ލަންކާގެ މުސްލިމުން ވަޅުލަން ރާއްޖެ ގެންނަން ޖެހުމަކީ ލަދު ގަންނަން ޖެހޭ ކަމެއް: މަންގަލާ
15 ޑިސެމްބަރު 2020 | އަންގާރަ 06:47އޭނާ ވިދާޅުވީ ލަންކާގެ ރައްޔިތުންނަށް އުފަންވި ފަސްގަނޑުގައި ޖަނާޒާގެ ކަންކަން ކުރުމުގެ ހައްގު ލިބެންވާނެ ކަމަށް
ލަންކާގެ ކުރީގެ ފިނޭންސް މިނިސްޓަރ މަންގަލާ ސަމަރަވީރާ
ކޮވިޑް-19 ޖެހިގެން ސްރީ ލަންކާގައި ނިޔާވާ މުސްލިމުންނަށް އިސްލާމީ އުޞޫލުތަކާ އެއްގޮތަށް ޖަނާޒާގެ ކަންތައްތައް ހަމަޖައްސައިދިނުމަށް އަވަށްޓެރި ގައުމެއްގެ އެހީތެރިކަން ހޯދަން ޖެހުމަކީ ލަދު ގަންނަން ޖެހޭ ކަމެއް ކަމަށް ލަންކާގެ ކުރީގެ ފިނޭންސް މިނިސްޓަރ މަންގަލާ ސަމަރަވީރާ ވިދާޅުވެއްޖެއެވެ.
ވައިރަހުގެ ލަންކާގައި ނިޔާވާ މުސްލިމުންނަށް އިސްލާމީ އުޞޫލުތަކާ އެއްގޮތަށް ޖަނާޒާގެ ކަންތައްތައް ހަމަޖައްސައިދިނުމަށް ދިވެހި ސަރުކާރުގެ އެހީތެރިކަން ހޯދުމަށް ލަންކާގެ ރައީސް ގޯޓާބަރަ ރާޖަޕަކްސަ އެދިވަޑައިގެންނެވިކަން ހާމަކުރައްވާ ފޮރިން މިނިސްޓަރ އަބްދުﷲ ޝާހިދު ކުރެއްވި ޓުވީޓެއްގެ ސްކްރީންޝޮޓެއް ހިއްސާ ކުރައްވާ މަންގަލާ ކުރެއްވި ޓުވީޓެއްގައި ވަނީ އަމިއްލަ ގައުމުގެ ރައްޔިތުންގެ ޖަނާޒާގެ ކަންކަން ހަމަޖެއްސުމަށް އެހެން ގައުމެއްގެ އެހީތެރިކަން ހޯދަން ޖެހުމަކީ ލަދުގަންނަން ޖެހޭ ކަމެއް ކަމަށް ވިދާޅުވެ ނުރުހުން ފާޅުކުރައްވާފައެވެ.
އޭނާ ވިދާޅުވީ ލަންކާގެ ރައްޔިތުންނަށް އެބަޔަކު ގަބޫލުކުރާ ގޮތުގެ މަތިން،، އުފަންވި ފަސްގަނޑުގައި ޖަނާޒާގެ ކަންކަން ކުރުމުގެ ހައްގު ލިބެންވާނެ ކަމަށެވެ.
ވައިރަހުގެ ސަބަބުން މަރުވާ ލަންކާގެ މުސްލިމުން ވަޅުލުމުގައި ރާއްޖޭގެ އެހީތެރިކަމަށް އެގައުމުގެ ސަރުކާރުން އެދުނީ އިސްލާމީ އުޞޫލުތަކާ އެއްގޮތަށް ޖަނާޒާގެ ކަންތައްތައް ފުރިހަމަކުރުމަށް ލަންކާގެ ސަރުކާރަށް ދަތިތަކެއް ކުރިމަތިވެފައިވާތީ އެވެ. މިފަދަ މުސްލިމުންނަށް އިސްލާމީ އުޞޫލުތަކާ އެއްގޮތަށް ޖަނާޒާގެ ކަންތައްތައް ހަމަޖައްސައިދިނުމަށް އެހީތެރިކަން ހޯއްދެވުމަށް އެދިވަޑައިގެން ސްރީލަންކާގެ ރައީސް ގޯތާބަޔަ ރާޖަޕަކްސަ ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަރިހަށް ސިޓީފުޅެއް ފޮނުއްވާފައެވެ.
މި ސިޓީފުޅާ ގުޅިގެން ފޮރިން މިނިސްޓަރު ޝާހިދު ވިދާޅުވެފައިވަނީ އެހީތެރިކަން ފޯރުކޮށްދިނުމުގައި އިސްލާމީ އުޚުއްވަތްތެރިކަން ދެމެހެއްޓުމުގެ މަތިވެރި ނިޔަތާއި މަގުސަދުގައި، އަދި ރާއްޖެއާ ލަންކާއާ ދެމެދު އޮތް ޒަމާންވީ ގުޅުމުގެ މައްޗަށް ދިވެހި ސަރުކާރުން ރިއާޔަތްކުރާނެ ކަމަށެވެ.
