407 ޓޫރިސްޓު ފެސިލިޓީ އޮޕަރޭޓްކުރަން ފަށައިފި
11 ޑިސެމްބަރު 2020 | ހުކުރު 07:57135 ރިސޯޓެއް މިހާރު އޮޕަރޭޓްކުރޭ
36,750 އެނދު ދަނީ ފަތުރުވެރިންނަށް ހިދުމަތްދިނުމަށް އޮޕަރޭޓްކުރަމުން
ފަތުރުވެރިންނަށް ހިދުމަތްދޭ 407 ފެސިލިޓީ އޮޕަރޭޓްކުރަން ފަށާފައިވާކަމަށް ޓޫރިޒަމް މިނިސްޓްރީން މައުލޫމާތު ދީފިއެވެ.
އެގޮތުން މިހާރު 135 ރިސޯޓެއް މިހާރު އޮޕަރޭޓްކުރަން ފަށާފައިވާއިރު، ރިސޯޓްތަކުން 31,104 އެނދު މިހާރު ފަތުރުވެރިންނަށް ހިދުމަތްދިނުމަށް އޮޕަރޭޓްކުރެއެވެ. މީގެ އިތުރުން ފަސް ހޮޓަލުގައި 602 އެނދު، 124 ސަފާރީއެއްގައި 2,344 އަދި 143 ގެސްޓް ހައުސްގައި 2,700 އެނދު ދަނީ އޮޕަރޭޓްކުރަމުންނެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިހާރު ޖުމްލަ 36,750 އެނދު ދަނީ ފަތުރުވެރިންނަށް ހިދުމަތްދިނުމަށް އޮޕަރޭޓްކުރަމުންނެވެ.
އޮކްޓޫބަރ މަހުގެ 15 ވަނަ ދުވަހު ގެސްޓް ހައުސްތައް ހުޅުވާލުމުގެ ހުއްދަ ދިނުމާއި އެކު ޑިސެމްބަރ އަށް ވަނަ ދުވަހުގެ ނިޔަލަށް ނުވަ އަތޮޅެއްގައި ގެސްޓްހައުސްތައް އޮޕަރޭޓްކުރަން ވަނީ ފަށާފައެއެވެ. އެއީ ހއ. އަތޮޅުގައި ތިން ގެސްޓް ހައުސް، ނޫނު އަތޮޅުގައި އެއް ގެސްޓް ހައުސް، ބ. އަތޮޅުގައި ހަތަރު ގެސްޓް ހައުސް، ކ. އަތޮޅުގައި 60 ގެސްޓް ހައުސް، އއ. އަތޮޅުގައި 43 ގެސްޓް ހައުސް، އދ. އަތޮޅުގައި 10 ގެސްޓް ހައުސް، ވ. އަތޮޅުގައި 14 ގެސްޓް ހައުސް އަދި ޏ. އަތޮޅުގައި ފަސް ގެސްޓް ހައުސްގެ އިތުރުން ސ. އަތޮޅުގައި ތިން ގެސްޓް ހައުސްއެވެ.
މާރޗް 27 ވަނަ ދުވަހު ރާއްޖޭގެ ބޯޑަރު ބަންދުކުރުމަށްފަހު ޖުލައި 15 ވަނަ ދުވަހު ބޯޑަރު އަލުން ހުޅުވާލިއިރު، ފަތުރުވެރިންނަށް ހިދުމަތްދިނުމުގެ ހުއްދަ ލިބިގެންދިޔައީ ހަމަ އެކަނި ރިސޯޓްތަކަށާއި ސަފާރީތަކަށެވެ. އަތޮޅުތެރޭގެ ރަށްތަކުގެ ގެސްޓް ހައުސްތައް ހުޅުވުމުގެ ފުރުސަތު އޮކްޓޫބަރ 15 ވަނަ ދުވަހު ދީފައިވާއިރު، މާލެ ސަރަހައްދުގެ ގެސްޓް ހައުސްތައް ހުޅުވުމަށް ހަމަޖެހިފައި ވަނީ ޑިސެމްބަރ 14 ވަނަ ދުވަހުއެވެ.
