ބައިޑަންއަށް އިންތިޚާބު ކާމިޔާބުވިކަން ކަށަވަރުކުރާ އިލެކްޓޯރަލް ކޮލެޖްގެ ވޯޓުލުން ފަށައިފި
މިވޯޓުތައް ގުނާނީ ޖެނުއަރީ މަހުގެ 6 ވަނަ ދުވަހު
އެމެރިކާގެ އިންތިޚާބީ ރައީސް ޖޯ ބައިޑަން
އެމެރިކާގެ ރިޔާސީ އިންތިޚާބު ޖޯ ބައިޑަން އަށް ކާމިޔާބުވިކަން ކަށަވަރުކުރުމަށްޓަކައި އޮންނަ އެންމެ ފަހު މަރުހަލާކަމުގައިވާ އިލެކްޓޯރަލް ކޮލެޖްގެ ވޯޓުލުން ފަށައިފިއެވެ.
އެމެރިކާގެ ރިޔާސީ އިންތިޚާބުގެ ކަންކަން އޮންނަ ގޮތުންނަމަ ރައީސް ކަމަށް މީހަކު އައްޔަނުކުރެވިގެންދާނީ އިލެކްޓޯރަލް ކޮލެޖް ނުވަތަ ސްޓޭޓްތަކުގައި މެދުގައި އޮންނަ ސިސްޓަމްގެ ތެރެއިންނެވެ. މި ސިސްޓަމްގެ ތެރެއިން ޓެކްނިކަލް ގޮތުން ބަލާނަމަ އެކަން ނިމިގެންދާނީ އިލެކްޓޯރަލް ކޮލެޖުން ޑިސެމްބަރ މަހުގެ 14 ވަނަ ދުވަހު ވޯޓުލުމުންނެވެ.
އެމެރިކާގެ 50 ސްޓޭޓްގެ އިލެކްޓޯރަލް ކޮލެޖްގެ އިލެކްޓަރސް އިން ވޯޓުލަމުންދާއިރު މިފަހަރު މި ވޯޓަށް ކުރީ އަހަރުތަކަށްވުރެ ބޮޑަށް ސަމާލުކަން ވަނީ ލިބިގެންގޮސްފައެވެ. އެއީ ނޮވެމްބަރ މަހުގެ 3 ވަނަ ދުވަހު އޮތް އެމެރިކާގެ ރިޔާސީ އިންތިޚާބުގައި ޓްރަމްޕަށް ކުރިމަތިވެވަޑައިގެންނެވި ނާކާމިޔާބީ ގަބޫލުކުރެއްވުމަށް ޓްރަމްޕް ދެކޮޅު ހައްދަވަމުން ގެންދަވާތީއެވެ. އަދި ތަކުރާރުކޮށް ސްޓޭޓްތަކުގެ އިލެކްޓަރސް އިން ބަދަލުކުރުމަށް ޓްރަމްޕް މަސައްކަތް ކުރައްވާފައިވާތީއެވެ.
އެހެންނަމަވެސް މިފަހަރުގެ އިލެކްޓޯރަލް ކޮލެޖްގައި "ފެއިތްލެސް އިލެކްޓަރސް" އަށް އިންތިޚާބުގެ ނަތީޖާ އެހެންގޮތަކަށް ބަދަލުކޮށްލެވުމަކީ ވަރަށް ނާދިރުކަމެއްކަމަށް ރިޕޯޓްތައް ބުނެއެވެ. އެއީ ބައިޑަން އަށް އިލެކްޓޯރަލް ވޯޓުގެ 538 ވޯޓުގެ ތެރެއިން 306 ވޯޓު ލިބިވަޑައިގަނެފައިވާތީއެވެ. މީގެއިތުރުން ދާދިފަހުން ސްޓޭޓްތަކުގެ ޕޮޕިޔުލަރ ވޯޓު ލިބޭ ކެންޑިޑޭޓް ނޫން އެހެން ކެންޑިޑޭޓަކަށް އިލެކްޓޯރަލް ކޮލެޖްގައި ތިބޭ މެމްބަރުން ވޯޓުދޭނަމަ އެމީހުންނަށް އަދަބު ދެވޭނެކަމަށް ސުޕްރީމްކޯޓުން ނެރުނު އަމުރާއެކުވެސް މިފަހަރު "ފެއިތްލެސް އިލެކްޓަރސް" ތިބުމަކީ ނާދިރުކަމެއްކަމަށް ވަނީ ބެލެވިފައެވެ.
އެމެރިކާގެ ގިނަ ސްޓޭޓްތަކުގައި ރައްޔިތުންގެ ގިނަ ވޯޓު ލިބިފައިވާ ކެންޑިޑޭޓަށް އިލެކްޓަރސް އިން ވޯޓުދޭން މަޖުބޫރުވާގޮތަށް ޤާނޫނު ވަނީ ބައްޓަންކޮށްފައެވެ. އަދި އެގޮތާއި ޚިލާފުވާ އިލެކްޓަރސް ނުވަތަ "ފެއިތްލެސް އިލެކްޓަރސް" އަށް އެކަމުގެ ސަބަބުން ޖޫރިމަނާ ދައްކަންޖެހެއެވެ.
އިލެކްޓަރސް އިން ވޯޓުލާނީ ލިޔުމުންނެވެ. އެއަށްފަހު މިވޯޓުތައް ދާނީ ވޮޝިންގޓަނަށެވެ. މިވޯޓުތައް ގުނާނީ ޖެނުއަރީ މަހުގެ 6 ވަނަ ދުވަހުއެވެ. އިންތިޚާބުވާ ރައީސަކު ހުވާކުރުން އޮންނާނީ ޖެނުއަރީ މަހުގެ 20 ވަނަ ދުވަހުއެވެ.
ރިޕޯޓްތައް ބުނާގޮތުން އިލެކްޓޯރަލް ކޮލެޖްގެ ވޯޓަށްފަހު އިންތިޚާބީ ރައީސް ޖޯ ބައިޑަން ގައުމާ މުޚާތަބުކުރައްވާ ވާހަކަދައްކަވާނެއެވެ.
