އިންޑިއާއިން ފެނުނު ގޮތް ނޭނގޭ ބަލީގެ އަސްލަކީ މައުދަންތަކުގެ ވިހަ!
11 ޑިސެމްބަރު 2020 | ހުކުރު 08:15ބަލިވި މީހުންގެ ހަށިގަނޑުގައި ލެޑް އަދި ނިކްލް ފަދަ މައުދަންތައް އާދަޔާ ހިލާފަށް ގިނަ
އިންޑިއާއިން ފެނުނު ގޮތް ނޭނގޭ ބަލި ޖެހިގެން ހޮސްޕިޓަލަށް ގެންދެވުނު މީހެއް
އިންޑިއާއިން ފެނުނު ގޮތް ނޭނގޭ ބަލީގެ އަސަލަކީ ބައެއް މައުދަނުތަކުގެ ވިހަކަމަށް އެ ގައުމުގެ އަންދްރާ ޕްރަދޭޝްގެ ސިއްހަތާއި ބެހޭ ވުޒާރާއިން ބުނެފިއެވެ.
އެކަމާއި ގުޅިގެން އެ ވުޒާރާއިން ނެރުނު ބަޔާނެއްގައި ބުނި ގޮތުގައި، އެ ސްޓޭޓުން ބަލިވި މީހުންގެ ހަށިގަނޑުން ސާމްޕަލް ނަގައި ބެލި ބެލުމުން އެނގުނީ ބަލިވި މީހުންގެ ހަށިގަނޑުގައި ލެޑް އަދި ނިކްލް ފަދަ މައުދަންތައް އާދަޔާ ހިލާފަށް ގިނަކަމަށެވެ. އަދި މި ބައްޔަކީ ހަށިގަނޑުގައި މި މައުދަނުތަކުގެ ވިހަ އިތުރުވުމުގެ ސަބަބުން ކުރިމަތިވި މައްސަލައެއްކަމަށް ބެލެވޭކަމަށް އެ ބަޔާނުގައިވެއެވެ.
އިންޑިއާގެ ދެ ސްޓޭޓަކުން މި ބަލި ފެނިފައިވާއިރު އިންޑިއާގެ ސިއްހަތާ ބެހޭ މައި ވުޒާރާއިން ބުނީ މި ބަލީގެ ތަހުލީލުތައް ކުރުމުން އަންނަކަމަށެވެ. އެ އިދާރާއިން ނެރުނު ބަޔާނެއްގައި ބުނީ، ގޮތް ނޭނގޭ މިބަލީގެ މައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަކަމަށެވެ. އަދި މި ބަލީގެ އަލާމަތްތައް ފެނުމާއިއެކު ހޮސްޕިޓަލުން ފަރުވާ ހޯދުމަށް އާންމުންގެ ކިބައިން އެދޭކަމަށެވެ.
މި ބަލީގެ އަލާމަތްތަކުގެ ތެރޭގައި ހޮޑުލެވުމާއި، ބޯ އެނބުރުމާއި ހޭނެތުމާއި ބޯ އެނބުރުން އެރުން އަދި ލޯ 'ކެރުން ފަދަ ކަންކަން ހިމެނެއެވެ. އިންޑިއާއިން ފެނުނު މި ބަލީގެ އަސްލަކީ ކޮވިޑް ކަމަށް ޝައްކުކުރެވުނު ނަމަވެސް، މި ބަލީގެ މީހުންގެ ކޮވިޑަށް ޓެސްޓު ކުރުމުން ކޮވިޑަށް ނެގެޓިވްއެވެ.
