އެމެރިކާގައި ކުޅެން ޝައުގުވެރިވޭ: މެސީ

އެމެރިކާގެ މޭޖާ ލީގު ސޮކާ (އެމްއެލްއެސް) ގައި ކުޅެން ޝައުގުވެރިވާ ކަމަށް ބާސެލޯނާގެ ކެޕްޓަން ލިއޮނެލް މެސީ ބުނެފިއެވެ.

މި ނިމުނު ޓްރާންސްފާ ބާޒާރުގައި މެސީ ވަނީ ބާސާ ދޫކޮށްލަން ނިންމައި، އެކަން އެ ކުލަބުގެ މެނޭޖުމަންޓަށް އަންގާފައެވެ. އެކަމަކު މެސީގެ އެއްބަސްވުމަށް ލުއި ދިނުމަށް ބާސާގެ މެނޭޖުމަންޓުން އެއްބަސްނުވުމާ ގުޅިގެން، މެސީ ވަނީ އޭނާގެ ނިންމުން ބަދަލުކޮށް މި ސީޒަނުގައި ބާސާގައި މަޑުކޮށްފައެވެ.

އެކަމަކު މި ސީޒަން ނިމުމުން ހިލޭ ޓްރާންސްފާއެއްގެ ދަށުން ކުލަބު ބަދަލުކުރުމުގެ ފުރުސަތު މެސީއަށް ލިބެއެވެ. އަދި ޖެނުއަރީ މަހު އޭނާ ބޭނުންނަމަ އިޚުތިޔާރުކުރާ ކުލަބަކާއެކު އެއްބަސްވުމެއްގައި ސޮއިކުރުމުގެ ފުރުސަތުވެސް މެސީއަށް ލިބެއެވެ.

ދާދި ފަހުން ސްޕެއިނުގެ ޓީވީއަކަށް ދިން އިންޓަވިއުއެއްގައި މެސީ ބުނީ ކުރިއަށް އޮތް ތަނުގައި ހަދާނެ ގޮތެއް އަދި ބުނަން ނޭނގޭ ކަމަށާއި، އެކަމަކު ޖެނުއަރީ މަހު އެހެން ކުލަބަކާއެކު މަޝްވަރާ ނުކުރާނެ ކަމަށެވެ. އޭގެ ބަދަލުގައި ސީޒަން ނިމެންދެން ވާގޮތެއް ބަލަން މަޑުކުރާނެ ކަމަށްވެސް މެސީ ބުންޏެވެ.

މެސީ އިތުރަށް ބުނީ ކެރިއަރުގެ ކޮންމެވެސް ހިސާބަކުން އެމެރިކާގައި ކުޅެ، އެ ލީގުގެ ވައްޓަފާޅި ތަޖުރިބާކުރަން ބޭނުންވާ ކަމަށާއި، އެކަމަކު ފަހުން އަނބުރާ ކޮންމެވެސް ހައިސިއްޔަތަކުން ބާސާއަށް އަންނަން ބޭނުންވާ ކަމަށެވެ. އަދި ކުލަބު ދޫކުރާނަމަ ބާސާއާ ވާދަވެރި ރެއާލް މެޑްރިޑާއި އެތުލެޓިކޯ މެޑްރިޑަށް ބަދަލުވުމަކީ ނުވާނެ ކަމެއް ކަމަށްވެސް މި އިންޓަވިއުގައި މެސީ ވަނީ ބުނެފައެވެ.

މި ސީޒަން ނިމުމުން މެސީގެ އެއްބަސްވުން ހަމަވާއިރު، އޭނާ ބަދަލުވުމުގެ ފުރުސަތު ބޮޑީ އިންގްލެންޑުގެ މެންޗެސްޓާ ސިޓީ ނުވަތަ ފްރާންސް ޕީއެސްޖީއަށް ކަމަށް ރިޕޯޓުތައް ބުނެއެވެ. މީގެ ކުރިން ސިޓީން މެސީ ހޯދުމަށް އޭނާއާއެކު މަޝްވަރާ ކުރި ކަމަށް ރިޕޯޓުތައް ބުނިއިރު، މެސީއާއެކު ސިޓީން ހަދާ އެއްބަސްވުމުގައި ވަކި ހިސާބަކުން ސިޓީގެ ހިއްސާ އޮންނަ އެމެރިކާގެ ކުލަބެއް ކަމަށްވާ ނިއު ޔޯކް ސިޓީ އެފްސީއަށްވެސް މެސީ ބަދަލުވާ ގޮތަށް ހިމަނާނެ ކަމަށް މީގެ ކުރިން މީޑިއާތަކުން ވަނީ ރިޕޯޓުކޮށްފައެވެ.

ބާސާގެ ސީނިއާ ޓީމުން 2004 ވަނަ އަހަރު ކެރިއަރު ފެށި މެސީއަކީ ބާސާގެ ތާރީޚުގައި އެޓީމަށް އެންމެ ގިނަ ލަނޑު ޖަހާދީފައިވާ އަދި އެއް ޓީމަކަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އެގޮތުން މިހާތަނަށް 644 ލަނޑު މެސީ ކާމިޔާބުކޮށްފައިވާއިރު، އޭނާ ވަނީ ބާސާއާއެކު ސްޕެނިޝް ލީގު 10 ފަހަރު ހޯދާފައެވެ. އަދި ޗެމްޕިއަންސް ލީގު ހަތަރު ފަހަރު ހޯދާފައި ވާއިރު، މެސީ ވަނީ މިހާތަނަށް ދުނިޔޭގެ އެންމެ މޮޅު ކުޅުންތެރިޔާއަށްދޭ ބަލޮންޑޯ އެވޯޑް ހަ ފަހަރު ހޯދާފައެވެ. މެސީ އަކީ މި އެވޯޑް އެންމެ ގިނައިން ހޯދި ކުޅުންތެރިޔާއެވެ.