ކޮވެކްސްގެ ތެރެއިން ރާއްޖެއަށް ފުރަތަމަ ވެކްސިން ޖެހޭނީ ދެ ލައްކަ މީހުންނަށް
ރާއްޖޭގެ އާބާދީގެ 20 އިންސައްތައަށް ހިލޭ ވެކްސިން ހޯދުމަށް ހުށައެޅި ހުށައެޅުން ރަސްމީކޮށް ޑަބްލިޔުއެޗްއޯއިން ގަބޫލުކޮށްފައިވޭ
މީހެއްގެ ސާމްޕަލް ނަގަނީ
ކޮވެކްސް ފެސިލިޓީގެ ދަށުން ރާއްޖެއަށް އެންމެ ފުރަތަމަ ވެކްސިން ލިބޭނީ އާބާދީގެ ދެ ލައްކަ މީހުންނަށްކަމަށް "ރާއްޖެއެމްވީ" އަށް މައުލޫމާތު ލިބިއްޖެއެވެ.
"ރާއްޖެއެމްވީ" އަށް އިތުބާރުކުރެވޭ މަސްދަރަކުން ކަށަވަރުކުރެވިފައިވާ ގޮތުގައި ކޮވެކްސް ފެސިލިޓީގެ ދަށުން ރާއްޖެއަށް ލިބޭ ވެކްސިނެއްގެ ހަތަރު ލައްކަ ޑޯޒް ލިބޭނެއެވެ. ވެކްސިން ރާއްޖެ ގެނައުމުގައި ލަސްތަކެއް ވަނީ ވެކްސިން ރައްކާކޮށްފައި ބަހައްޓާނެ ތަންތަނާ މެދު އަދި ގޮތެއް ނުނިންމޭތީ ކަމަށްވެސް ވަނީ މައުލޫމާތު ލިބިފައެވެ.
މީގެ އިތުރުން ވެސް ސަރުކާރުން ފަންޑުކޮށްގެން އިތުރު ވެކްސިން ހޯދުމަށް އަންނަނީ މަސައްކަތްކުރަމުން ކަމަށް ސަރުކާރުން ވަނީ ބުނެފައެވެ.
މިދިޔަ ބުރާސްފަތި ދުވަހު ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ސެންޓަރުގެ ތަރުޖަމާނު ޑޮކްޓަރ ނަޒްލާ ރަފީޤް ވިދާޅުވީ، ކޮވެކްސް ފެސިލިޓީން ރާއްޖޭގެ އާބާދީގެ 20 އިންސައްތައަށް ހިލޭ ވެކްސިން ހޯދުމަށް ހުށައެޅި ހުށައެޅުން ރަސްމީކޮށް ޑަބްލިޔުއެޗްއޯއިން ގަބޫލުކޮށްފައިވާ ކަމަށެވެ.
ޑރ. ނަޒްލާ ވިދާޅުވީ، ވެކްސިން ޖެހުމަށްޓަކައި ވާން ޖެހޭ ތައްޔާރީތައް ބައިނަލްއަޤުވާމީ ފްރޭމްވާކުގެ ދަށުން ކުރިއަށްދާ ކަމަށެވެ. އެގޮތުން އެކަމަށްޓަކައި ސްޓިއަރިންގ ކޮމިޓީއެއް އެކުލަވާލުމާއި، ވެކްސިން ރައްކާކުރާނެ ކޯލްޑް ސްޓޯރޭޖް ހެދުމާއި، އިދާރީ މަސައްކަތްތައް ވެސް މި ވަގުތު ހަލުވި މިނެއްގައި ކުރިއަށްދާކަން ޑރ. ނަޒްލާ ފާހަގަ ކުރެއްވިއެވެ.
ޑރ ނަޒްލާ އިތުރަށް ވިދާޅުވީ، ކޮވެކްސް ފެސިލިޓީގެ ތެރެއިން ވެކްސިން ހޯދުމަށް ޕްރޮޕޯސަލްތައް ތައްޔާރުކުރުމުގެ މަސައްކަތާއި، ވެކްސިން ލިބޭ މިންވަރަކުން ވެކްސިން ޖަހާނެ ފަރާތްތައް ގިންތިކުރުން ފަދަ ކަންކަން މިހާރުވެސް ބާރު ސްޕީޑުގައި ކުރިއަށްދާ ކަމަށެވެ. އަދި އަމާޒަކީ ވެކްސިން ލިބެންވާއިރަށް ވާން ޖެހޭ ހުރިހާ ތައްޔާރީތަކެއްވެ ނިމިފައި ހުރުންކަން ޑރ. ނަޒްލާ ފާހަގަ ކުރެއްވިއެވެ.
ޑރ. ނަޒްލާ ވިދާޅުވީ، ވެކްސިން ލިބެނީ ބައިބަޔަށް ބަހައިގެން ކަމަށްވާއިރު، ރާއްޖޭގައިވެސް ވެކްސިން ޖަހާނެ ތަރުތީބެއް އެކުލަވާލާފައިވާނެ ކަމަށެވެ. އެކަމާ ގުޅޭގޮތުން ޑރ. ނަޒްލާ މުސްތަފާ ވެސް ވާހަކަ ދައްކާފާއިވާއިރު، ޑރ. ނަޒްލާ މުސްތަފާ ވިދާޅުވީ، ސިއްހީ ޚިދުމަތްތެރިންނާއި، ހައި ރިސްކް މީހުންގެ އިތުރުން، އިޖުތިމާއީ އަދި އިޤްތިސާދީ ދަތިތައް ކުޑަ ކުރުމަށް ވެސް އިސްކަން ދީފައިވާނެކަން ޑރ. ނަޒްލާ ފާހަގަ ކުރެއްވިއެވެ.
އެގޮތުން ރައްކާތެރި އަދި ބަލިން ރައްކާތެރިކަން ފޯރުކޮށްދޭކަން ޔަޤީން ކުރެވިފައިވާ 4 ވެކްސިނެއް ފާހަގަ ކުރެވިފައިވާކަން އެޗްއީއޯސީން މީގެ ކުރިންވެސް ފާހަގަ ކުރެއްވިއެވެ.
ދުނިޔޭގެ ގައުމުތަކުގައި މިހާރު ޖަހަމުން ދަނީ ފައިޒަރގެ ވެކްސިނެވެ. އެހެންނަމަވެސް އެ ވެކްސިނަކީ -10 ޑިގްރީ ސެލްސިއަސް އާއި -70 ޑިގްރީ ސެލްސިއަސްއާ ދެމެދު ރައްކާކޮށްފައި ބެހެއްޓޭ ވެކްސިނެކެވެ. އެހެންކަމުން ގައުމުތަކުން އަންނަނީ އެ ވެކްސިން ރައްކާކޮށްފައި ބެހެއްޓެމަށް ވަކި ތަންތަން ހަދަމުންނެވެ.
