އައްޑޫ ސިޓީން އަތުލައިގަތް 98 ކިލޯގެ މަސްތުވާތަކެތީގެ މައްސަލައިގައި ހަތް މީހެއްގެ މައްޗަށް ދައުވާކޮށްފި
11 ޑިސެމްބަރު 2020 | ހުކުރު 17:05މި މައްސަލައިގެ ދައުވާތައް ހުށަހަޅާފައިވަނީ އައްޑޫ ސިޓީ ހިތަދޫ ކޯޓަށް
އައްޑޫ ސިޓީގައި ފުލުހުން ހިންގި ހާއްސަ މި އޮޕަރޭޝަނުގައި ކަނޑުމަތިން ބަޔަކު ހައްޔަރު ކުރަނީ
ނިމިދިޔަ އޮކްޓޫބަރ މަހުގެ 3 ވަނަ ދުވަހު އައްޑޫ ސިޓީ ކަނޑުމަތީގައި ހިންގި މަސްތުވާތަކެތީގެ އޮޕަރޭޝަންގައި 98 ކިލޯގެ މަސައްތުވާތަކެއްޗާއެކު ހައްޔަރުކުރި ހަތް މީހެއްގެ މައްޗަށް 10 ދަޢުވާއެއް އުފުލައިފިއެވެ.
މިކަން ހާމަކުރައްވާ ކުރެއްވި ޓްވީޓެއްގައި ޕްރޮސެކިއުޓަރ ޖެނެރަލް ހުސައިން ޝަމީމުވަނީ، އެ މައްސަލަ އައްޑޫ ސިޓީ ހިތަދޫ ކޯޓަށް ހުށަހަޅާފައިވާކަމަށް ވިދާޅުވެފައެވެ. އަދި މި މައްސަލައިގައި ހައްޔަރުކުރެވުނު މީހުންނަކީ ދެކުނުގެ އަތޮޅުތަކަށް މަސްތުވާތަކެތި ޓްރެފިކް ކުރާ ބޮޑު ނެޓްވޯކެއްގައި ހަރަކާތްތެރިވާ ބަޔަކުކަމަށް ވިދާޅުވިއެވެ.
ޝަމީމު އިތުރަށް ވިދާޅުވީ، މި މައްސަލަ ތަހުގީގު ކުރެއްވި ފުލުހުންގެ ތަހުގީގު ޓީމުން ހިންގީ ރަނގަޅު ތަހުގީގެއް ކަމަށާއި ޕްރޮސެކިއުޓަރ ޖެނެރަލްގެ އޮފީހުގެ ޑްރަގް ޔުނިޓުގެ ބޭފުޅުން، އެ ބޭފުޅުންގެ މަސައްކަތް ފުރިހަމަކޮށްފިކަމަށެވެ. އަދި ދެން އޮތީ ރަނގަޅު ކޭހެއް ކޯޓަށް ހުށަހެޅުންކަމަށް ވިދާޅުވެ ޕީޖީވަނީ އެކަމަށްވެސް ތައްޔާރަށް ތިބިކަމަށް ހާމަކުރައްވާފައެވެ.
އައްޑޫ ސިޓީގެ ކަނޑުގެ ސަރަހައްދުގައި ހިންގި މި އޮޕަރޭޝަނުގައި ގިނަ އަދަދެއްގެ މަސްތުވާތަކެއްޗާއެކު 14 މީހަކު ފުލުހުންގެ ބެލުމުގެ ދަށަށް ގެނައެވެ. ނަމަވެސް މިކަމުގައި ބައިވެރިވުމެއް ނެތްކަމަށް ތަހުގީގަށް ފާހަގަކުރެވުނު ހަތް މީހަކުވަނީ ދޫކޮށްލާފައެވެ. މި މައްސަލައާ ގުޅިގެން ފުލުހުން ހައްޔަރުކުރި މީހުންގެ ތެރޭގައި ހިމެނެނީ ހިމެނެނީ 23 އަހަރާއި 40 އަހަރާ ދެމެދުގެ ދިވެހި ފިރިހެނުންނެވެ.
