އަނެއްކާވެސް ރެކޯޑެއް، މިފަހަރު އެއް ދުވަހުގެ ތެރޭގައި 4000 އަށްވުރެ ގިނަ ފަސިންޖަރުން
13 ޑިސެމްބަރު 2020 | އާދީއްތަ 08:21ޑިސެމްބަރ 12 ވަނަ ދުވަހު ރާއްޖެއަށް ޖުމްލަ 4،137 ޕަސެންޖަރުން ވަނީ ރާއްޖެ އައިސްފައި
ވެލާނާ އިންޓަނޭޝަނަލް އެއަރޕޯޓަށް ފައިބަނީ
ކޮވިޑް-19 ގެ ސަބަބުން ބޯޑަރު ބަންދުކޮށްފައި އޮތުމަށް ފަހު އަލުން ހުޅުވާލިފަހުން އެއްދުވަހާ 4،000 އަށް ވުރެ ގިނަ ފަސިންޖަރުން އައިސްފައިވާކަމަށް ވެލާނާ އިންޓަނޭޝަނަލް އެއަރޕޯޓުން ހާމަކޮށްފިއެވެ.
ވީއައިއޭގެ ޓާމިނަލް އޮޕަރޭޝަންސްގެ މެނޭޖިން ޑިރެކްޓަރ އިބްރަހިމް ހުސެން ވިދާޅުވީ ޑިސެމްބަރ 12 ވަނަ ދުވަހު ރާއްޖެއަށް އައި ޖުމްލަ ފަސިންޖަރުންގެ އަދަދު 4،137 އަށް އަރާފައިވާކަމަށެވެ. އެގޮތުން މި ޑިސެމްބަރ މަހުގެ ފަސް ވަނަ ދުވަސް އަދި 12 ވަނަ ދުވަސް މިހާތަނަށް އެއްދުވަހާ އެންމެ ގިނަ އަދަދެއްގެ ފްލައިޓް އޮޕަރޭޓްކުރި ދުވަސްތަކަށް ވެފައިވާއިރު، މި ދެދުވަހު އިންޓަނޭޝަނަލް 20 ފްލައިޓް އޮޕަރޭޓްކޮށްފައިވާ ކަމަށް އިބްރާހިމް ފާހަގަކުރެއްވިއެވެ.
އިބްރާހިމް ވިދާޅުވީ ޑިސެމްބަރ 12 ވަނަ ދުވަހަކީ ރާއްޖެއިިން އެންމެ ގިނަ އަދަދެއްގެ ފަސިންޖަރު ފުރި ދުވަސްކަމަށާއި 12 ވަނަ ދުވަހު 3،017 ފަސެންޖަރުން ރާއްޖެއިން ފުރާފައިވާ ކަމަށެވެ.
ޑޮމެސްޓިކް އޮޕަރޭޝަންތަކަށް ބަލާލާއިރު، 31 ޑޮމެސްޓިކް ފްލައިޓް އޮޕަރޭޓްކޮށްފައިވާއިރު، 725 ފަސިންޖަރުން ވަނީ މާލެ އައިސްފައެވެ. އަދި 946 ފަސިންޖަރުން ވަނީ މާލެ އިން ފުރާފައެވެ.
މީގެއިތުރުން ޑިސެމްބަރ 12 ވަނަ ދުވަހު އަށް ޕްރިވެޓް ޖެޓް ވަނީ ވެލާނާ އިންޓަނޭޝަނަލް އެއަރޕޯޓަށް ޖައްސާފައެވެ. އަދި 102.63 ޓަނުގެ މުދާ ޑިސެމްބަރ 12 ވަނަ ދުވަހު ރާއްޖެއަށް އެތެރެކޮށްފައިވާއިރު، 28.74 ޓަނުގެ މުދާ ވަނީ ރާއްޖެއިން ބޭރުކޮށްފައެވެ.
ޑިސެމްބަރ 12 ވަނަ ދުވަސްވެގެން ގޮސްފައި މިވަނީ ރާއްޖޭގެ ބޯޑަރު އަލުން ހުޅުވާލިފަހުން ވީއައިއޭގެ ހަރަކާތްތައް އެންމެ ގިނަ ދުވަހަށެވެ.
