އީގަލްސްގައި އަނިޔާގެ މައްސަލަތައް ގިނަ: މޯހަން

ކުލަބު އީގަލްސްގައި އަނިޔާގެ މައްސަލަތައް ގިނަ ކަމަށާއި، އެކަމަކުވެސް ޓީސީ ސްޕޯޓްސް ކުލަބާ ދެކޮޅަށް ނުކުންނާނީ ރަނގަޅު ފައިޓެއްދީ ތިން ޕޮއިންޓް ހޯދުމަށް ކަމަށް އީގަލްސްގެ ކޯޗު މުޙައްމަދު ޝިޔާޒް (މޯހަން) ބުނެފިއެވެ.

ރާއްޖޭގެ ފުޓްބޯޅަ ސީޒަން ފެށުމަށް ކުޅުނު އެފްއޭ ޗެރިޓީ ޝީލްޑް މެޗަށްފަހު އީގަލްސްގެ ތަޖުރިބާކާރު ފޯވާޑް އަޙްމަދު ރިޒުވާން (ރިޒޭ) ހުރީ އަނިޔާގައެވެ. އެގޮތުން ލީގުގެ ފުރަތަމަ މެޗުގައި ސުޕަ ޔުނައިޓެޑް ސްޕޯޓްސް (ސަސް) އަތުން 1-0 ން އީގަލްސް ބަލިވި މެޗުގައި އޭނާ ކުޅެފައެއް ނުވެއެވެ. އަދި ލީގުގައި ޓީސީއާ ދެކޮޅަށްވެސް އީގަލްސް ނުކުންނާނީ ރިޒޭ ނުލައެވެ.

ދިރާގު ދިވެހި ޕްރިމިއާ ލީގުގައި އާދީއްތަ ދުވަހުގެރޭ ޓީސީއާ ދެކޮޅަށް ނުކުތުމުގެ ކުރިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި މޯހަން ބުނީ ސަސްގެ މެޗަށްފަހު ރަނގަޅު ފަރިތަކުރުންތަކެއް އަދި ކުރެވިފައިނުވާ ކަމަށާއި، ބައެއް ކުޅުންތެރިން އަނިޔާގައި ތިބިއިރު، އަނެއްބައި ކުޅުންތެރިންގެ ފަރާތުން ވަރުބަލިކަން އަދިވެސް ނުފިލާ ކަމަށެވެ.

އަދި އީގަލްސްއަށް ދިމާވެފައިވާ އެންމެ ބޮޑު މައްސަލައަކީ ތަޖުރިބާކާރު ކުޅުންތެރިން މަދުވުން ކަމަށާއި، ލިމިޓެޑް ސްކޮޑަކާއެކު އޭއެފްސީ ކަޕަށް ދާއިރު އަނިޔާގެ މައްސަލައެއް ނެތި ދާން ބޭނުންވާ ކަމަށްވެސް ބުންޏެވެ. އެހެންކަމުން ލީގުގެ މެޗުތަކާ ކުރިމަތިލާއިރު ކުޅުންތެރިންނަށް އަނިޔާވުމުގެ ބިރު އޮންނަ ކަމަށްވެސް ވަނީ ބުނެފައެވެ.

މޯހަން އިތުރަށް ބުނީ އީގަލްސްގެ ކުޅުންތެރިންނާ މެދު އިތުބާރު ބޮޑު ކަމަށާއި، ކުރިއަށް އޮތް މެޗުގައި ނަތީޖާ ނެރެވޭނެ ކަމުގެ ޔަގީންކަން އެބައޮތް ކަމަށެވެ. އަދި މި މެޗަކީ ކުޅި ބެލުންތެރިން ބަލާ ހިތްވާފަދަ ރީތި ފުޓްބޯޅަ މެޗަކަށް ވެގެންދާނެ ކަމަށް އުންމީދުކުރާ ކަމަށްވެސް އޭނާ ބުންޏެވެ.

އީގަލްސް މެޗުގެ ކުރިން ޓީސީގެ ކޯޗު މުޙައްމަދު ޝާޒްލީ (ޝާޒް) ބުނީ މި މެޗަށް ޓީސީން ނުކުންނައިރު ފުރަތަމަ މެޗުގެ ނަތީޖާއާ މެދު ނުވިސްނާނެ ކަމަށާއި، ލީގުގައި މާޒިޔާ އަދި ވެލެންސިއާ ނަގާފައި ދެން ހުރި ޓީމުތަކަކީ ހަމަހަމަ ޓީމުތަކެއް ކަމަށެވެ. އެހެންކަމުން މި މެޗަކީ ވާދަވެރި މެޗަކަށްވާނެ ކަމަށް އުންމީދުކުރާ ކަމަށްވެސް ބުންޏެޗވެ.

ޝާޒްލީ ބުނީ ޓީސީގައި ޒުވާން ސްކޮޑެއް އޮތުމަކީ ބޮޑު ޗެލެންޖެއް ކަމަށާއި، ޓީމުގައި ތަޖުރިބާކާރު ކުޅުންތެރިން ނެތުން އެއީ މިކަހަލަ މެޗަކަށް ނުކުންނައިރު އިތުރު ގޮންޖެހުންތަކަކާ ކުރިމަތިލާން ޖެހޭނެ ކަމެއް ކަމަށެވެ. އަދި އީގަލްސްއަކީ މިފަހަކަށް އައިސް ރާއްޖޭގެ ފުޓްބޯޅައިގައި ނަން ކިޔޭނެ ޓީމެއް ކަމަށާއި، އީގަލްސްގައި އެއްކޮށް ގިނަ މެޗުތަކެއް ކުޅެފައި ތިބި ކުޅުންތެރިންތަކެއް ތިބުމުން އެޓީމުގެ ވަރުގަދަކަން އިތުރު ކަމަށްވެސް ބުންޏެވެ. އަދި މިހުރިހާ ކަމަކާއެކުވެސް ޓީސީން މި މެޗަށް ނުކުންނާނީ ތިން ޕޮއިންޓް ހޯދުމުގެ އަޒުމުގައި ކަމަށްވެސް އޭނާ ބުންޏެވެ.

ލީގުގެ ދެވަނަ މެޗުގައި އީގަލްސްއާ ދެކޮޅަށް ޓީސީން ނުކުންނައިރު، އެ ޓީމު ވަނީ ފުރަތަމަ މެޗުން ދަ ގްރާންޑޭ ސްޕޯޓްސް ކުލަބު އަތުން 3-0 ން ބަލިވެފައެވެ.

ދިރާގު ދިވެހި ޕްރިމިއާ ލީގުގައި އީގަލްސް އާއި ޓީސީ ބައްދަލުކުރާ މެޗު ފަށާނީ އާދީއްތަ ދުވަހުގެރޭ 21:00 ގައެވެ.