ސިވިލް ސަރވިސް މަޤާމުތަކަށް ކޮންމެހެން ކުރަންޖެހޭ އިއުލާނުތައް މިއަދު ކުރަންޖެހޭ
އެ އުސޫލަށް އަންނަ ޖެނުއަރީ މަހުގެ 1 ވަނަ ދުވަހުން ފެށިގެން ޢަމަލު ކުރުމަށް ނިންމާފައިވޭ
ވެލާނާގެ - ސަރުކާރުގެ ގިނަ އޮފީސްތައް ވެލާނާގޭގައި ހިންގަމުންދޭ
ސިވިލް ސަރވިސް ކޮމިޝަން (ސީއެސްސީ) ގެ މަޤާމުތަކަށް ކޮންމެހެން ކުރަންޖެހޭ އިއުލާނުތައް ބުދަ ދުވަހުގެ ކުރިން ކުރަންޖެހޭނެ ކަމަށް އެ ކޮމިޝަނުން ބުނެފިއެވެ.
އަންގާރަ ދުވަހު އެ ކޮމިޝަނުން ބުނީ، ސިވިލް ސަރވިސްގެ މަޤާމުތަކަށް މީހުން އައްޔަނު ކުރުމުގެ އައު އުސޫލު އެކުލަވާލާފައިވާ ކަމަށެވެ. އަދި އެ އުސޫލަށް އަންނަ ޖެނުއަރީ މަހުގެ 1 ވަނަ ދުވަހުން ފެށިގެން ޢަމަލު ކުރުމަށް ނިންމާފައިވާކަން އެ ކޮމިޝަނުން ވަނީ ފާހަގަ ކޮށްފައެވެ.
ސީއެސްސީން ބުނީ، އައު އުސޫލަށް އަމަލު ކުރުމަށް ތައްޔާރު ވުމުގެ ގޮތުން 23 ޑިސެމްބަރު 2020 ވާ ބުދަ ދުވަހުން ފެށިގެން ސިވިލް ސަރވިސްގެ މަޤާމުތަކަށް މީހުން ހޯދުމަށް އިއުލާނު ކުރުން ހުއްޓާލަން ޖެހޭ ކަމަށެވެ. އެއާއެކު، އިދާރާތަކުން ކޮންމެހެން އިއުލާނު ކުރަންޖެހޭ މަޤާމެއް އޮތްނަމަ، 23 ޑިސެމްބަރު 2020 ގެ ކުރިން ދިވެހި ސަރުކާރުގެ ގެޒެޓުގައި އެ އިއުލާނެއް ގެޒެޓުކުރަން ޖެހޭކަންވެސް ސީއެސްސީން ފާހަގަ ކޮށްފައިވެއެވެ.
ސިވިލް ސަރވިސްގެ އިދާރާތަކުން ވަޒީފާތަކަށް މީހުން ހޯދުމާއި ޢައްޔަންކުރުމުގައި ދިމާވެފައިވާ ދަތިތައް ޙައްލުކޮށް، ވަޒީފާއަށް އައްޔަންކުރުމުގެ މަރުހަލާތައް އިތުރަށް ތަފްޞީލުކޮށް ދިނުމުގެ ގޮތުން، އަމަލުކުރަމުންދާ އުޞޫލުތަކާއި މިންގަނޑުތައް އިޞްލާޙުކޮށް، ގައިޑްލައިންތަކެއް މިހާރު ވަނީ އާންމު ކޮށްފައެވެ.
ސީއެސްސީން ބުނީ އަންނަ ޖެނުއަރީ މަހުގެ 1 ވަނަ ދުވަހުން ފެށިގެން "ސިވިލް ސަރވިސްގެ ވަޒީފާތަކަށް މީހުން ހޮވުމާއި އައްޔަންކުރުމުގެ މިންގަނޑުތަކާއި އުޞޫލުތައް 2021" އާ އެއްގޮތަށް އިދާރާތަކުން ވަޒީފާތަކަށް އިޢުލާނު ކުރަމުން ގެންދާ ގޮތަށް ކޮމިޝަނުން ނިންމާފައިވާ ކަމަށެވެ. އެހެން ނަމަވެސް، 2020 ޑިސެންބަރު 23 ވަނަ ދުވަހުގެ ނިޔަލަށް އިދާރާތަކުން ސިވިލް ސަރވިސްގެ ވަޒީފާތަކަށް ކޮށްފައިވާ އިޢުލާނުތަކަށް މުވައްޒަފުން ހޮވުމާއި އައްޔަންކުރުމުގެ މަރުހަލާތައް ކުރިއަށް ގެންދާނީ "ސިވިލް ސަރވިސްގެ ވަޒީފާތަކަށް މީހުން ހޮވުމާއި އައްޔަންކުރުމުގެ މިންގަނޑުތަކާއި އުޞޫލުތައް 2018" އާ އެއްގޮތަށެވެ.
