އެމްއެމްޕީއާރުސީގެ ހިޔާނާތުގެ ފައިސާ ލޯންޑަރ ކުރުމުގައި ކުރީގެ ރައީސް އަބްދުﷲ ޔާމީނާއެކު ބައިވެރިވިކަމުގެ ތުހުމަތު ކުރެވޭ ސަން އިންވެސްޓްމަންޓް ޕްރައިވެޓް ލިމިޓެޑުން ދިފާއީ ހެއްކެއްގެ ގޮތުގައި ރައީސް ޔާމީނުގެ ނަން ހުށައަޅައިފިއެވެ.

މި މައްސަލައިގައި ހޯމަ ދުވަހުގެ ހެނދުނު ކްރިމިނަލް ކޯޓުގައި ކުރިއަށްދިޔަ އަޑުއެހުމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ސަން ކުންފުނީގެ ޤާނޫނީ ވަކީލު އަލީ ޝާހު ވިދާޅުވީ، ހޯމަ ދުވަހު 2 ޝަފަވީ ހެއްކެއް ކުންފުނިން ހުށައަޅާފައިވާ ކަމަށެވެ. އެއީ ކުރީގެ ރައީސް އަބްދުﷲ ޔާމީނުގެ އިތުރުން، ކުންފުނީގެ މުވައްޒަފެއް ކަމަށްވާ މުހައްމަދު ޝާމިލްއެވެ.

ޝާހު ވިދާޅުވީ، ރައީސް އަބްދުﷲ ޔާމީނު ދިފާއީ ހެއްކެއްގެ ގޮތުގައި ހުށައަޅުއްވާފައިވަނީ އެމަނިކުފާނު 1 މިލިއަން ޑޮލަރު ޖަމާ ކުރުމުން އޭގެ އަގަށް ޖެހޭ ދިވެހި ފައިސާ ސަން ކުންފުނިން ރައީސް ޔާމީނަށް ދޫކުރިކަން ސާބިތު ކުރުމަށް ކަމަށެވެ.

އޭގެ އިތުރުން، ހޯމަ ދުވަހުގެ އަޑުއެހުމުގައި 37 ކިތާބީ ހެއްކެއްވެސް ހުށައަޅާފައިވާނެ ކަމަށް ޝާހު ވިދާޅުވިއެވެ.

މި މައްސަލައިގައި މިހިނގާ ޑިސެމްބަރު މަހުގެ 20 ވަނަ ދުވަހުވެސް އަޑުއެހުމެއް ބާއްވާފައިވާއިރު، އެ ދުވަހުގެ އަޑުއެހުމުގައި ދައުލަތުން ވަނީ ހެކި ހުށައަޅާފައެވެ. އެގޮތުން، ސަން އިންވެސްޓްމަންޓް ކުންފުނީގެ މައްޗަށް ދައުވާ ސާބިތުކުރުމަށް ދައުލަތުގެ ފަރާތުން ވަނީ ކުރީގެ ނާއިބު ރައީސް އަހުމަދު އަދީބާއި އެމްއެމްޕީއާރުސީގެ ކުރީގެ މެނޭޖިންގ ޑިރެކްޓަރ އަބްދުﷲ ޒިޔާތާއެކު އިތުރު ބައެއް ހިމެނޭގޮތަށް ހެކިން ހުށަހަޅާފައެވެ. އަދި ކިތާބީ ހެކިވެސް މައްސަލައިގެ ފޯމާއެކު ހުށަހަޅާފައިވާނެ ކަމަށް ދައުލަތުގެ ގާނޫނީ ވަކީލު ވިދާޅުވިއެވެ.

އޭގެކުރިން ބޭއްވި އަޑުއެހުމުގައި ވަކީލު އަލީ ޝާހު ވިދާޅުވެފައި ވަނީ، މި މައްސަލާގައި ހިމެނޭ ފައިސާއަކީ ކުރީގެ ރައީސް އަބްދުﷲ ޔާމީންގެ އެންގެވުމަށް، ރިޝްވަތުގެ ގޮތުގައި ހޯދާފައިވާ ފައިސާކަން ދައުލަތުގެ އެއްވެސް އިދާރާއަކުން ކަނޑައަޅާފައި ނުވާ ކަމަށެެވެ. އަދި ޑޮލަރު މާރުކުރުމުގެ ނަމުގައި ފައިސާގެ މުއާމަލާތް ހިންގާފައިވާކަމަށް ދައުވާގައި ބުނާއިރު، އެކަން ކަނޑައަޅާނީ ފައިނޭންޝަލް އިންސްޓިޓިއުޓްތަކުން ނުވަތަ މަރުކަޒީ ބޭންކް ކަމަށްވާ އެމްއެމްއޭއިން ކަމަށެވެ.

ރައްދުގައި ދައުލަތުގެ ވަކީލު ވިދާޅުވެފައިވަނީ، ރ. ފުއްގިރި މައްސަލާގައި ދައުވާ އުފުލާފައިވާ އިތުރު ފަރާތްތައް ހިމެނޭއިރު، ރައީސް ޔާމީން ވެސް ހިމެނޭ ކަމަށެވެ. އަދި ސަން އިންވެސްޓްމަންޓް ކުންފުނީގެ މައްޗަށް އުފުލާފައިވާ މަނީ ލޯންޑަރިންގ ކުށުގެ ދައުވާއާ ގުޅިގެން، އެއީ ކޮރަޕްޝަނުގެ ގޮތުގައި ހޯދި ފައިސާކަން ކޮންމެހެން ޝަރީއަތުން ސާބިތުވެފައި އޮންނަން ނުޖެހޭ ކަމަށެވެ.

ޑޮލަރު މާރުކުރުމުގެ ހުއްދަ، މި މައްސަލާގައި ދައުވާކުރާ ސަން ކޮންސްޓްރަކްޝަން އެންޑް އިނޖިނިއަރިންގ ކުންފުންޏާއި ސަން އިންވެސްޓްމަންޓް ކުންފުންޏަށް ދޫކޮށްފައި ނުވާކަން އެމްއެމްއޭއިން ލިބިފައިވާ މައުލޫމާތުތަކުން އެނގޭ ކަމަށް ވެސް މީގެ ކުރިން ބޭއްވި އަޑުއެހުމެއްގައި ދައުލަތުގެ ވަކީލު ވިދާޅުވެފައިވެއެވެ.

ރ. ފުއްގިިރި މައްސަލައިގައި ސަން އިންވެސްޓްމަންޓް ކުންފުނީގެ މައްޗަށް އުފުލާފައިވަނީ މަނީ ލޯންޑަރިންގ ކުށުގެ ދައުވާއެވެ.