އިންތިގާލީ އިންސާފުގެ ބޭނުމަކީ ތެދު ހާމަކޮށް، މައާފުކުރުމުގެ ރޫހު އާލާކުރުން ކަމަށް ރައްޔިތުންގެ މަޖިލިހުގެ ރައީސް، ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހުކުރު ދުވަހު އެމްޑީޕީ ހަރުގޭގައި ބޭއްވި ނޫސްވެރިންގެ ބައްދަލުވުމެއްގައި އިންތިގާލީ އިންސާފުގެ ގާނޫނަކުން ހާސިލުކުރަން ބޭނުންވާ މަގުސަދުތައް ބަޔާންކުރައްވަމުން ރައީސް ނަޝީދު ވިދާޅުވީ މިއީ މުޖުތަމައުގެ ތެރޭގައި އުފެދިފައިވާ ބައިބައިވުމާއި ހިތްހަމަނުޖެހުމާއި ބަދަލުހިފުމުގެ ރޫހު ނައްތާލާ، މުޅި މުޖުތަމައުގައި ސުލްހަ މަސަލަސްކަން ގާއިމްކުރުމުގެ މަގުސަދުގައި އެމްޑީޕީން ރައްޔިތުންނަށް ވީވައުދެއް ކަމަށެވެ. އަދި މި ގާނޫނުން އާހިރުގައި ހާސިލްކުރަން ބޭނުންވާ ނަތީޖާއަކީ، އަނިޔާ ލިބިފައިވާ ފަރާތްތަކަށް ލިބިފައިވާ ގެއްލުންތަކުން ނަޖާވެ އެކަމުން ތަސައްލީއެއް ހޯދައިދިނުން ކަމަށް ވިދާޅުވިއެވެ.
އިންތިގާލީ އިންސާފުގެ ބިލު އެންމެ ފުރަތަމަ ރައްޔިތުންގެ މަޖިލިހަށް ހުށައެޅުނުއިރު، ބިލު ފަރުމާކުރެވިފައި އޮތީ 2012 ވަނަ އަހަރާ 2018 ވަނަ އަހަަރާ ދޭތެރޭ ހިނގާފައިވާ މައްސަލަތައް ބަލާ ގޮތަށެވެ. އެހެންނަމަވެސް، ރައްޔިތުންގެ މަޖިލިހުން މި ބިލަށް ހިޔާލު ހޯދަން ހުޅުވާލުމުން ލިބުނު ހުށައެޅުންތަކުގެ މައްޗަށް ބިނާކޮށް، 1 ޖަނަވަރީ 1953 އިން ފެށިގެން 17 ނޮވެމްބަރު 2018 ނިޔަލަށް ހިނގާފައިވާ މައްސަލަތައް ބެލޭނެ ގޮތަށް ވަނީ އިސްލާހުކޮށްފައެވެ.
މި ބަދަލަށް އަލިއަޅުއްވާލާ ވާހަކަ ދައްކަވަމުން ރައީސް ނަޝީދު ވިދާޅުވީ އެއީ ރައްޔިތުންގެ ހިޔާލާ މަޝްވަރާގެ މަތިން އެއަށް އިތުރުކުރަން ބޭނުންވެގެން ގެނެވުނު ބަދަލެއްކަމަށެވެ. އަދި މި ބަދަލާ ގުޅިގެން ރާއްޖޭގެ އެންމެ ފުރަތަމަ ޖުމްހޫރިއްޔާގެ ދުވަސްވަރުން ފެށިގެން ހިނގާފައިވާ ކަންކަމާއި ގުޅިގެން ހުށައެޅޭ މައްސަލަތައް ބެލުމުގެ ބާރު އޮމްބަޑްސްމަންއަށް ލިބިގެން ގޮސްފައިވާ ކަމަށް ވިދާޅުވިއެވެ.
އިންތިގާލު އިންސާފުގެ ގާނޫނުގައިވާ ގޮތުން، އިންތިގާލީ އަދާލަތު ގާއިމްކުރުމުގެ ޒިންމާ މަތިކުރެވިފައި ވަނީ އޮމްބަޑްސްމަން އޮފީހާއެވެ. އަދި މި އޮފީހުގައި ތިއްބަވާނެ ތިން އޮމްބަޑްސްމަނުން ކަނޑައަޅުއްވާނީ ރައީސުލްޖުމްހޫރިއްޔާއެވެ. އަދި އެ ތިން އޮމްބަޑްސްމަނުންގެ ތެރެއިން އެކަކު، ޗީފް އޮމްބަޑްސްމަންގެ ގޮތުގައި ކަނޑައެޅޭނެއެވެ.
އިންތިގާލީ އަދާލާތު ގާއިމްކުރުމުގައި އޮމްބަޑްސްމަންގެ އޮފީހުން ދެވޭ ހައްލުތަކުގެ ތެރޭގައި ތެދު ހާމަކޮށް މައާފު ކުރުމާއި، ބައެއް ހާލަތްތަކުގައި ބަދަލު ދިނުން ހިމެނެއެވެ. ރައީސް ނަޝީދު ވިދާޅުވީ މި ގާނޫނު ފަރުމާކުރެވިފައި ވަނީ، އޮމްބަޑްސްމަންގެ އޮފީހުން ހައްލުނުވާ މައްސަލަތައް ކޯޓު މެދުވެރިކޮށް ހައްލުކުރަން ހުށައެޅޭ ގޮތަށް ކަމަށެވެ. ހަމައެހެންމެ، އެހެން އެއްވެސް ކޮމިޝަނެއްގެ އިހުތިސާސް ހިނގާ މައްސަލައެއްނަމަ، އެ މައްސަލަތައް އެ ކޮމިޝަންތަކަށް ފޮނުވައިގެން ބެލޭނެ ކަމަށް ވިދާޅުވިއެވެ.
އިންތިގާލީ އިންސާފުގެ ގާނޫނުގައި އޮމްބަޑްސްމަންގެ އޮފީހާ މަތިކުރެވިފައިވާ ޒިންމާތަކުގެ ތެރޭގައި، ރާއްޖޭގައި އަނިޔާ ލިބިފައިވާ މީހުންގެ ދަފްތަރެއް އެކުލަވާލުން ހިމެނެއެވެ. އޭގެ އިތުރުން އިންތިގާލީ އިންސާފަށް ރައްޔިތުން އަހުލުވެރިކުރުމުގެ ގޮތުން، ރާއްޖޭގެ އެކިކަންކޮޅުތަކުގައި ހޭލުންތެރިކުރުމުގެ ޕްރޮގްރާމްތަކެއް ރާވާ ހިންގަން ޖެހެއެވެ. މި ޕްރޮގްރާމްތަކަކީ ތެދު ހާމަކޮށް، މައާފު ކުރުމުގެ ރޫހު އާލާކުރުމުގެ ގޮތުން ހިންގޭ ޕްރޮގްރާމްތަކެއް ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދުގެ ވާހަކަފުޅުގައި، ރާއްޖޭގެ ޖަލުތަކުގައި ހިނގާފައިވާ ބައެއް ހާދިސާތަކަށް ރިއާޔަތްކޮށް ވިދާޅުވީ އިންތިގާލީ އިންސާފުގެ ބޭނުމަކީ އަނިޔާކުރި މީހާ އައިސް މައާފަށް އެދުން ކަމަށެވެ. އަދި އަނިޔާކުރިނަމަ އެކަންކުރި ބަޔަކު އަމިއްލަ އިސްނެގުމުގެ މަތިން މައާފަށް އެދެން ގޮވާލެއްވިއެވެ. ވަކިން ހާއްސަކޮށް، ރާއްޖޭގެ އެކި މުއައްސަސާތަކާއި އިދާރާތަކުގައި ތިބި މިފަދަ ތުހުމަތުކުރެވޭ ފަރާތްތަކުން "ވިސްނެވުމަށް" ރައީސް ނަޝީދު އިލްތިމާސްކުރެއްވިއެވެ.
އިންތިގާލީ އިންސާފުގެ ގާނޫނުގައިވާ ގޮތުން، މައާފަށް ނޭދިއްޖެ ހާލަތެއްގައި ޖިނާއީ ދައުވާއެއް ކުރަން އެކަށީގެންވާ ވަރަށް ހެކި ހުރެއްޖެނަމަ، އެ މައްސަލަތައް ޕްރޮސިކިއުޓަރ ޖެނެރަލް އޮފީހަށް ހުށައެޅޭނެއެވެ. ނަމަވެސް، ޖިނާއީ ދައުވާއެއް ކުރުމަށް ހުށައެޅޭނީ، އޮމްބަޑްސްމަންގެ އޮފީހުން އެ މައްސަލައެއް ބެލުމަށްފަހު، ހައްލު ނުލިބޭ ހާލަތެއްގައެވެ.
