ކޮވިޑްގައި މަރުވާ ލަންކާ މުސްލިމުން ރާއްޖޭގައި ވަޅުލާން ދީނީ އިލްމުވެރިންގެ ތާއީދު
މިއީ އަވައްޓެރި މުސްލިމުންނަށް ދެވުނު ވަރަށް ބޮޑު އެހީތެރިކަމެއް - ޑރ. އިޔާޒް
ދީނީ އިލްމުވެރިޔާ ޑރ. މުހައްމަދު އިޔާޒު
ކޮވިޑް-19 ޖެހިގެން އަވައްޓެރި ސްރީލަންކާގައި ނިޔާވަމުން އަންނަ މުސްލިމުން ރާއްޖޭގައި ވަޅުލުމުގެ ކަންކަން ހަމަޖައްސަން ތާއީދުކުރައްވާ ކަމަށް ދީނީ އިލްމުވެރިންތަކެއް ވިދާޅުވެއްޖެއެވެ.
ދީނީ އިލްމުވެރިޔާ ޑރ. މުހައްމަދު އިޔާޒު އެކަމާއި ގުޅޭގޮތުން ކުރެއްވި ޓްވީޓެއްގައި ވިދާޅުވީ އަވައްޓެރި ލަންކާގައި ކޮވިޑްގެ ބަލިމަޑުކަމުގައި ނިޔާވާ މުސްލިމުންނާ މެދު ވަރަށް އިހާނެތިގޮތަކަށް ކަންތައް ކުރެވެމުންދަނިކޮށް، އެ މީހުންނަށް އެހީތެރިކަމުގެ އަތެއް ފޯރުކޮށްދެއްވާ އެ އިހާނެތިކަމުން މުސްލިމުން ސަލާމަތްކުރަން ދިވެހި ސަރުކާރުން ނިންމި ނިންމުމަކީ ވަރަށް ރަނގަޅު ނިންމެވުމެއްކަމަށެވެ. އަދި މިއީ މުސްލިމު އަވަށްޓެރިންނަށް ދެވުނު ވަރަށް ބޮޑު އެހީތެރިކަމެއް ކަމަށް ޑރ. އިޔާޒު ވިދާޅުވިއެވެ.
ޑރ. އިޔާޒުގެ އިތުރުން ދީނީ އިލްމުވެރިޔާ އަލީ ޒައިދު ވެސް ވަނީ ދިވެހި ސަރުކާރުން ލަންކާގެ ސަރުކާރަށް މިކަމުގައި އެހީތެރިވެދިނުމަށް ނިންމި ނިންމުން ފާހަގަކުރައްވާ އެއީ ލިބުނު ވަރަށް ބޮޑު އުފަލެއްކަމަށް ވިދާޅުވިއެވެ. ދީނީ އިލްމުވެރިން މި މޭރުމުން ޓްވީޓްކުރައްވާފައި ވަނީ ލަންކާގެ މުސްލިމުން ރާއްޖޭގައި ވަޅުލުމާ ގުޅޭގޮތުން އާންމުންގެ މެދުގައި ޚިޔާލު ތަފާތުވުންތައް އުފެދިފައިވާ ދަނޑިވަޅެއްގައެވެ.
ކޮވިޑް-19 ޖެހިގެން ލަންކާގައި ނިޔާވާ މުސްލިމުންނަށް އިސްލާމީ އުޞޫލުތަކާ އެއްގޮތަށް ޖަނާޒާގެ ކަންތައްތައް ހަމަޖައްސައިދިނުމަށް އެހީތެރިކަން ހޯދުމަށް އެ ގައުމުން އެދުނީ، ރައީސް ގޯތާބަޔަ ރާޖަޕަކްސަ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަރިހަށް ފޮނުއްވި ސިޓީފުޅެއްގައެވެ. އެ ސިޓީފުޅުގައި ރާޖަޕަކްސަ ވަނީ އިސްލާމީ އުސޫލުތަކާ އެއްގޮތަށް މުސްލިމުންގެ ޖަނާޒާގެ ފުރިހަމަކުރުމަށް ލަންކާ ސަރުކާރަށް ދަތިތަކެއް ކުރިމަތިވެފައިވާ ކަން ފާހަގަކުރައްވާފައެވެ.
މި ސިޓީފުޅާ ގުޅިގެން ފޮރިން މިނިސްޓަރު އަބްދުﷲ ޝާހިދު ވިދާޅުވީ އެހީތެރިކަން ފޯރުކޮށްދިނުމުގައި އިސްލާމީ އުޚުއްވަތްތެރިކަން ދެމެހެއްޓުމުގެ މަތިވެރި ނިޔަތާއި މަގުސަދުގައި، އަދި ރާއްޖެއާ ލަންކާއާ ދެމެދު އޮތް ޒަމާންވީ ގުޅުމުގެ މައްޗަށް ދިވެހި ސަރުކާރުން ރިއާޔަތްކުރާނެ ކަމަށެވެ. އަދި ލަންކާގެ މުސްލިމުންނަށް ފޯރުކޮށްދެވޭ ޚާއްސަ އެހީތެރިކަމެއްގެ ގޮތުގައި ލަންކާގެ ރައީސްގެ މި ހުށަހެޅުއްވުމުގައި އެދިވަޑައިގެންފައިވާ ކަންކަން އިންތިޒާމް ކުރެވޭނެ ގޮތެއް އޮތްތޯ ބެލުމަށް ވެސް ރައީސް ސޯލިހު ސަރުކާރުގެ ކަމާ ބެހޭ އިދާރާތަކުގެ މެދުގައި މަޝްވަރާ ކުރަމުން ގެންދަވާ ކަމަށް މިނިސްޓަރު ޝާހިދު ވިދާޅުވިއެވެ.
ސްރީލަންކާގައި ކޮވިޑް-19 ޖެހިގެން މަރުވާ މުސްލިމުންގެ ހަށިގަނޑު އަންދަމުންދާތީ، އެކަމުގެ ކަންބޮޑުވުންތައް ލަންކާގައި އަންނަނީ ފާޅު ކުރަމުންނެވެ. ހާއްސަކޮށް އެ ގައުމުގެ ބައިމަދު މުސްލިމް އާބާދީގެ މެދުގައި މިކަމުގެ ނުތަނަވަސްކަން އުޅޭއިރު، މިއީ ލަންކާގެ ގާނޫނު އަސާސީން އެ މީހުންނަށް ލިބިދީފައިވާ ހައްގެއް ނިގުޅައިގަތުމުގެ އަމަލެއްގެ ގޮތުގައި ލަންކާ މުސްލިމުން އަންނަނީ ސިފަކުރަމުންނެވެ.
