލިމިޓެޑް ކިޔާ ކުންފުންޏަށް ލީސްކޮށްފައިވާ ރަށެކެވެ.
