ޓެކްސަސްގެ ހުށަހެޅުން ސުޕްރީމް ކޯޓުން ބޭރުކޮށްލުމުން އިންތިޚާބުގެ ނަތީޖާ ބާތިލް ކުރުމަށް ޓްރަމްޕަށް ގޮތް ހުސްވެއްޖެ
12 ޑިސެމްބަރު 2020 | ހޮނިހިރު 00:32މިއީ ބައިޑަން ކާމިޔާބުކުރައްވާފައިވާ މައި ހަތަރު ސްޓޭޓެއްގެ އެތައް މިލިއަން ވޯޓެއް ބާތިލްކަމަށް ކަނޑައެޅުމަށް ހުށަހެޅި ހުށަހެޅުމެއް
އެމެރިކާގެ ރައީސް ޑޮނަލްޑް ޓްރަމްޕް
އެމެރިކާގެ އިންތިޚާބުގެ ނަތީޖާ ކަނޑައަޅާ މައި ހަތަރު ސްޓޭޓެއްގެ ނަތީޖާ ބާތިލްކަމަށް ކަނޑައެޅުމަށް ޓެކްސަސް އިން އެމެރިކާގެ ސުޕްރީމްކޯޓުގައި އެދުނު އެދުން ބަލައިނުގަތުމުގެ ސަބަބުން އެމެރިކާގެ ރައީސް ޑޮނަލްޑް ޓްރަމްޕަށް އިންތިޚާބުގެ ނަތީޖާ އެމަނިކުފާނުގެ ކޮޅަށް އަނބުރާލުމަށް އޮތް ހުރިހާ މަގެއް ބަންދުވެއްޖެއެވެ.
ޓެކްސަސްގެ އެޓަރނީ ޖެނެރަލް ހުށަހެޅި މިހުށަހެޅުމަކީ އިންތިޚާބުގެ ނަތީޖާ ނެރުމުގައި މުހިންމު ދައުރެއް އަދާކުރި ޕެންސިލްވީނިއާ، މިޗިގަން، ޖޯރޖިއާ އަދި ވިސްކޮންސިންގެ އެތައް މިލިއަން ވޯޓެއް ބާތިލްކަމަށް ކަނޑައެޅުމެވެ. މި ހަތަރު ސްޓޭޓުވެސް ކާމިޔާބުކުރައްވާފައިވަނީ އެމެރިކާގެ އިންތިޚާބީ ރައީސް ޖޯ ބައިޑަން އެވެ.
ޓެކްސަސް އިން ސުޕްރީމްކޯޓަށް ހުށަހެޅި ހުށަހެޅުމަށް 19 ސްޓޭޓެއްގެ އެޓަރނީ ޖެނެރަލުންނާއި ކޮންގްރެސްގައި ހިމެނޭ 127 ރިޕަބްލިކަން މެމްބަރުން ވަނީ ތާއީދުކޮށްފައެވެ.
މިހުށަހެޅުމަށް ތާއީދުހޯދާ މިކަމަށް މީހުން ހޭލުންތެރިކުރުމަށް ޓްރަމްޕްގެ ޤާނޫނީ ވަކީލުން ވަނީ އެކި ހިސާބުތަކަށް ދަތުކުރުކޮށްފައެވެ. އަދި އެތައް ހަފްތާތަކެއްވަންދެން ވަނީ މިހުށަހެޅުމުގައި ހުރިކަންކަން އެއީ ތެދުކަން ދެއްކުމަށް މަސައްކަތްކޮށްފައެވެ.
އެމެރިކާގެ ރިޔާސީ އިންތިޚާބު ޖޯ ބައިޑަން ކޮޅަށް ބުރަވި ހިސާބުން އެމެރިކާގެ ރައީސް ޑޮނަލްޑް ޓްރަމްޕް ގެންދަވަނީ އިންތިޚާބުގައި އޮޅުވާލުންތަކެއް އުޅޭކަމަށް ތަކުރާރުކޮށް ވިދާޅުވަމުންނެވެ. އެހެންނަމަވެސް ޓްރަމްޕްގެ މިތުހުމަތުތައް ސާބިތުކުރެވޭވަރުގެ ހެއްކެއް ޓްރަމްޕަށް ދެއްކެވިފައެއްނުވެއެވެ. އަދި އެކަން ކޯޓެއްގައިވެސް ސާބިތު ކުރެވިފައެއްނުވެއެވެ.
ޓްރަމްޕް ވަނީ އެކި ގޮތްގޮތުން އިންތިޚާބުގެ ނަތީޖާ ޓްރަމްޕްގެ ކޮޅަށް އަނބުރާލެއްވުމަށް މަސައްކަތްކޮށްފައެވެ. އޭގެތެރޭގައި ކޯޓުތަކުގައި މައްސަލަތައް ލުމުގެ އިތުރުން އިންތިޚާބުގެ ނަތީޖާ އާ މެދު ފަހު ބަސް ބުނާ ސްޓޭޓްތަކުގެ އިލެކްޓޯރަލް އިން ބަދަލުކުރުމަށްވެސް ވަނީ މަސައްކަތްކުރައްވާފައެވެ.
މިއީ އެމެރިކާގެ ތާރީޚުގައިވެސް މިހާތަނަށް އިންތިޚާބަކަށްފަހު ބަލިވި ކެންޑިޑޭޓެއްގެ ފުށުން ފެނިފައިނުވާ ކަންތައްތަކެއް ކަމަށް ވުމާއެކު މިކަމާއި ގުޅިގެންވެސް ޓްރަމްޕަށް ވަނީ ފާޑުކިޔުންތައް އަމާޒުވެފައެވެ.
