ކެނެޑާއިން ފައިޒަރގެ ވެކްސިނަށް ހުއްދަދީފި
9 ޑިސެމްބަރު 2020 | ބުދަ 18:19މި މަހުގެ ތެރޭގައި ކެނެޑާއަށް ފައިޒަރގެ 249،000 ޑޯޒް ވެކްސިން ލިބޭނެ
ކެނެޑާއިން ވަނީ މިހާތަނަށް ވެކްސިންގެ 20 މިލިއަން ޑޯޒް ގަނެފައެވެ.
ކޮވިޑް-19 އަށް ފައިޒަރ އަދި ބައޯއެންޓެކް އިން އުފައްދާފައިވާ ވެކްސިނަށް ކެނެޑާއިން ހުއްދަ ދީފިއެވެ.
ހެލްތު ކެނެޑާއިން ނެރުނު ބަޔާނެއްގައި ބުނެފައި ވަނީ ފައިޒަރގެ ވެކްސިނަށް ހުއްދަ ދެވިގެން ދިއުމަކީ ކޮވިޑް-19 އިން ރައްކާތެރިވުމަށް އެޅިގެން ދިޔަ މުހިންމު ފިޔަވަޅެއް ކަމަށެވެ. އަދި ފައިޒަރ އަދި ބައޯއެންޓެކް އިން ތައްޔާރުކޮށްފައިވާ ވެކްސިނަކީ ކޮވިޑް-19 އިން ރައްކާތެރިކަން ކަށަވަރުކޮށްދޭ ވެކްސިނެއް ކަމަށެވެ.
މި މަހުގެ ތެރޭގައި ކެނެޑާއަށް ފައިޒަރގެ 249،000 ޑޯޒް ވެކްސިން ލިބޭނެ ކަމަށް ބުނެފައިވާއިރު، އަންނަ ހަފްތާގެ ތެރޭގައި އާންމު ރައްޔިތުންނަށް ވެކްސިން ދޭން ފެށޭނެކަމަށް އެގައުމުން ވަނީ ބުނެފައެވެ.
އަންނަ އަހަރުގެ މާޗް މަހާ ހަމައަށް ކެނެޑާއަށް ވެކްސިންގެ އިތުރު ހަތަރު މިލިއަން ޑޯޒް ލިބޭނެ ކަމަށް ބުނެފައިވާއިރު، އެގައުމުން ވަނީ މިހާތަނަށް ވެކްސިންގެ 20 މިލިއަން ޑޯޒް ގަނެފައެވެ. އަދި އިތުރު 56 މިލިއަން ޑޯޒް ގަތުމުގެ ފުރުސަތުވެސް އެގައުމުން ވަނީ ހަމަޖައްސާފައެވެ.
ކެނެޑާގެ ހެލްތު އޮފިސަރުން ވަނީ ވެކްސިން މާކެޓަށް ނެރުމާއިއެކު ވެކްސިންގެ ރައްކާތެރިކަމާއި މެދު އެއްވެސް ސުވާލެއް އުފެދޭނަމަ ފިޔަވަޅުއަޅަން ފަސްނުޖެހޭނެ ކަމަށެވެ.
އުމުރުން 16 އަހަރުން މަތީގެ ރައްޔިތުންނަށް ވެކްސިން ދިނުމުގެ މަސައްކަތް ކެނެޑާގައި މިހާރު ފަށާފައިވާއިރު، އެގައުމުން ވަނީ ވެކްސިން ދިނުމުގައި އިސްކަން ދެވޭނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދޭ މީހުންނާއި ނަރސިން ހޯމްތަކުގައި ތިބި މީހުންގެ އިތުރުން ހެލްތު ވޯކަރުންނަށް ކަމަށް ބުނެފައެވެ. އަދި ހުރިހާ އުމުރުފުރާއަކަށް ވެކްސިން ދިނުމުގެ މަސައްކަތް ފަށާނީ ކުޑަކުދިންނަށް އަމާޒުކޮށް ކުރިއަށްގެންދާ ކްލިނިކަލް ޓްރަޔަލްތައް ނިމުމުން ކަމަށް ބުނެފައެވެ.
ކެނެޑާގެ ބޮޑުވަޒީރު ޖަސްޓިން ޓްރޫޑޯ ވަނީ ވެކްސިންދޭން ފެށުމަކީ ކެނެޑާގެ ތާރިގުގައި ފާހަގަކޮށްލެވޭނެ ކަމެއްކަމަށް ވިދާޅުވެ ވެކްސިން ދިނުމުގެ މަސައްކަތް ކުޑަ ސްކޭލެއްގައި ފަށައި، ކުރިއަށް އޮތްތާގައި ބޮޑު ކުރަމުން ދާނެކަމަށް ވިދާޅުވެފައެވެ.
